ഹാപ്പി ബെര്‍ത്ത് ഡേ ഹിറ്റ്മാന്‍... ഡബിളിലും മെഗാ ഹിറ്റ്, തുടക്കം ഓസീസിനെതിരേ

209 റണ്‍സ് (ഓസ്‌ട്രേലിയ-2013)

ഏകദിനത്തില്‍ രോഹിത്തിന്റെ കന്നി ഡബിള്‍ സെഞ്ച്വറിയുടെ പിറവി 2013ല്‍ കരുത്തരായ ഓസ്‌ട്രേലിയക്കെതിരേയായിരുന്നു. ബെംഗളൂരുവിലെ ചിന്നസ്വാമി സ്റ്റേഡിയത്തില്‍ നവംബര്‍ രണ്ടിനു നടന്ന മല്‍സരത്തില്‍ 209 റണ്‍സ് അടിച്ചെടുത്താണ് ഹിറ്റ്മാനും ഡബിള്‍ സെഞ്ച്വറി ക്ലബ്ബില്‍ അംഗമായത്. അന്നു സച്ചിന്‍ ടെണ്ടുല്‍ക്കറും വീരേന്ദര്‍ സെവാഗും മാത്രമാണ് എലൈറ്റ് ക്ലബ്ബിലുണ്ടായിരുന്നത്.
2013ലെ ചാംപ്യന്‍സ് ട്രോഫിയില്‍ ഓപ്പണറുടെ റോളില്‍ ശ്രദ്ധേയ പ്രകടനം നടത്തിയതോടെയാണ് ഈ സ്ഥാനം രോഹിത് തന്റെ പേരില്‍ ഉറപ്പിച്ചത്. ഓസീസിനെതിരേ കന്നി ഡബിളുമടിച്ചതോടെ അദ്ദേഹം ഇതു ഭദ്രമാക്കുകയും ചെയ്തു.
ഓസീസിനെതിരേ ടോസിനു ശേഷം ഇന്ത്യ ബാറ്റിങ് തിരഞ്ഞെടുക്കുകയായിരുന്നു. 158 പന്തിലാണ് രോഹിത് 209 റണ്‍സ് അടിച്ചെടുത്തത്. ഇന്ത്യ നിശ്ചിത ഓവറില്‍ ആറു വിക്കറ്റിന് 383 റണ്‍സും അന്നു നേടി. മറുപടിയില്‍ ഓസീസ് 326 റണ്‍സിനു പുറത്താവുകയും ചെയ്തു. ഈ വിജയത്തോടെ ഇന്ത്യ പരമ്പര 3-2നു പോക്കറ്റിലാക്കിയപ്പോള്‍ മാന്‍ ഓഫ് ദി മാച്ചും സീരീസുമായി തിരഞ്ഞെടുക്കപ്പെട്ടത് ഹിറ്റ്മാനായിരുന്നു.

264 റണ്‍സ് (ശ്രീലങ്ക, 2014)

ഓസീസിനെതിരായ ബാറ്റിങ് വിസ്‌ഫോനം കഴിഞ്ഞ് തൊട്ടടുത്ത വര്‍ഷം ആദ്യ ഡബിളിന്റെ വര്‍ഷം കഴിഞ്ഞ് ഒമ്പതാം ദിവസം രോഹിത് തന്റെ രണ്ടാം ഡബിളുമടിച്ചു. ഇത്തവണ എതിരാളികള്‍ ശ്രീലങ്കയായിരുന്നു. കൊല്‍ക്കത്തയില്‍ നടന്ന മല്‍സരത്തിലായിരുന്നു ലോക റെക്കോര്‍ഡ് കുറിച്ച ഹിറ്റ്മാന്റെ സംഹാര താണ്ഡവം.
ഈഡന്‍ഗാര്‍ഡന്‍സില്‍ നടന്ന മല്‍സരത്തില്‍ ടോസിനു ശേഷം ബാറ്റിങ് തിരഞ്ഞെടുത്ത ഇന്ത്യയെ രോഹിത് കൂറ്റന്‍ സ്‌കോറിലെത്തിക്കുകയായിരുന്നു. വെറും 173 പന്തില്‍ 264 റണ്‍സ് ഹിറ്റ്മാന്‍ വാരിക്കൂട്ടി. 33 ബൗണ്ടറികളും ഒമ്പത് സിക്‌സറും ഈ അവിശ്വസനീയ ഇന്നിങ്‌സിലുണ്ടായിരുന്നു. ഇന്നും ഈ ലോക റെക്കോര്‍ഡ് സ്‌കോര്‍ ആര്‍ക്കും എത്തിപ്പിടിക്കാനായിട്ടില്ല.
ഹിറ്റ്മാന്റെ വണ്‍മാന്‍ ഷോ ഇന്ത്യയെ നിശ്ചിത ഓവറില്‍ അഞ്ചു വിക്കറ്റിന് 404 റണ്‍സെന്ന കൂറ്റന്‍ സ്‌കോറിലെത്തിച്ചു. മറുപടിയില്‍ ലങ്ക കേവലം 251 റണ്‍സിനു പുറത്താവുകയും ചെയ്തു.

208* റണ്‍സ് (ശ്രീലങ്ക, 2017)

രോഹിത്തിന്റെ മൂന്നാം ഡബിള്‍ സെഞ്ച്വറി പിറന്നതും ശ്രീലങ്കയ്‌ക്കെതിരേ തന്നെ. അതും ഇന്ത്യയില്‍ തന്നെയായിരുന്നു. മൊഹാലിയില്‍ 2017 ഡിസംബര്‍ 13ന് നടന്ന മല്‍സരത്തിലായിരുന്നു ഹിറ്റ്മാന്‍ ഡബിളില്‍ ഹാട്രിക് തികച്ചത്.
അന്നു പതിയെയായിരുന്നു രോഹിത്തിന്റെ തുടക്കം. സെഞ്ച്വറി തികയ്ക്കാന്‍ അദ്ദേഹത്തിന് 115 പന്തുകള്‍ വേണ്ടി വന്നു. എന്നാല്‍ അതിനു ശേഷം ഹിറ്റ്മാന്‍ ഗിയര്‍ മാറ്റി. വെറും 36 പന്തുകള്‍ മാത്രമേ അടുത്ത 100 ണ്‍സ് പൂര്‍ത്തിയാക്കാന്‍ അദ്ദേഹത്തിനു വേണ്ടി വന്നുള്ളൂ. 13 ബൗണ്ടറികളും 12 സിക്‌സറുമടക്കം 206 റണ്‍സെടുത്ത രോഹിത് പുറത്താവാതെ നില്‍ക്കുകയായിരുന്നു. ഇന്ത്യ നിശ്ചിത ഓവറില്‍ നാലു വിക്കറ്റിന് 392 റണ്‍സെടുത്തപ്പോള്‍ ലങ്കയ്ക്കു എട്ടു വിക്കറ്റിന് 251 റണ്‍സ് നേടാനേ ആയുള്ളൂ.