T20 WC 2026: ധോണിക്കും ഗംഭീറിനുമിടയില്‍ മഞ്ഞുരുകി? 'കോച്ച് സാബ്' എന്ന് വിളിച്ച് ക്യാപ്റ്റന്‍ കൂള്‍

ഇന്ത്യ ഒന്നടങ്കം കാത്തിരുന്ന ആ നിമിഷം അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ ഇന്നലെ രാത്രി പിറന്നു. ന്യൂസിലൻഡിനെ 96 റൺസിന് തകർത്ത് ഇന്ത്യ തങ്ങളുടെ മൂന്നാം ടി20 ലോകകപ്പ് കിരീടം ഉയർത്തിയപ്പോൾ, ആരാധകരുടെ ഹൃദയം കവർന്നത് മുൻ നായകൻ എം.എസ്. ധോണിയുടെ ഇൻസ്റ്റാഗ്രാം പോസ്റ്റാണ്. ഗൗതം ഗംഭീറും ധോണിയും തമ്മിലുള്ള പഴയകാല അസ്വാരസ്യങ്ങൾ ചരിത്രമായെന്ന് വ്യക്തമാക്കുന്നതായിരുന്നു അദ്ദേഹത്തിന്റെ വാക്കുകൾ.

ഗംഭീറിനെക്കുറിച്ച് ധോണി: "ഇന്റൻസിറ്റിയും ചിരിയും കില്ലർ കോംബോ!"

2007-ലെ ലോകകപ്പ് ജേതാവായ ധോണി, നിലവിലെ ഹെഡ് കോച്ച് ഗൗതം ഗംഭീറിനെ 'കോച്ച് സാബ്' എന്ന് സംബോധന ചെയ്താണ് അഭിനന്ദിച്ചത്. "കോച്ച് സാബ്, ആ ചിരി നിങ്ങളിൽ കാണാൻ നല്ല ഭംഗിയുണ്ട്. ഗൗരവവും ചിരിയും ചേർന്നത് ഒരു 'കില്ലർ കോമ്പിനേഷനാണ്'. ടീമിലെ എല്ലാവർക്കും, സപ്പോർട്ട് സ്റ്റാഫിനും, ലോകമെമ്പാടുമുള്ള ഇന്ത്യൻ ആരാധകർക്കും അഭിനന്ദനങ്ങൾ," ധോണി കുറിച്ചു. ഒപ്പം ജസ്പ്രീത് ബുംറയെക്കുറിച്ച് ഒന്നും എഴുതാതിരിക്കുന്നതാണ് നല്ലതെന്നും കാരണം അവൻ ഒരു 'ചാമ്പ്യൻ ബൗളർ' ആണെന്നും ധോണി കൂട്ടിച്ചേർത്തു.

അഹമ്മദാബാദിൽ ബുംറയുടെ 'ബൂം ബൂം' ഷോ!

സഞ്ജു സാംസണിന്റെ വെടിക്കെട്ട് ബാറ്റിംഗിന് (46 പന്തിൽ 89) ശേഷം 256 റൺസ് വിജയലക്ഷ്യവുമായി ഇറങ്ങിയ ന്യൂസിലൻഡിനെ ബുംറ ശരിക്കും വിറപ്പിച്ചു. നാല് ഓവറിൽ വെറും 15 റൺസ് മാത്രം വിട്ടുകൊടുത്ത് 4 വിക്കറ്റുകളാണ് ബുംറ വീഴ്ത്തിയത്. രചിൻ രവീന്ദ്ര, മിച്ചൽ സാന്റ്നർ, ജെയിംസ് നീഷം, മാറ്റ് ഹെൻറി എന്നിവരെ പുറത്താക്കിയ ബുംറ കിവീസിനെ 159 റൺസിൽ ഒതുക്കി. സഞ്ജുവിനെ മറികടന്ന് ബുംറ തന്നെ 'മാൻ ഓഫ് ദി മാച്ച്' പുരസ്കാരവും സ്വന്തമാക്കി.

"സ്വന്തം തട്ടകത്തിൽ ഒരു ലോകകപ്പ് ഫൈനൽ ജയിക്കുക എന്നത് സ്വപ്നതുല്യമാണ്," എന്നായിരുന്നു മത്സരശേഷം ബുംറയുടെ പ്രതികരണം. ഇന്ത്യ ഉയർത്തിയ 255 റൺസ് എന്ന കൂറ്റൻ സ്കോറിന് മുന്നിൽ ചില്ലുകൊട്ടാരം പോലെ കിവീസ് ബാറ്റിംഗ് നിര തകരുകയായിരുന്നു. ടി20 ലോകകപ്പിൽ കിരീടം നിലനിർത്തുന്ന ആദ്യ ടീമെന്ന റെക്കോർഡും ഇതോടെ ഇന്ത്യ സ്വന്തം പേരിൽ കുറിച്ചു.

എന്താണ് ​ഗംഭീർ - ധോണി പോര്?

1. 2011 ലോകകപ്പ് ഫൈനലിലെ ക്രെഡിറ്റ്

2011 ലോകകപ്പ് ഫൈനലിൽ ഇന്ത്യ വിജയിച്ചപ്പോൾ 97 റൺസെടുത്ത ഗൗതം ഗംഭീറായിരുന്നു ടോപ്പ് സ്കോറർ. എന്നാൽ എം.എസ്. ധോണിയുടെ സിക്സറിലൂടെയുള്ള ഫിനിഷിംഗും അദ്ദേഹത്തിന്റെ 91* റൺസുമാണ് കൂടുതൽ ആഘോഷിക്കപ്പെട്ടത്. ഇന്ത്യയുടെ ലോകകപ്പ് വിജയം ഒരാളുടെ മാത്രം നേട്ടമല്ലെന്നും, ധോണിയുടെ ആ ഒരു സിക്സറിലേക്ക് മാത്രം ആ വിജയം ചുരുക്കപ്പെടുന്നത് ശരിയല്ലെന്നും ഗംഭീർ പലപ്പോഴായി തുറന്നു പറഞ്ഞിട്ടുണ്ട്.

2. സെലക്ഷൻ തീരുമാനങ്ങൾ (2012 ഓസ്‌ട്രേലിയൻ പരമ്പര)

2012-ൽ ഓസ്‌ട്രേലിയയിൽ നടന്ന സിബി സീരീസിൽ (CB Series) ധോണി നടപ്പിലാക്കിയ 'റൊട്ടേഷൻ പോളിസി' ഗംഭീറിനെ ചൊടിപ്പിച്ചിരുന്നു. സച്ചിൻ, സെവാഗ്, ഗംഭീർ എന്നീ മുതിർന്ന താരങ്ങളെ ഒരേസമയം കളിപ്പിക്കാൻ സാധിക്കില്ലെന്നും അത് ടീമിന്റെ ഫീൽഡിംഗിനെ ബാധിക്കുമെന്നും ധോണി നിലപാടെടുത്തു. ഇത് ടീമിനുള്ളിൽ അസ്വാരസ്യങ്ങൾ ഉണ്ടാക്കിയതായി അന്ന് റിപ്പോർട്ടുകൾ വന്നിരുന്നു.

3. ഗംഭീറിന്റെ തുറന്നുപറച്ചിലുകൾ

ക്രിക്കറ്റിൽ നിന്ന് വിരമിച്ച ശേഷം ഗംഭീർ പലപ്പോഴും ധോണിയുടെ ക്യാപ്റ്റൻസിയെയും ആരാധകർ ധോണിക്ക് നൽകുന്ന അമിത പ്രാധാന്യത്തെയും വിമർശിച്ചിട്ടുണ്ട്. "ധോണി ഭാഗ്യവാനായ ക്യാപ്റ്റനാണ്" എന്നും, 2011-ലെ വിജയം ടീം വർക്കിന്റെ ഫലമാണെന്നും അദ്ദേഹം ആവർത്തിക്കാറുണ്ട്.