നെയ്മറോട് അതു പറഞ്ഞു, ബ്രസീല്‍ ടീം ഒന്നടങ്കം പൊട്ടിച്ചിരിച്ചു!! റിച്ചാര്‍ളിസണിന്റെ വെളിപ്പെടുത്തല്‍

ടിറ്റെയ്ക്കു തികഞ്ഞ മതിപ്പ്

റിച്ചാര്‍ളിസണിനെക്കുറിച്ച് ബ്രസീല്‍ കോച്ച് ടിറ്റെയ്ക്കു തികഞ്ഞ മതിപ്പാണുള്ളത്. വശങ്ങളിലേക്ക നോക്കി കളിക്കുന്നതിനു പകരം മുന്നോട്ട് മാത്രം നോക്കി കളിക്കുന്ന താരമാണ് റിച്ചാര്‍ളിസണ്‍. അദ്ദേഹത്തിന്റെ വരവ് ടീമിനെ കൂടുതല്‍ സന്തുലിതമാക്കിയിട്ടുണ്ട്. ഭാവിയില്‍ ബ്രസീലിന്റെ മികച്ച താരങ്ങളിലൊരാളായി മാറാന്‍ റിച്ചാര്‍ളിസണിനാവുമെന്നും ടിറ്റെ ചൂണ്ടിക്കാട്ടി.

നെയ്മറുടെ കടുത്ത ആരാധകന്‍

നെയ്മറുടെ കടുത്ത ആരാധകനാണ് താനെന്നു റിച്ചാര്‍ളിസണ്‍ വെളിപ്പെടുത്തി. അദ്ദേഹത്തിനൊപ്പം കളിക്കാന്‍ കഴിഞ്ഞതില്‍ അതിയായ സന്തോഷമുണ്ടെന്നും താരം പറയുന്നു.
വളരെ ചെറുപ്പം മുതല്‍ ഏറെ ആരാധിക്കുന്ന താരമാണ് നെയ്മര്‍. കണ്ണാടിക്കു മുന്നില്‍ നിന്നു പലപ്പോഴും നെയ്മര്‍ കളിക്കുന്നതുപോലെ അനുകരിക്കാന്‍ ശ്രമിച്ചിട്ടുണ്ട്. അതു മാത്രമല്ല അദ്ദേഹത്തിന്റെ ഹെയര്‍ സ്‌റ്റൈലും അനുകരിച്ചിട്ടുണ്ടെന്നും റിച്ചാര്‍ളിസണ്‍ മനസ്സ്തുറന്നു.

അതു പറഞ്ഞപ്പോള്‍ ടീമാകെ പൊട്ടിച്ചിരിച്ചു

ബ്രസീലിനായി സൗഹൃദ മല്‍സരത്തില്‍ അവസരം ലഭിച്ചപ്പോള്‍ തന്റെ ആരാധനയെക്കുറിച്ച് നെയ്മറോടു പറഞ്ഞിരുന്നതായി റിച്ചാര്‍ളിസണ്‍ വെളിപ്പെടുത്തി. 13-14 വയസ്സുള്ളപ്പോഴായിരുന്നു അത്. തലയുടെ നടുവിലുള്ള മുടി മാത്രം മുകളിലേക്ക് ഉയര്‍ത്തിയുള്ള നെയ്മറുടെ മുന്‍ ഹെയര്‍സ്റ്റൈല്‍ ഒരിക്കല്‍ അനുകരിച്ചു. എന്നാല്‍ തന്റെ മുടി അതിനു യോജിച്ചതായിരുന്നില്ല. അഞ്ചു മിനിറ്റ് മാത്രം മുടി ഉയര്‍ന്നുനിന്ന ശേഷം താഴുകയും ചെയ്തതോടെ ഈ ശ്രമം പരാജയപ്പെട്ടു. ഇക്കാര്യം താന്‍ പറഞ്ഞപ്പോള്‍ ടീമിലെ മുഴുവന്‍ താരങ്ങളും പൊട്ടിച്ചിരിച്ചതായി റിച്ചാര്‍ളിസണ്‍ പറഞ്ഞു.