IPL 2021: എന്തിനാണ് അവന്‍ പ്ലേയിങ് 11ല്‍? കേദാര്‍ ജാദവിനെ വിമര്‍ശിച്ച് ഷോണ്‍ പൊള്ളോക്ക്

'ഡേവിഡ് വാര്‍ണറെ ഹൈദരാബാദ് പുറത്താക്കിയിരുന്നു. പിന്നീട് തിരിച്ചെത്തി. മനീഷ് പാണ്ഡെ രക്ഷാപ്രവര്‍ത്തനത്തിന് ശ്രമമെങ്കിലും നടത്തുന്നുണ്ട്. എന്നാല്‍ കേദാര്‍ ജാദവ് എന്താണ് ചെയ്യുന്നത്. ഈ കാലയളവില്‍ ഭേദപ്പെട്ട പ്രതിഫലം തന്നെ അവന്‍ വാങ്ങുന്നുണ്ട്. അവന്റെ പ്രകടനം കണ്ടിട്ട് വീണ്ടും പ്ലേയിങ് 11ല്‍ അവസരം നല്‍കുന്നതിനെ ന്യായീകരിക്കാന്‍ സാധിക്കുന്നുണ്ടോ എന്നാണ് ഇപ്പോഴും ചോദിക്കുന്നത്. കോച്ചിങ് സ്റ്റാഫുകള്‍ ഒന്നും പറയുന്നില്ല. നിരവധി ചോദ്യങ്ങള്‍ അവര്‍ നേരിടേണ്ടതായി വരും. ബൈലിസ് മികച്ചൊരു പരിശീലകനും വ്യക്തിയുമാണ്. എല്ലാവരും അദ്ദേഹത്തെ ബഹുമാനിക്കുകയും സംസാരിക്കാന്‍ ആഗ്രഹിക്കുകയും ചെയ്യുന്നുണ്ട്'- ഷോണ്‍ പൊള്ളോക്ക് പറഞ്ഞു.

36കാരനായ കേദാര്‍ ജാദവ് 2020ലാണ് ഹൈദരാബാദിലെത്തിയത്. സിഎസ്‌കെയിലെ നിരാശപ്പെടുത്തുന്ന പ്രകടനത്തെത്തുടര്‍ന്ന് അവര്‍ ഒഴിവാക്കിയപ്പോള്‍ കേദാര്‍ ഹൈദരാബാദിലെത്തുകയായിരുന്നു. ആറ് മത്സരങ്ങളില്‍ നിന്ന് 55 റണ്‍സാണ് ഈ സീസണില്‍ കേദാര്‍ നേടിയത്. 105.76 ആണ് സ്‌ട്രൈക്കറേറ്റ്. അതിവേഗം റണ്‍സുയര്‍ത്താനോ ടീമിന്റെ പ്രതീക്ഷക്കൊത്ത് ഉയരാനോ കേദാറിന് ആവുന്നില്ല. എന്നിട്ടും വീണ്ടും വീണ്ടും ടീം താരത്തില്‍ പ്രതീക്ഷവെക്കുന്നു.

ഐപിഎല്ലില്‍ മികച്ച റെക്കോഡുള്ള ഹൈദരാബാദിന്റെ ഈ സീസണിലെ പ്രകടനം തീര്‍ത്തും നിരാശയുണ്ടാക്കുന്നതാണെന്നും പൊള്ളോക്ക് പറഞ്ഞു. 'ഹൈദരാബാദിന്റെ താരങ്ങളെ നോക്കുക. റാഷിദ് ഖാന്‍, എംവിപി താരമാണവന്‍. ലോകത്തിലെ മികച്ച ടി20 താരങ്ങളിലൊരാളാണവന്‍. കെയ്ന്‍ വില്യംസണ്‍,ഡേവിഡ് വാര്‍ണര്‍ എന്നീ സൂപ്പര്‍ താരങ്ങളെ നോക്കുക. 2016ലെ ചാമ്പ്യന്മാരാണ് ഹൈദരാബാദ്. ഇക്കഴിഞ്ഞ വര്‍ഷങ്ങളിലെല്ലാം അവിശ്വസിനീയമായ പല പ്രകടനങ്ങളും അവര്‍ നടത്തിയിട്ടുണ്ട്. പരിശീലക സംഘം മാനസികമായി തളരുന്നതാണ് താരങ്ങളെയും ബാധിക്കുന്നത്. ഈ സത്യത്തില്‍ നിന്ന് ഒളിച്ചോടാനാവില്ല'- ഷോണ്‍ പൊള്ളോക്ക് കൂട്ടിച്ചേര്‍ത്തു.

രണ്ടാം പാദത്തില്‍ തുടര്‍ച്ചയായ രണ്ടാം തോല്‍വി ഏറ്റുവാങ്ങിയതോടെ ഹൈദരാബാദിന്റെ പ്ലേ ഓഫ് സാധ്യതകള്‍ ഏറെക്കുറെ അവസാനിച്ചുവെന്ന് പറയാം. യുഎഇയില്‍ തുടര്‍ച്ചയായ എട്ടാം തോല്‍വിയാണ് ഹൈദരാബാദ് വഴങ്ങിയിരിക്കുന്നത്. ഒമ്പത് മത്സരത്തില്‍ നിന്ന് രണ്ട് പോയിന്റ് മാത്രമുള്ള ഹൈദരാബാദ് അവസാന സ്ഥാനത്താണ്. അതിനാല്‍ത്തന്നെ ഇനി പ്ലേ ഓഫില്‍ ഇടം പിടിക്കുക പ്രയാസം തന്നെയാണ്. ബൗളര്‍മാര്‍ ശ്രദ്ധേയ പ്രകടനം നടത്തുമ്പോഴും ബാറ്റിങ് നിര അവസരത്തിനൊത്ത് ഉയരാത്തതാണ് ഹൈദരാബാദിന്റെ പ്രശ്‌നം. ഇതിന് പരിഹാരം കാണുക എളുപ്പവുമല്ല.