T20 WC 2026: അഭിഷേകിന് ഒന്നും ചെയ്യാനാകില്ല, സ്റ്റേഡിയം നിശബ്ദമാക്കും! കമ്മിൻസിനെ അനുകരിച്ച് സാം കറൻ

ടി20 ലോകകപ്പിന്റെ സെമി ഫൈനലിൽ ഇന്ത്യയെ നേരിടാനൊരുങ്ങുന്ന ഇംഗ്ലണ്ട് ടീമിൽ നിന്ന് ഇന്ത്യക്ക് ആദ്യ വെല്ലുവിളി ഉയർത്തി സാം കറൻ. 2023 ഏകദിന ലോകകപ്പിൽ പാറ്റ് കമ്മിൻസ് ഇന്ത്യക്ക് നൽകിയ 'നിശബ്ദത' എന്ന മുന്നറിയിപ്പിന് സമാനമായ വാക്കുകളുമായാണ് ഇംഗ്ലീഷ് ഓൾറൗണ്ടർ രംഗത്തെത്തിയിരിക്കുന്നത്. വാങ്കഡെയിലെ ഗാലറി നിശബ്ദമായാൽ അതിനർത്ഥം ഇംഗ്ലണ്ട് മികച്ച രീതിയിൽ കളിക്കുന്നു എന്നാണെന്ന് സാം കറൻ പത്രസമ്മേളനത്തിൽ പറഞ്ഞു.

T20 WC 2026: സഞ്ജുവിനെ തള്ളിക്കളഞ്ഞ് കപിൽ; ടീമിനാണ് പ്രാധാന്യം കൊടുക്കേണ്ടതെന്ന് ന്യായീകരണം
പാറ്റ് കമ്മിൻസിനെ അനുകരിച്ച് കറൻ

ഐപിഎല്ലിൽ കളിച്ച് മികച്ച അനുഭവ പരിചയമുള്ള സാം കറന് ഇന്ത്യൻ ആരാധകരുടെ കരുത്ത് നന്നായി അറിയാം. "ഒരു കൊച്ചു കുട്ടിയായിരുന്നപ്പോൾ മുതൽ ഇന്ത്യയിൽ വന്ന് ഇന്ത്യക്കെതിരെ ഒരു ലോകകപ്പ് സെമി കളിക്കുന്നത് സ്വപ്നമായിരുന്നു. ഗാലറി നിശബ്ദമാണെങ്കിൽ ആ ഘട്ടത്തിൽ ഇംഗ്ലണ്ട് നന്നായി കളിക്കുന്നുണ്ടെന്ന് ഉറപ്പിക്കാം. സ്റ്റേഡിയം നിശബ്ദമാകുമെന്ന് ഞങ്ങൾ പ്രതീക്ഷിക്കുന്നു," കറൻ പറഞ്ഞു. ലക്ഷക്കണക്കിന് വരുന്ന ഇന്ത്യൻ ആരാധകരെ നിശബ്ദരാക്കി ഫൈനലിലേക്ക് മുന്നേറുകയാണ് തങ്ങളുടെ ലക്ഷ്യമെന്ന് അദ്ദേഹം അടിവരയിട്ടു.

അഭിഷേക് ശർമ്മയെ പേടിച്ച് ഇംഗ്ലണ്ട്?

ടൂർണമെന്റിൽ ഇതുവരെ വലിയ പ്രകടനങ്ങൾ നടത്തിയിട്ടില്ലെങ്കിലും ഇന്ത്യൻ ഓപ്പണർ അഭിഷേക് ശർമ്മയെ ഇംഗ്ലണ്ട് പേടിക്കുന്നുണ്ടെന്ന് കറന്റെ വാക്കുകളിൽ നിന്ന് വ്യക്തമാണ്. 2025-ൽ ഇന്ത്യയിൽ നടന്ന പരമ്പരയിൽ അഭിഷേക് നടത്തിയ വെടിക്കെട്ട് ഇംഗ്ലീഷ് ബൗളർമാരുടെ മനസ്സിൽ ഇപ്പോഴുമുണ്ട്. "അഭിഷേകിന് ഈ കളിയിൽ കാര്യമായൊന്നും ചെയ്യാൻ കഴിയാതിരിക്കട്ടെ എന്ന് ഞാൻ ആഗ്രഹിക്കുന്നു. വ്യാഴാഴ്ച രാത്രിയിലാണ് ഞങ്ങളുടെ പൂർണ്ണ ശ്രദ്ധ," കറൻ വ്യക്തമാക്കി. വിൽ ജാക്സ്, ഹാരി ബ്രൂക്ക് എന്നിവരിൽ തനിക്ക് വലിയ വിശ്വാസമുണ്ടെന്നും അദ്ദേഹം കൂട്ടിച്ചേർത്തു.

വാങ്കഡെയിലെ കണക്കുകൾ

വാങ്കഡെയിലെ ബാറ്റിംഗ് പിച്ചും ചെറിയ ബൗണ്ടറികളും ഇംഗ്ലണ്ടിന് അനുകൂലമാകുമെന്നാണ് കറന്റെ വിലയിരുത്തൽ. ഈ ലോകകപ്പിൽ നേപ്പാളിനെതിരെയുള്ള വിജയം ഉൾപ്പെടെയുള്ള അനുഭവങ്ങൾ ഇംഗ്ലണ്ടിന് സഹായകമാകും. മുൻപത്തെ മത്സരങ്ങളിൽ എങ്ങനെ കളിച്ചു എന്നതിലല്ല, മറിച്ച് സെമി ഫൈനൽ നടക്കുന്ന ആ ഒരു ദിവസത്തെ പ്രകടനത്തിലാണ് കാര്യമെന്നും സാം കറൻ പറഞ്ഞു. അഞ്ച് മത്സരങ്ങൾ തുടർച്ചയായി വിജയിച്ചു വരുന്ന ഇംഗ്ലണ്ട്, സഞ്ജുവും സൂര്യയും നയിക്കുന്ന ഇന്ത്യൻ ബാറ്റിംഗ് നിരയെ പിടിച്ചുകെട്ടാനുള്ള തന്ത്രങ്ങൾ മെനഞ്ഞു കഴിഞ്ഞു.

T20 WC 2026: രോഹിത്തിനും ധോണിക്കുമുള്ളത് പോലെ... സഞ്ജു ഏറ്റവും കൂടുതൽ സ്നേഹിക്കപ്പെടുന്ന ക്രിക്കറ്ററെന്ന് ഡികെ
ടി20 ലോകകപ്പ് ചരിത്രത്തിൽ ഇത് മൂന്നാം തവണയാണ് ഇന്ത്യയും ഇംഗ്ലണ്ടും സെമിയിൽ നേർക്കുനേർ വരുന്നത്. 2022-ൽ ഇംഗ്ലണ്ട് ജയിച്ചപ്പോൾ 2024-ൽ ഇന്ത്യ പകരം വീട്ടി. ഈ മത്സരത്തിൽ ജയിക്കുന്നവർ കിരീടത്തിലേക്ക് ഒരു പടി കൂടി അടുക്കും. സഞ്ജു സാംസണിന്റെ വെടിക്കെട്ട് ഫോം ഇന്ത്യക്ക് കരുത്താണെങ്കിലും ഇംഗ്ലീഷ് പേസർ ജോഫ്ര ആർച്ചറെ നേരിടുന്നത് വെല്ലുവിളിയാകും. സഞ്ജുവിനെ ആർച്ചർ മുൻപ് മൂന്ന് തവണ പുറത്താക്കിയിട്ടുണ്ട്. ഇംഗ്ലണ്ടിനെതിരെ കളിച്ച അഞ്ച് മത്സരങ്ങളിൽ നിന്ന് 9 വിക്കറ്റുകൾ ബുംറ നേടിയിട്ടുണ്ട്. പവർപ്ലേയിൽ ജോസ് ബട്ലർ, ഫിൽ സാൾട്ട് എന്നിവരെ പുറത്താക്കാൻ ബുംറയുടെ സ്പെല്ലുകൾ നിർണ്ണായകമാകും.