ഇന്ത്യന് ടീം കരുത്ത് മികച്ചത്
മികച്ച താരങ്ങള് ഒപ്പമുള്ളത് റിഷഭിനെ സംബന്ധിച്ച് തന്റെ നായകനെന്ന ജോലി എളുപ്പമാക്കും. ഓപ്പണിങ്ങില് രാഹുലിന്റെ അഭാവത്തില് ഇഷാന് കിഷനും റുതുരാജ് ഗെയ്ക് വാദും ഓപ്പണര്മാരായി എത്താനാണ് സാധ്യത. രണ്ട് പേരും പ്രതിഭാശാലികളാണ്. ഹര്ദിക് പാണ്ഡ്യ ഓള്റൗണ്ട് മികവ് കാട്ടി ഒപ്പമുണ്ട്. മൂന്നാം നമ്പറില് ശ്രേയസ് അയ്യരുണ്ട്. നായകനെന്ന നിലയില് റിഷഭിനേക്കാള് അനുഭവസമ്പത്തുള്ള ശ്രേയസിന്റെ സഹായവും റിഷഭിന് കാര്യങ്ങള് എളുപ്പമാക്കും.
കൂടാതെ ഹര്ദിക് പാണ്ഡ്യ ബൗളിങ് പുനരാരംഭിച്ചതോടെ ബൗളിങ്ങിലെ ഇന്ത്യയുടെ ആശങ്കകള്ക്കും ഏറെക്കുറെ അവസാനമായി. ദീപക് ഹൂഡയേയും പാര്ട് ടൈം സ്പിന്നറായി ഉപയോഗിക്കാം. ദിനേഷ് കാര്ത്തികിനെപ്പോലെ അനുഭവസമ്പന്നനായ ഫിനിഷറും ഇന്ത്യക്കൊപ്പമുള്ളതിനാല് ടീം കരുത്തില് നായകന് അധികം ആശങ്കപ്പെടേണ്ട സാഹചര്യമില്ല.
ദക്ഷിണാഫ്രിക്കന് പേസര്മാരെ നയിച്ച ക്യാപ്റ്റന്
ഡല്ഹി ക്യാപിറ്റല്സിന്റെ നായകനായ റിഷഭിന് ദക്ഷിണാഫ്രിക്കയുടെ സൂപ്പര് പേസര്മാരെ നയിച്ചുള്ള അനുഭവസമ്പത്തുണ്ട്. സന്ദര്ശകരുടെ സ്റ്റാര് പേസര് കഗിസോ റബാഡ, ആന്റിച്ച് നോക്കിയേ എന്നിവര് ഡല്ഹിയിലെ റിഷഭിന്റെ സഹതാരങ്ങളായിരുന്നു. 2021ല് ഇവരെ രണ്ട് പേരെയും നയിക്കാനും റിഷഭിനായി. ഇതിന് മുമ്പ് ഇവരോടൊപ്പം കളിച്ചുള്ള അനുഭവസമ്പത്തും നെറ്റ്സില് നേരിട്ടുള്ള അനുഭവസമ്പത്തും റിഷഭിനുണ്ട്. അതുകൊണ്ട് തന്നെ ഇത് ഇന്ത്യയുടെ നായകനാവുമ്പോള് പ്രയോജനപ്പെടുത്താന് റിഷഭിന് സാധിച്ചേക്കും.
റബാഡയുടെ ബൗളിങ്ങിലാവും ദക്ഷിണാഫ്രിക്കയുടെ പ്രധാന പ്രതീക്ഷ. ഇതിനെ മറികടക്കാനുള്ള തന്ത്രം മറ്റാരെക്കാളും നന്നായി മെനയാന് റബാഡയോടൊപ്പം കളിച്ച് അനുഭവസമ്പത്തുള്ള റിഷഭിന് സാധിക്കും. 2022 സീസണില് നോക്കിയേ ഡല്ഹിയിലുണ്ടായിരുന്നു. കൂടാതെ റിഷഭ് സമ്മര്ദ്ദത്തിന് അടിമപ്പെടുന്ന നായകനല്ല. സമ്മര്ദ്ദ സാഹചര്യങ്ങളെ അനായസമായി കൈകാര്യം ചെയ്യാന് അദ്ദേഹത്തിന് മികവുണ്ട്. ഇതെല്ലാം നായകനെന്ന നിലയില് ഇന്ത്യയെ പരമ്പരയിലേക്കെത്തിക്കാന് റിഷഭിനെ സഹായിക്കും.
യുവ ബൗളര്മാരെ നന്നായി കൈകാര്യം ചെയ്യാനറിയാം
യുവ ബൗളര്മാരെ നന്നായി ഉപയോഗിക്കാന് അറിയാവുന്ന നായകനാണ് റിഷഭ് പന്ത്. ഉമ്രാന് മാലിക്, ആവേഷ് ഖാന്, രവി ബിഷ്നോയ്, അര്ഷദീപ് സിങ് തുടങ്ങി നിരവധി യുവ ബൗളര്മാരാണ് ഇത്തവണ ഇന്ത്യന് ടീമിനൊപ്പമുള്ളത്. ഇവരെ നന്നായി കൈകാര്യം ചെയ്യാന് ഇന്ത്യക്ക് കഴിവുണ്ട്. 2021ല് റിഷഭിന്റെ ക്യാപ്റ്റന്സിക്ക് കീഴില് നടത്തിയ പ്രകടനമാണ് ആവേഷ് ഖാനെ എല്ലാവരും ശ്രദ്ധിക്കാന് കാരണമായത്. അനുഭവസമ്പത്തിന്റെ കുറവുണ്ടെങ്കിലും താരതമ്യേനെ ഭേദപ്പെട്ട രീതിയില് തീരുമാനങ്ങളെടുക്കാന് റിഷഭിന് കഴിവുണ്ട്. ബൗളിങ് ചെയ്ഞ്ചുകളടക്കം നന്നായി വരുത്താന് റിഷഭ് മിടുക്കുകാട്ടാറുണ്ട്. യുവതാരങ്ങളെ നന്നായി പ്രോത്സാഹിപ്പിക്കുന്ന റിഷഭിന്റെ ക്യാപ്റ്റന്സി ഇന്ത്യയെ പരമ്പര നേട്ടത്തിലേക്കെത്തിക്കാനാണ് സാധ്യത.