സഞ്ജു സാംസണ്
ക്യാപ്റ്റന് സഞ്ജു സാംസണ് തന്നെയാണ് സീസണില് രാജസ്ഥാന് റോല്സിന്റെ മികച്ച താരമെന്നു നിസംശംയം പറയാം. സീസണില് ടീമിനു വേണ്ടി ഏറ്റവുമധികം റണ്സ് അടിച്ചെടുത്തത് അദ്ദേഹമായിരുന്നു. 14 മല്സരങ്ങളില് നിന്നും 484 റണ്സാണ് സഞ്ജു നേടിയത്. അദ്ദേഹത്തിന്റെ ഐപിഎല് കരിയറിലെ ഏറ്റവും മികച്ച പ്രകടനവും ഇതു തന്നെയാണ്. ഒരു സെഞ്ച്വറിയും രണ്ടു ഫിഫ്റ്റി പ്ലസ് സ്കോറുമടക്കമാണ് സഞ്ജു 500ന് അടുത്ത് വാരിക്കൂട്ടിയത്.
പഞ്ചാബ് കിങ്സിനെതിരായ സീസണിലെ ആദ്യ കളിയിലായിരുന്നു അദ്ദേഹത്തിന്റെ ഉജ്ജ്വല സെഞ്ച്വറി. 119 റണ്സായിരുന്നു താരം നേടിയത്. 63 ബോളില് 12 ബൗണ്ടറികളും ഏഴു സിക്സറുമടക്കമായിരുന്നു ഇത്. പക്ഷെ മല്സരത്തില് അവസാന ബോളില് റോയല്സ് നാലു റണ്സിനു തോല്ക്കുകയായിരുന്നു.
എവിന് ലൂയിസ്
സീസണിന്റെ രണ്ടാംപകുതിയില് മാത്രം രാജസ്ഥാന് റോയല്സ് ടീമിലെത്തിയ താരമാണ് വെസ്റ്റ് ഇന്ഡീസ് ബാറ്റ്സ്മാന് എവിന് ലൂയിസ്. പകരക്കാരനായാണ് യുഎഇയിലെ രണ്ടാംപാദത്തില് ലൂയിസ് റോയല്സിന്റെ ഭാഗമായത്. കളിച്ച മല്സരങ്ങളില് ഇംപാക്ടുണ്ടാക്കാന് ഓപ്പണര് കൂടിയായ അദ്ദേഹത്തിനു സാധിക്കുകയും ചെയ്തു.
ജോസ് ബട്ലര്ക്കു പകരമാണ് ലൂയിസിനെ റോയല്സ് ടീമിലേക്കു കൊണ്ടുവന്നത്. തകര്പ്പന് പ്രകടനത്തിലൂടെ താരം ടീം മാനേജ്മെന്റിന്റെ പ്രതീക്ഷ കാക്കുകയും ചെയ്തു. അഞ്ചു മല്സരങ്ങളില് നിന്നും 30.20 ശരാശരിയില് 162.36 സ്ട്രൈക്ക് റേറ്റോടെ 151 റണ്സാണ് ലൂയിസ് നേടിയത്. ഒരു ഫിഫ്റ്റിയുള്പ്പെടെയായിരുന്നു ഇത്. 58 റണ്സാണ് ഉയര്ന്ന സ്കോര്. ആദ്യപാദത്തില് ലൂയിസ് റോയല്സ് ടീമിലുണ്ടായിരുന്നെങ്കില് ഒരുപക്ഷെ അവരുടെ വിധി മറ്റൊന്നാവുമായിരുന്നു.
ചേതന് സക്കരിയ
യുവ ഇന്ത്യന് ഫാസ്റ്റ് ബൗളര് ചേതന് സക്കരിയ ഈ സീസണിലെ കണ്ടെത്തലുകളിലൊരാളായി മാറിയ താരമാണ്. സക്കരിയയുടെ കന്നി ഐപിഎല് സീസണ് കൂടിയായിരുന്നു ഇത്. സര്പ്രൈസ് പ്രകടനക്കിലൂടെ അദ്ദേഹം റോയല്സ് ടീമിലെ സ്ഥിരം സാന്നിധ്യമായി മാറുകയും ചെയ്തു. പഞ്ചാബ് കിങ്സിനെതിരായ ആദ്യ കളിയില് മൂന്നു വിക്കറ്റ് പ്രകടനത്തോടൊണ് ഇടംകൈയന് ബൗളറായ സക്കരിയ വരവറിയിച്ചത്. പിന്നീട് ചെന്നൈ സൂപ്പര് കിങ്സിനെതിരായ കളിയില് ക്യാപ്റ്റന് എംഎസ് ധോണി, സുരേഷ് റെയ്ന എന്നവരുടെ വിക്കറ്റുകളെടുത്ത് സക്കരിയ വീണ്ടും അദ്ഭുതപ്പെടുത്തി. 14 മല്സരങ്ങളില് നിന്നും 14 വിക്കറ്റുകളാണ് പേസര് വീഴ്ത്തിയത്. 31 റണ്സിന് മൂന്നു വിക്കറ്റുകളെടുത്തതാണ് മികച്ച പ്രകടനം. ഐപിഎല്ലിലെ മികച്ച പ്രകടനം ഇന്ത്യന് ടീമിലേക്കും സക്കരിയക്കു വഴി തുറന്നിരുന്നു. ശ്രീലങ്കന് പര്യടനത്തിലായിരുന്നു താരത്തിന്റെ അരങ്ങേറ്റം.