ബെംഗളൂരു: അനില് കുംബ്ലെ കോച്ചായി തിരഞ്ഞെടുക്കപ്പെട്ടപ്പോള് മുന് ടീം ഡയറക്ടര് രവി ശാസ്ത്രി പറഞ്ഞത് ഇന്ത്യയുടെ ബൗളിംഗിന് ഇത് ഗുണം ചെയ്യും എന്നാണ്. ബാറ്റിംഗിലല്ല ബൗളിംഗിലാണ് ഇന്ത്യയുടെ പ്രശ്നങ്ങളെന്നും കുംബ്ലെ പറഞ്ഞു. കോച്ചായി ചുമതലയേറ്റ കുംബ്ലെ ഈ പ്രതീക്ഷകള് വെറുതെയല്ല എന്ന് തോന്നിപ്പിക്കുന്ന പ്രതികരണമാണ് നടത്തിയത്. ഇന്ത്യയുടെ ബൗളിംഗിനെക്കുറിച്ച് കുംബ്ലെയ്ക്ക് ചില ധാരണകളൊക്കെയുണ്ട്.
ക്രിക്കറ്റിലെ ടോപ് ടെന് ചീറ്റിംഗുകള്... പട്ടികയില് ധോണിയും, അവിശ്വസനീയം!
വെസ്റ്റ് ഇന്ഡീസിനെതിരെ നടക്കാനിരിക്കുന്ന ടെസ്റ്റ് പരമ്പരയില് ഇഷാന്ത് ശര്മയായിരിക്കും ഇന്ത്യന് ബൗളിംഗിനെ നയിക്കുക എന്നാണ് അനില് കുംബ്ലെ പറയുന്നത്. അടുത്ത മാസം 4 ടെസ്റ്റുകളാണ് ഇന്ത്യ വെസ്റ്റ് ഇന്ഡീസില് കളിക്കുന്നത്. കഴിഞ്ഞ തവണ ഇന്ത്യ വെസ്റ്റ് ഇന്ഡീസില് പരമ്പര നേടിയപ്പോള് ഇഷാന്ത് ശര്മയായിരുന്നു മാന് ഓഫ് ദ സീരിസ്. ഈ പരിചയം ഇന്ത്യയ്ക്ക് ഗുണം ചെയ്യും. ഇഷാന്തായിരിക്കും ഇത്തവണ ബൗളിംഗ് നയിക്കുക.
2011 ജൂണ് -ജൂലൈ മാസങ്ങളില് നടന്ന പര്യടനത്തിലാണ് ഇന്ത്യ ആതിഥേയരായ വെസ്റ്റ് ഇന്ഡീസിനെ 1- 0 ന് തോല്പിച്ചത്. 16.88 ശരാശരിയില് 22 വിക്കറ്റുകളാണ് ഇഷാന്ത് ഈ പരമ്പരയില് വീഴ്ത്തിയത്. ഇതില് രണ്ടെണ്ണം അഞ്ച് വിക്കറ്റ് നേട്ടങ്ങളായിരുന്നു. ഏറ്റവും കൂടുതല് വിക്കറ്റുകളെടുത്ത ഇഷാന്ത് തന്നെയായിരുന്നു മാന് ഓഫ് ദ സീരിസും. 68 ടെസ്റ്റുകളില് നിന്നായി 201 വിക്കറ്റുകളാണ് ഇന്ത്യയുടെ ഈ നീളക്കാരന് ഫാസ്റ്റ് ബൗളറുടെ പേരിലുള്ളത്.
സംഗക്കാരയുടെ ഓള്ടൈം ബെസ്റ്റ് ടീമില് സച്ചിന് ഇല്ല.. വെറൈറ്റി അല്ലേ?
ഈ ടീമില് ഇഷാന്തിനെക്കൂടാതെ വിരാട് കോലി, മുരളി വിജയ്, അമിത് മിശ്ര എന്നിവര്ക്ക് മാത്രമേ വെസ്റ്റ് ഇന്ഡീസില് കളിച്ച് പരിചയമുളളൂ. 5 ഇന്നിംഗ്സില് 76 റണ്സാണ് വിന്ഡീസില് കോലിയുടെ സമ്പാദ്യം. വിജയും കണക്കാണ്. 6 ഇന്നിംഗ്സില് 71 റണ്സ്. അമിത് മിശ്രയുടെ അക്കൗണ്ടില് 4 വിക്കറ്റുണ്ട്. ഇവര്ക്കൊപ്പം കുംബ്ലെയുടെ പരിചയസമ്പത്ത് കൂടിയാകുമ്പോള് ഇത്തവണയും പരമ്പര ജയം തന്നെയാണ് ഇന്ത്യയുടെ ലക്ഷ്യം.