Click it and Unblock the Notifications
ജെയിംസിന്റെ കുട്ടികള്‍
പ്രഥമ സീസണിലെ താരവും കോച്ചുമായിരുന്ന ഡേവിഡ് ജെയിംസിന് കീഴില്‍ ബ്ലാസ്റ്റേഴ്സിന്റെ മൂന്നാം സീസണാണിത്. കഴിഞ്ഞ സീസണിന്റെ പകുതിയില്‍ വച്ചാണ് ജെയിംസിനെ തിരിച്ചുവിളിക്കാന്‍ ടീം മാനേജ്‌മെന്റ് നിര്‍ബന്ധിതരാവുന്നത്. ടീമിന്റെ ദയനീയ പ്രകടനത്തെ തുടര്‍ന്ന് റെനെ മ്യുളെന്‍സ്റ്റീനിനെ ഒഴിവാക്കിയതോടെയാണ് പകരക്കാരനായി ജെയിംസ് തിരിച്ചെത്തിയത്.
ഈ സീസണില്‍ ടീമിനെ തയ്യാറാക്കാന്‍ കൂടുതല്‍ സമയം ലഭിച്ചതിനാല്‍ ജെയിംസ് ഏറെ ആത്മവിശ്വാസത്തിലാണ്. യുവത്വത്തിനു മുന്‍തൂക്കം നല്‍കിയുള്ള ടീമാണ് ഇത്തവണ ബ്ലാസ്റ്റേഴ്‌സിന്റേത്. 24ന് അടുത്താണ് ടീമിന്റെ ശരാശരി പ്രായം.
ഹോംഗ്രൗണ്ട്- ജവഹര്‍ലാല്‍ നെഹ്‌റു സ്‌റ്റേഡിയം, കൊച്ചി
മുന്‍ സീസണുകള്‍
2014-15 റണ്ണറപ്പ്
2015-16 എട്ടാംസ്ഥാനം
2016-17 റണ്ണറപ്പ്
2017-18 ആറാംസ്ഥാനം
ഇതുവരെ കളിച്ച മല്‍സരങ്ങള്‍ 66
ജയം 23
സമനില 19
തോല്‍വി 24
ടീമിനെ അടുത്തറിയാം
ഗോള്‍കീപ്പര്‍മാര്‍
ധീരജ് സിങ്, നവീന്‍ കുമാര്‍, സുജിത് ശശികുമാര്‍
അണ്ടര്‍ 17 ലോകകപ്പില്‍ ഇന്ത്യയുടെ ഹീറോയായ ധീരജ് സിങ് ഈ സീസണിലാണ് ബ്ലാസ്‌റ്റേഴ്‌സിനൊപ്പം ചേര്‍ന്നത്. കഴിഞ്ഞ സീസണില്‍ എഫ്സി ഗോവയുടെ ഗോള്‍കീപ്പറായിരുന്ന നവീന്‍ കുമാറിനും ഇത് ആദ്യ ഊഴമാണ്. മലയാളി താരമാണ് മൂന്നാമനായ സുജിത്ത്.
ഡിഫന്‍ഡര്‍മാര്‍
അനസ് എടത്തൊടിക, സന്ദേഷ് ജിങ്കന്‍, ലാല്‍റുവാത്താര, മുഹമ്മദ് റാക്കിപ്, പ്രീതം സിങ് (എല്ലാം ഇന്ത്യന്‍താരങ്ങള്‍), സിറില്‍ കാളി (ഫ്രാന്‍സ്), നെമഞ്ജ ലാക്കിച്ച് പെസിച്ച് (സെര്‍ബിയ)
ജംഷഡ്പൂര്‍ എഫ്‌സിയില്‍ നിന്നാണ് ഇന്ത്യന്‍ പ്രതിരോധഭടനും മലയാളിയുമായ അനസിനെ ബ്ലാസ്റ്റേഴ്സ് സ്വന്തമാക്കിയത്. അനസിനൊപ്പം ജിങ്കന്‍, ലാല്‍റുവാത്താര, പെസിച്ച് എന്നിവര്‍ കൂടി ചേരുന്നതോടെ പ്രതിരോധം കരുത്തുറ്റതാവും. പ്രീ സീസണില്‍ ബ്ലാസ്റ്റേഴ്‌സിനായി മിന്നുന്ന പ്രകടനമാണണ് സിറില്‍ കാഴ്ചവച്ചത്.
ശക്തമായ മധ്യനിരയും മുന്നേറ്റനിരയും
മിഡ്ഫീല്‍ഡര്‍മാര്‍
കറേജ് പെക്ക്യൂസന്‍ (ഘാന), കെസിറോണ്‍ കിസീത്തോ (ഉഗാണ്ട), നിക്കോള ക്രമാറെവിച്ച് (സെര്‍ബിയ), ദീപേന്ദ്ര നേഗി, ഹാളിചരണ്‍ നര്‍സറെ, റിഷി ദത്ത്, ലോക്കെന്‍ മീട്ടെ, കെ പ്രശാന്ത്, സഹല്‍ അബ്ദുള്‍ സമദ്, സെമിന്‍ലെല്‍ ഡൊംഗെല്‍, സുരാജ് റാവത്ത്, സക്കീര്‍ (എല്ലാം ഇന്ത്യന്‍ താരങ്ങള്‍)
കഴിഞ്ഞ സീസണില്‍ മികച്ച പ്രകടനം നടത്തിയവരാണ് മലയാളി താരം പ്രശാന്തും പെക്ക്യൂസന്‍, കിസിത്തോ, നേഗി എന്നിവരും. സെര്‍ബിയക്കു വേണ്ടി അണ്ടര്‍ 19, 21 ടീമുകളില്‍ കളിച്ചിട്ടുള്ള താരമാണ് പുതുതായെത്തിയ ഡിഫന്‍സീവ് മിഡ്ഫീല്‍ഡര്‍ ക്രമാറെവിച്ച്.
സ്‌ട്രൈക്കര്‍മാര്‍
സികെ വിനീത് (ഇന്ത്യ), മത്തെയ് പോപ്ലാറ്റ്‌നിക്ക് (സ്ലൊവേനിയ), സ്ലാവിസ്ല സ്റ്റൊയാനോവിച്ച് (സെര്‍ബിയ)
മലയാളികള്‍ക്കു പ്രിയങ്കരനായ ഹ്യൂമേട്ടന്റെ അസാന്നിധ്യത്തില്‍ ഇത്തവണ ബ്ലാസ്റ്റേഴ്സിന്റെ കുന്തമുന മലയാളി താരം വിനീതായിരിക്കും. താരത്തില്‍ നിന്നും കൂടുതല്‍ ഗോളുകള്‍ ടീം പ്രതീക്ഷിക്കുന്നുണ്ട്.
ടീം വിട്ട ബെര്‍ബറ്റോവ്, ഹ്യൂം എന്നിവരുടെ പകരക്കാരായാണ് പോപ്ലാറ്റ്‌നിക്ക്, സ്റ്റൊയാനോവിച്ച് എന്നിവര്‍ എത്തിയിരിക്കുന്നത്. മികച്ച ഗോള്‍ സ്‌കോറിങ് റെക്കോഡുള്ള താരങ്ങളാണ് ഇരുവരും.
