ഓരോരുത്തര്ക്കും വ്യത്യസ്തമായ ക്യാപ്റ്റന്സി ശൈലിയായിരിക്കും. വിരാട് കോലി വളരെ അഗ്രസീവായ നായകനാണ്. എന്നാല് രോഹിത്തും ധോണിയും ഒരുപോലെയാണ്, കളിക്കളത്തില് ഇരുവരും വളരെ കൂളായിരിക്കുമെന്ന് ചഹര് പറഞ്ഞു. ധോണിക്കും രോഹിത്തിനും അത്ര പെട്ടെന്നൊന്നും കോപം വരില്ല. ടീമിലെ ഓരോ താരത്തില് നിന്നും മികച്ച പ്രകടനം കൊണ്ടുവരാന് ശ്രമിക്കുന്നവരാണ് ഇരുവരുമെന്നും ചഹര് വിശദമാക്കി.
ടീമിന്റെ വിക്കറ്റ് കീപ്പര് കൂടി ആയതിനാല് തന്നെ ധോണി ഓവറിനിടെ പോലും ഇടയ്ക്കിടെ വന്ന് ഉപദേശങ്ങള് നല്കിക്കൊണ്ടിരിക്കും. രോഹിത് പലപ്പോഴും മിഡ് ഓഫിലാണ് ഫീല്ഡ് ചെയ്യാറുള്ളത്. ബൗളര്മാരെ വിശ്വസിക്കുന്ന ക്യാപ്റ്റനാണ് അദ്ദേഹം. സ്വന്തം ഫീല്ഡിങ് സെറ്റപ്പുമായി മുന്നോട്ട് പോവാന് രോഹിത് ചിലപ്പോള് സമ്മതിക്കാറുണ്ട്.
മറുഭാഗത്ത് ഓരോ ബാറ്റ്സ്മാന്റെയും കരുത്തും ദൗര്ബല്യവും എവിടെയാണെന്നു ധോണിക്കറിയാം. ഇത് കണക്കിലെടുത്താണ് ഫീല്ഡിങ് ക്രമീകരണം നടത്താറുള്ളത്. അദ്ദേഹത്തിന്റെ അനുഭവസമ്പത്താണ് ഇതിനു കാരണമെന്നും ചഹര് ചൂണ്ടിക്കാട്ടി.
ധോണിയും രോഹിത്തും തമ്മില് സാമ്യങ്ങള് മാത്രമല്ല ചില വ്യത്യാസങ്ങള് കൂടിയുണ്ടെന്നു ചഹര് അഭിപ്രായപ്പെട്ടു. ഇരുവര്ക്കു കീഴിലും ആസ്വദിച്ചാണ് കളിക്കാറുള്ളത്. തന്നില് ഏറെ വിശ്വാസമര്പ്പിച്ച ക്യാപ്റ്റനാണ് രോഹിത്. എന്നാല് കരിയറില് കൂടുതല് കടപ്പെട്ടിരിക്കുന്നത് മഹി ഭായിയോടാണ്. വലിയ വിശ്വാസമാണ് അദ്ദേഹം തന്നിലര്പ്പിച്ചത്.
ടി20യില് ധോണിയും രോഹിത്തും തമ്മില് ചില വ്യത്യാസങ്ങളുണ്ട്. ടീം സെലക്ഷക്ഷനിലേക്കു വന്നാല് പ്ലെയിങ് ഇലവനില് വളരെ കുറച്ചു മാറ്റങ്ങള് മാത്രമേ മഹി ഭായ് വരുത്തൂ. ഒരു വിജയഫോര്മുല കണ്ടെത്തിയാല് അത് തുടര്ന്നു കൊണ്ടുപോവാനാണ് അദ്ദേഹം ശ്രമിക്കുക.
എന്നാല് രോഹിത് ഭായിക്ക് മാറ്റങ്ങള് വരുത്താന് ഇഷ്ടമാണ്. ചിലപ്പോള് ആറോവര് പവര്പ്ലേയില് ആറു ബൗളര്മാരെ അദ്ദേഹം പരീക്ഷിച്ചേക്കും. എതിര് ബാറ്റ്സ്മാന് നിലയുറപ്പിക്കാന് അനുവദിക്കാതിരിക്കാന് വേണ്ടിയാണിത്. ഇതാണ് ധോണിയും രോഹിത്തും തമ്മിലുള്ള വ്യത്യാസമെന്നും ചഹര് വിശദമാക്കി.