തകര്പ്പന് തിരിച്ചുവരവ്
തുടര്ച്ചയായി രണ്ടു മല്സരങ്ങളില് പരാജയപ്പട്ട ശേഷം തകര്പ്പന് തിരിച്ചുവരവാണ് കഴിഞ്ഞ കളിയില് കൊല്ക്കത്ത നടത്തിയത്. കിങ്സ് ഇലവന് പഞ്ചാബിനെ 31 റണ്സിന് കെകെആര് കെട്ടുകെട്ടിക്കുകയായിരുന്നു. ഈ സീസണിലെ ഏറ്റവുമുയര്ന്ന സ്കോറായ ആറു വിക്കറ്റിന് 245 റണ്സ് മല്സരത്തില് കെകെആര് പടുത്തുയര്ത്തി. മറുപടിയില് പഞ്ചാബ് ഒന്നു പൊരുതി നോക്കിയെങ്കിലും എട്ടു വിക്കറ്റിനു 214 റണ്സ് നേടാനേ കഴിഞ്ഞുള്ളൂ.
പ്ഞ്ചാബിനെതിരായ ജയം നല്കിയ ആത്മവിശ്വാസത്തിലാണ് ഹോംഗ്രൗണ്ടായ ഈഡന് ഗാര്ഡനിലേക്കു രാജസ്ഥാനെ കെകെആര് ക്ഷണിക്കുന്നത്.
ബട്ലറുടെ ഫോം
ഒരു ഘട്ടത്തില് പ്ലേഓഫ് കാണാതെ പുറത്താവുമെന്നു കരുതിയ രാജസ്ഥാന്റെ രാജകീയ തിരിച്ചുവരവിന് ചുക്കാന് പിടിച്ചത് ഓപ്പണറും ഇംഗ്ലണ്ടിന്റെ വെടിക്കെട്ട് താരവുമായ ജോസ് ബട്ലറാണ്. അവസാന മൂന്നു കളികളില് 82, 95*, 94* എന്നിങ്ങനെയായിരുന്നു ബട്ലറുടെ പ്രകടനം. ഈ മല്സരങ്ങളിലെല്ലാം രാജസ്ഥാന് ജയിക്കുകയും ചെയ്തിരുന്നു.
നേരത്തേ ബാറ്റിങില് മധ്യനിരയില് പരീക്ഷിക്കപ്പെട്ടിരുന്ന ബട്ലറെ ഓപ്പണിങ് റോളിലേക്കു മാറ്റിയതോടെ രാജസ്ഥാന്റെ ഭാവി തന്നെ മാറ്റിമറിക്കുകയായിരുന്നു. ടീമിനു മികച്ച തുടക്കം നല്കുക മാത്രമല്ല ഇന്നിങ്സിന്റെ അവസാനം വരെ ക്രീസില് നില്ക്കാനും ബട്ലര്ക്കാവുന്നുണ്ട്.
കൊല്ക്കത്ത ആത്മവിശ്വാസത്തില്
പഞ്ചാബിനെതിരായ ജയം കൊല്ക്കത്തയുടെ ആത്മവിശ്വാസം കുറച്ചൊന്നുമല്ല വര്ധിപ്പിച്ചത്. ഈ സീസണില് രാജസ്ഥാനെ അവരുടെ മൈതാനത്ത് തകര്ത്തുവിടാന് കഴിഞ്ഞതും കൊല്ക്കത്ത ക്യാപ്റ്റന് ദിനേഷ് കാര്ത്തികിനെ സ്വപ്നം കാണാന് പ്രേരിപ്പിക്കുന്നുണ്ട്.
മുന്നിരയില് പതിവുപോലെ സുനില് നരെയ്നും ക്രിസ് ലിന്നും മികച്ച തുടക്കം നല്കാനായാല് വന് സ്കോര് പടുത്തുയര്ത്താന് കെകെആറിനു ബുദ്ധിമുട്ടുണ്ടാവില്ല.
ജോഫ്ര ആര്ച്ചര് ഉജ്ജ്വലമായി പന്തെറിയുന്നതിവാല് ജയദേവ് ഉനാട്കട്ട്, ധവാല് കുല്ക്കര്ണി എന്നിവര്ക്കെതിരേ പരമാവധി റണ്സ് നേടാനായിരിക്കും കൊല്ക്കത്ത ബാറ്റിങ് നിരയുടെ ശ്രമം.
കണക്കുകള് രാജസ്ഥാനൊപ്പം
ഐപിഎല്ലിലെ ഇതുവരെയുള്ള കണക്കുകള് പരിശോധിച്ചാല് കൊല്ക്കത്തയ്ക്കെതിരേ രാജസ്ഥാനാണ് നേരിയ മുന്തൂക്കം. 16 മല്സരങ്ങളില് ഇരുടീമും കൊമ്പുകോര്ത്തപ്പോള് ഒമ്പതിലും ജയം രാജസ്ഥാനായിരുന്നു. ഏഴു മല്സരങ്ങളില് കൊല്ക്കത്തയും ജയിച്ചു കയറി.
എന്നാല് ഈഡന് ഗാര്ഡന്സില് രാജസ്ഥാനെതിരേ കൊല്ക്കത്തയ്ക്കാണ് മേല്ക്കൈ. അഞ്ചു മല്സരങ്ങളില് മൂന്നിലും കെകെആറിനായിരുന്നു വിജയം.