ഇന്ത്യക്കും കണ്ടു പഠിക്കാം.... വിന്‍ഡീസിനെ അടിച്ചൊതുക്കി പാണ്ഡെയും കൂട്ടരും, പരമ്പര നേട്ടം

ഏകപക്ഷീയ വിജയം

മൂന്നാം അനൗദ്യോഗിക ഏകദിനത്തില്‍ ഏകപക്ഷീയമായ വിജയമാണ് ഇന്ത്യന്‍ എ ടീം നേടിയത്. പാണ്ഡെയും സംഘവും വിന്‍ഡീസിനെ അക്ഷരാര്‍ഥത്തില്‍ വാരിക്കളയുകയായിരുന്നു. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ ആറു വിക്കറ്റിന് 295 റണ്‍സാണ് നേടിയത്.
മറുപടിയില്‍ വിന്‍ഡീസ് പൊരുതാന്‍ പോലുമാവാതെ കീഴടങ്ങുകയായിരുന്നു. വെറും 147 റണ്‍സില്‍ വിന്‍ഡീസ് കൂടാരത്തില്‍ തിരിച്ചെത്തി.

പാണ്ഡെ, ഗില്‍, ക്രുനാല്‍...

ഇന്ത്യന്‍ വിജയത്തില്‍ നിര്‍ണായകമായത് മൂന്നു താരങ്ങളുടെ മികച്ച പ്രകടനമായിരുന്നു. ബാറ്റിങില്‍ പാണ്ഡെയോടൊപ്പം യുവതാരം ശുഭ്മാന്‍ ഗില്ലും കസറി. 100 റണ്‍സെടുത്ത പാണ്ഡെയാണ് ഇന്ത്യയെ 300ന് അടുത്ത് സ്‌കോര്‍ ചെയ്യാന്‍ സഹായിച്ചത്.
നാലാമനായി ഇറങ്ങിയ പാണ്ഡെ 87 പന്തില്‍ ആറു ബൗണ്ടറികളും അഞ്ചു സിക്‌സറുമടക്കമാണ് 100 റണ്‍സെടുത്തത്. ഓപ്പണറായ ഗില്‍ 81 പന്തില്‍ എട്ടു ബൗണ്ടറികളോടെ 77 റണ്‍സെടുത്തു.
മറുപടിയില്‍ ക്രുനാലിന്റെ മാസ്മരിക സ്‌പെല്‍ വിന്‍ഡീസിന്റെ കഥ കഴിക്കുകയായിരുന്നു. ഏഴോവറില്‍ 33 റണ്‍സ് വിട്ടുകൊടുത്ത് അഞ്ചു വിക്കറ്റുകളാണ് ക്രുനാല്‍ കൊയ്തത്.

ഇന്ത്യന്‍ ടീം വിന്‍ഡീസിലേക്ക്

ഇന്ത്യയുടെ സീനിയര്‍ ടീം ആഗസ്റ്റിലാണ് വെസ്റ്റ് ഇന്‍ഡീസില്‍ പര്യടനം നടത്തുന്നത്. മൂന്നു വീതം ടി20കളും ഏകദിനങ്ങളും രണ്ടു ടെസ്റ്റുകളുമാണ് ഇന്ത്യ കരീബിയന്‍ മണ്ണില്‍ കളിക്കുന്നത്. ചില സീനിയര്‍ താരങ്ങള്‍ക്കു ഇന്ത്യ പരമ്പരയില്‍ വിശ്രമം നല്‍കിയേക്കുമെന്നാണ് സൂചന. എംഎസ് ധോണി, ജസ്പ്രീത് ബുംറ എന്നിവരൊന്നും പരമ്പരയില്‍ കളിച്ചേക്കില്ല.
വിന്‍ഡീസില്‍ പര്യടനം നടത്തുന്ന ഇന്ത്യന്‍ ടീമിനെ വെള്ളിയാഴ്ച (ജൂലൈ 19) ബിസിസിഐ പ്രഖ്യാപിക്കുമെന്നാണ് വിവരം.