T20 World Cup 2026: ഇന്ന് ജയിച്ചാലും തോറ്റാലും സൂര്യ പുറത്ത്..! ഇനി ക്യാപ്റ്റന്‍ ശ്രേയസ് അയ്യര്‍?

ടി20 ലോകകപ്പ് ഫൈനലിന് ഇന്ന് ഇന്ത്യ ഇറങ്ങുമ്പോള്‍ നായകന്‍ സൂര്യകുമാര്‍ യാദവിനും നിര്‍ണായകം. 30 കളില്‍ അന്താരാഷ്ട്ര ടി20 യില്‍ അരങ്ങേറി പിന്നീട് അതിവേഗം ലോകത്തിലെ എക്കാലത്തേയും മികച്ച ടി20 ബാറ്റ്‌സ്മാന്‍മാരില്‍ ഒരാളായി മാറിയ സൂര്യ ഇപ്പോള്‍ തന്റെ ഫോമിന്റെ നിഴലില്‍ മാത്രമാണ്. ലോകകപ്പ് ഫൈനലില്‍ ഫലമെന്തായാലും സൂര്യയുടെ ഭാവി നിര്‍ണയിക്കപ്പെടും എന്നാണ് കരുതുന്നത്.

T20 WC 2026: സിംപിളായി അവൻ 150 അടിച്ചേനേ; സഞ്ജുവിന്റെ ബാറ്റിങ്ങിനെ പുകഴ്ത്തി മതിയാകാതെ മുൻ സിഎസ്കെ താരം

2021 മുതല്‍ 2023 വരെ സൂര്യകുമാര്‍ യാദവ് അസാധാരണ ഫോമിലായിരുന്നു. വെറും 3 വര്‍ഷത്തിനിടയില്‍, 45.55 ശരാശരിയില്‍ 2141 റണ്‍സാണ് ടി20യില്‍ അദ്ദേഹം അടിച്ചെടുത്തത്. 160 ശരാശരിയില്‍ 1000 റണ്‍സില്‍ കൂടുതല്‍ റണ്‍സ് ഇതുവരെ ആരും നേടിയിട്ടില്ല.171.55 എന്ന അതിശക്തമായ സ്‌ട്രൈക്ക് റേറ്റും താരത്തിനുണ്ടായിരുന്നു. ഇതുവരെ ആരും കണ്ടിട്ടില്ലാത്ത ഒരു അന്താരാഷ്ട്ര കൊടുമുടിയായിരുന്നു അത്.

ഐപിഎല്‍ പ്രകടനത്തോടൊപ്പം ടി20യിലെ മികവും ചേര്‍ന്ന് അദ്ദേഹത്തിന് 'ഇന്ത്യയുടെ എക്കാലത്തെയും മികച്ച ടി20 ബാറ്റ്‌സ്മാന്‍' എന്ന പദവി നേടിക്കൊടുത്തു. സൂര്യ ക്രീസിലുള്ളപ്പോള്‍ പിച്ചിനും ബൗളറിനും വേദിക്കും എതിര്‍ ടീമിനും വലിയ പ്രാധാന്യമൊന്നും ഉണ്ടായിരുന്നില്ല. 2022 ലെ ടി20 ലോകകപ്പില്‍ പരാജയപ്പെട്ടെങ്കിലും താന്‍ എത്ര മികച്ചവനാണെന്ന് തെളിയിക്കാന്‍ പെര്‍ത്തില്‍ ദക്ഷിണാഫ്രിക്കയ്ക്കെതിരെ സൂര്യ എക്കാലത്തെയും മികച്ച പ്രകടനം കാഴ്ചവച്ചു.

T20 WC 2026: ഇന്ത്യൻ ഹൃദയങ്ങൾ തകർത്ത് കപ്പടിക്കുമെന്ന് സാന്റ്നർ, സൂര്യയുടെ മറുപടിക്കായി കാതോർത്ത് ആരാധകർ

അദ്ദേഹം എല്ലായ്പ്പോഴും ഏറ്റവും കൂടുതല്‍ റണ്‍സ് നേടിയ കളിക്കാരനായിരുന്നില്ല, പക്ഷേ ഒരു ഇന്ത്യന്‍ ബാറ്റ്സ്മാനുപോലും ഇക്കാലയളവില്‍ ക്രിക്കറ്റിന്റെ കുഞ്ഞന്‍ ഫോര്‍മാറ്റില്‍ വലിയ സ്വാധീനം ചെലുത്താന്‍ കഴിഞ്ഞിട്ടില്ല. എന്നാല്‍ ബാറ്റ്‌സ്മാന്‍ എന്ന നിലയില്‍ സൂര്യയുടെ പതനം ആരംഭിക്കുന്നത് ക്യാപ്റ്റന്‍സി ഏറ്റെടുത്തതോടെയാണ്. 2024 ലെ ടി20 ലോകകപ്പിന് ശേഷം രോഹിത് വിരമിച്ചതോടെയാണ് സൂര്യയിലേക്ക് ക്യാപ്റ്റന്‍സി എത്തുന്നത്.

അദ്ദേഹത്തിന്റെ കീഴില്‍ ഇന്ത്യ ഒരു ഭീമനായി മാറി. 2024 ടി20 ലോകകപ്പിനുശേഷം ഇന്ത്യ 7 മത്സരങ്ങള്‍ മാത്രമേ തോറ്റിട്ടുള്ളൂ. അതേ കാലയളവില്‍ 48 എണ്ണം ജയിക്കാനുമായി. ടീം എന്ന നിലയില്‍ ഈ ഉയരങ്ങള്‍ കീഴടക്കുമ്പോഴും പഴയ സൂര്യകുമാറിനെ കണ്ടെത്താന്‍ കഴിഞ്ഞില്ല. നായക ചുമതലയേറ്റതിനുശേഷം, സൂര്യയുടെ ബാറ്റിംഗ് സ്ഥിരമായി കുറഞ്ഞു. ടി20ഐകളില്‍, ക്യാപ്റ്റനായതിനുശേഷം ഇന്ത്യയുടെ ഏറ്റവും മോശം ബാറ്റ്സ്മാനാണ് സൂര്യ എന്ന് പറഞ്ഞാലും തെറ്റില്ല.

T20 WC 2026: സ്കൈ ഇന്ത്യയുടെ ബാബർ അസമോ? വലിയ ടീമുകൾക്കെതിരെ മുട്ട് വിറയ്ക്കും, കളിയാക്കി മുൻ താരം

അഭിഷേക് ശര്‍മ്മ, സഞ്ജു സാംസണ്‍, ഇഷാന്‍ കിഷന്‍ എന്നിവര്‍ക്കെല്ലാം 180 ല്‍ കൂടുതല്‍ റണ്‍സ് എളുപ്പത്തില്‍ നേടാന്‍ കഴിയുന്ന ഒരു കാലത്ത്, സൂര്യ 150 ല്‍ പോലും സ്‌ട്രൈക്ക് ചെയ്യുന്നില്ല. കഴിഞ്ഞ 15 മാസത്തിനിടെ, അദ്ദേഹത്തിന്റെ ശരാശരി 27 ഉം 147 ഉം മാത്രമാണ്. അദ്ദേഹത്തിന്റെ പ്രാരംഭ ഘട്ടത്തില്‍, അദ്ദേഹം വിനോദത്തിനായി സെഞ്ച്വറികള്‍ നേടുകയായിരുന്നു. ഇപ്പോള്‍, അര്‍ദ്ധസെഞ്ച്വറികള്‍ പോലും അപൂര്‍വമാണ്.

2026 ലെ ടി20 ലോകകപ്പില്‍ യുഎസ്എയ്ക്കെതിരെ മുംബൈയില്‍ സ്വന്തം മൈതാനത്ത് നേടിയ ആ ഒറ്റ ഇന്നിംഗ്‌സിന് പുറമെ, ടൂര്‍ണമെന്റ് അദ്ദേഹത്തിന് മറക്കാനാവാത്ത ഒന്നായി മാറിയിരിക്കുന്നു. ഈ ടൂര്‍ണമെന്റില്‍ സൂര്യ 7 ഇന്നിംഗ്സുകളില്‍ നിന്ന് 158 റണ്‍സ് ആണ് നേടിയത്. അഭിഷേകില്‍ നിന്ന് വ്യത്യസ്തമായി, സൂര്യകുമാറിന്റെ ഈ ഫോമൗട്ട് ഒറ്റയടിക്ക് സംഭവിക്കുന്ന ഒന്നല്ല. കളി സൂക്ഷ്മമായി നിരീക്ഷിക്കുന്ന ആര്‍ക്കും മനസ്സിലാകും അദ്ദേഹം അത്ര വേഗത്തില്‍ തുടങ്ങുന്നില്ലെന്ന്.

ദുര്‍ബലമായ എതിരാളികള്‍ക്കെതിരെ പോലും, തുടക്കം മുതല്‍ തന്നെ അദ്ദേഹത്തിന് നിലയുറപ്പിക്കാനാകുന്നില്ല. നമീബിയയ്ക്കെതിരെ 12 (13), നെതര്‍ലന്‍ഡ്സിനെതിരെ 34 (28), വെസ്റ്റ് ഇന്‍ഡീസിനെതിരെ 18 (16) എന്നിങ്ങനെയായിരുന്നു അദ്ദേഹത്തിന്റെ സ്‌കോര്‍. ഈ ടീമുകള്‍ക്കൊന്നും ലോകോത്തര ബൗളിംഗ് ആക്രമണമില്ല എന്നതും ശ്രദ്ധിക്കണം. അതുകൊണ്ടാണ് ഇന്നത്തെ ഫൈനല്‍ അദ്ദേഹത്തിന്റെ ഭാവി നിര്‍ണയിക്കും എന്ന് പറയുന്നത്.

2024 ലെ ടി20 ലോകകപ്പ് ഫൈനലില്‍ കിരീടം നേടിക്കൊണ്ടാണ് മികച്ച താരങ്ങളായ കോലിയും രോഹിതും വിരമിച്ചത്. ഇന്നത്തെ ഫലം എന്തായാലും സൂര്യകുമാര്‍ വിരമിച്ചേക്കില്ല, പക്ഷേ ഇന്ത്യയ്ക്കുവേണ്ടിയുള്ള അദ്ദേഹത്തിന്റെ അവസാന ടി20 മത്സരമായിരിക്കാം അത്. കാരണം ക്യാപ്റ്റനായിരുന്നില്ലെങ്കില്‍ നിലവില്‍ ഫോമില്‍ അദ്ദേഹം എന്നേ ടീമിന് പുറത്താകുമായിരുന്നു.

അടുത്ത ടി20 ലോകകപ്പ് 2028 ല്‍ ആണ്. അതിന് ഇന്ത്യ ഇപ്പോള്‍ തന്നെ തയ്യാറെടുപ്പുകള്‍ ആരംഭിക്കേണ്ടതുണ്ട്. അപ്പോഴേക്കും സൂര്യയ്ക്ക് 38 വയസ് തികയും. കഴിഞ്ഞ 2 വര്‍ഷമായി ഫോമൗട്ടായ ആളെ അടുത്ത രണ്ട് വര്‍ഷത്തേക്ക് കൂടി ടീം ചുമക്കേണ്ടതില്ല. മാത്രമല്ല, നിലവില്‍ മികച്ച ബാറ്റര്‍മാരും ക്യാപ്റ്റന്മാരുമാകാന്‍ സാധ്യതയുള്ള ശ്രേയസ് അയ്യറിനെ പോലുള്ളവര്‍ക്ക് ടീമിലേക്ക് വരാനും സാധിക്കില്ല.

യശസ്വി ജയ്സ്വാളിനെയോ റിയാന്‍ പരാഗിനെയോ എത്ര കാലം ഒഴിവാക്കുന്നത് ന്യായീകരിക്കാനാകും എന്ന ചോദ്യവും ഉയരുന്നുണ്ട്. ഏതായാലും ഇന്നത്തെ ദിനം ടി20 ലോകകപ്പ് ഫൈനലിന്റെ ഫലം എന്ത് തന്നെയായാലും സൂര്യയുടെ ഭാവി നിര്‍ണയിക്കപ്പെടും എന്നുറപ്പാണ്.