യുഎസ് ഓപ്പണ്‍: കുതിപ്പ് തുടര്‍ന്ന് നദാലും സെറീനയും... മുറേയ്ക്ക് മടക്കടിക്കറ്റ്

ന്യൂയോര്‍ക്ക് സിറ്റി: പുരുഷ വിഭാംഗം സിംഗിള്‍സില്‍ നിലവിലെ ചാംപ്യനായ റാഫേല്‍ നദാലും വനിത വിഭാഗം സിംഗിള്‍സില്‍ മുന്‍ ജേതാവായ സെറീന വില്ല്യംസും വിജയത്തോടെ യുഎസ് ഓപ്പണ്‍ ടെന്നിസ് ടൂര്‍ണമെന്റിന്റെ മൂന്നാംറൗണ്ടില്‍ കടന്നു.

അതേസമയം, ബ്രിട്ടീഷ് മുന്‍ ലോക ഒന്നാം നമ്പര്‍ ആന്‍ഡി മുറേ തോല്‍വിയോടെ ടൂര്‍ണമെന്റിന്റെ മൂന്നാംറൗണ്ട് കാണാതെ പുറത്തായി. നിലവിലെ ലോക ഒന്നാം നമ്പറായ സ്‌പെയിനിന്റെ റാഫേല്‍ നദാല്‍ കാനഡയുടെ വാസെക് പോസ്പിസിലിനെ 6-3, 6-4, 6-2 എന്ന സ്‌കോറിന് തോല്‍പ്പിക്കുകയായിരുന്നു. മുന്‍ ലോക ഒന്നാം നമ്പറായ അമേരിക്കയുടെ സെറീന 6-2, 6-2 എന്ന സ്‌കോറിന് ജര്‍മനിയുടെ കരീന വിത്തോഫ്റ്റിനെയും സഹോദരി വീനസ് വില്ല്യംസ് 6-4, 7-5 എന്ന സ്‌കോറിന് ഇറ്റലിയുടെ കാമില ജിയോര്‍ജിയെയും പരാജയപ്പെടുത്തുകയായിരുന്നു.

ആന്‍ഡി മുറേയെ സ്‌പെയിനിന്റെ ഫെര്‍നാന്‍ഡോ വെര്‍ഡാസ്‌കോയാണ് വീഴ്ത്തിയത്. സ്‌കോര്‍: 7-5, 2-6, 6-4, 6-4. സ്ലൊഹാനെ സ്‌റ്റെഫെന്‍സ്, എലിന സിറ്റോലിന, യുവാന്‍ മാര്‍ട്ടിന്‍ ഡെല്‍പോര്‍ട്ടോ, സ്റ്റാനിസ്ലാസ് വാവ്‌റിന്‍ക, ജോണ്‍ ഇസ്‌നര്‍ എന്നിവര്‍ വിജയത്തോടെ ടൂര്‍ണമെന്റിന്റെ മൂന്നാംറൗണ്ടില്‍ പ്രവേശിച്ചു.