'ഈ പിച്ച് വേണ്ടെന്ന് അന്നേ പറഞ്ഞതാണ്'; ചെന്നൈ പിച്ചിനെതിരെ ആഞ്ഞടിച്ച് ധോണി

ഈ പിച്ചില്‍ കളിവേണ്ട

ഇത്തരമൊരു പിച്ചില്‍ കളിക്കാന്‍ തങ്ങള്‍ ആഗ്രഹിക്കുന്നില്ലെന്ന് ധോണി പറഞ്ഞു. ഇത് കുറഞ്ഞ ടോട്ടല്‍ മാത്രമേ നല്‍കുന്നുള്ളൂ. ഈ പിച്ചില്‍ തങ്ങളുടെ ബാറ്റ്‌സ്മാന്മാര്‍ പോലും ബുദ്ധിമുട്ടുന്നു. കുറഞ്ഞ ടോട്ടലായതുകൊണ്ടാണ് ജയം എളുപ്പമായതെന്നും ധോണി വ്യക്തമാക്കി. നേരത്തെ ഉദ്ഘാടന മത്സരത്തിനുശേഷം വിരാട് കോലിയും ഇതേ അഭിപ്രായം പ്രകടിപ്പിച്ചിരുന്നു.

താഹിറും ഹര്‍ഭജനും

വെറ്ററന്‍ സ്പിന്നര്‍മാരായ ഇമ്രാന്‍ താഹിറും ഹര്‍ഭജന്‍ സിങ്ങും മികച്ച ബൗളിങ് നടത്തുന്നത് പിച്ചിന്റെ സ്വഭാവം കൊണ്ടുകൂടിയാണ്. രണ്ട് ബൗളര്‍മാരെയും കളിക്കാന്‍ എതിര്‍ ബാറ്റ്‌സ്മാന്മാര്‍ക്ക് കഴിയുന്നില്ല. പേസര്‍മാര്‍ക്കും പിച്ചില്‍നിന്നും അപ്രതീക്ഷിത ബൗണ്‍സ് ലഭിച്ചതോടെ മത്സരം വിരസമായി. വമ്പനടിക്കാരന്‍ റസ്സലിനുപോലും സ്‌ട്രൈക്ക് വര്‍ധിപ്പിക്കാന്‍ കഴിഞ്ഞില്ല.

ചെന്നൈക്ക് വിജയം

മത്സരത്തില്‍ മുന്‍ ജേതാക്കളായ കൊല്‍ക്കത്ത നൈറ്റ്റൈഡേഴ്സിനെ ഏഴു വിക്കറ്റിനാണ് സിഎസ്‌കെ തോല്‍പ്പിച്ചത്. ആദ്യം ബാറ്റ് ചെയ്ത കെകെആര്‍ 108 റണ്‍സിലൊതുക്കിയപ്പോള്‍ തന്നെ ചെന്നൈ ജയമുറപ്പിച്ചിരുന്നു. 17.2 ഓവറില്‍ മൂന്നു വിക്കറ്റിന് ചെന്നൈ ലക്ഷ്യം മറികടക്കുകയും ചെയ്തു. ഫാഫ് ഡു പ്ലെസി (43*), അമ്പാട്ടി റായുഡു (21) എന്നിവരാണ് സിഎസ്‌കെയുടെ പ്രധാന സ്‌കോറര്‍മാര്‍. ഈ വിജയത്തോടെ കെകെആറിനെ പിന്തള്ളി ചെന്നൈ പോയിന്റ് പട്ടികയില്‍ തലപ്പത്തേക്കു കയറുകയും ചെയ്തു.