Click it and Unblock the Notifications
ചെന്നൈ സൂപ്പര്‍ കിങ്‌സ്
പത്തുവര്‍ഷം ഐപിഎല്ലില്‍ കളിച്ച ചെന്നൈയുടെ എട്ടാം ഫൈനലാണിത്. മൂന്നുതവണ അവര്‍ ചാമ്പ്യന്മാരായി. രണ്ടുതവണ ഫൈനലില്‍ മുംബൈയില്‍ നിന്നാണ് തോല്‍വി ഏറ്റുവാങ്ങിയത്. ഇത്തവണ മൂന്നു കളികളില്‍ ഏറ്റുമുട്ടിയപ്പോഴും ജയം മുംബൈയ്‌ക്കൊപ്പമായിരുന്നു. ചെന്നൈയുടെയുടെ കരുത്ത് ബൗളിങ്ങിലാണ്. ബാറ്റിങ് ഡിപ്പാര്‍ട്ട്‌മെന്റ് സ്ഥിരതയില്ലാത്ത പ്രകടനം നടത്തുന്നത് തിരിച്ചടിയാണെങ്കിലും അവസാന മത്സരത്തില്‍ ഓപ്പണര്‍മാര്‍ ഫോമിലേക്ക് തിരിച്ചെത്തിയത് ആശ്വാസകരമാണ്.
മുംബൈ ഇന്ത്യന്‍സ്
ചെന്നൈയ്‌ക്കെതിരെ ഫൈനലില്‍ മേധാവിത്വം കാട്ടാന്‍ കഴിഞ്ഞത് മുംബൈയ്ക്ക് ആത്മവിശ്വാസമേകും. സീസണിലെ മൂന്നു മത്സരങ്ങളിലും ജയം തങ്ങള്‍ക്കൊപ്പമാണെന്നതും മുംബൈയ്ക്ക് അനുകൂല ഘടകമാണ്. ബാറ്റിങ്ങില്‍ ക്യാപ്റ്റന്‍ രോഹിത് ശര്‍മ ഉള്‍പ്പെടെയുള്ളവര്‍ സ്ഥിരത കാട്ടുന്നില്ല. അതേസമയം, ജസ്പ്രീത് ബുംറ നയിക്കുന്ന ബൗളിങ് കരുത്തില്‍ ചെന്നൈയെ തളയ്ക്കാന്‍ കഴിയുമെന്നാണ് ടീമിന്റെ പ്രതീക്ഷ.
ചെന്നൈ ടീം
ഫൈനല്‍ മത്സരമായതുകൊണ്ടുതന്നെ ടീമില്‍ വലിയ അഴിച്ചുപണിക്ക് ചെന്നൈ തയ്യാറാകില്ല. പ്ലേ ഓഫിലെ അതേ ടീമിനെ ഫൈനലിലും അണിനിരത്തും. രവീന്ദ്ര ജഡേജ, ഇമ്രാന്‍ താഹിര്‍, ഹര്‍ഭജന്‍ സിങ് എന്നീ സ്പിന്നര്‍മാര്‍ തകര്‍പ്പന്‍ ഫോമിലാണ്. ദീപക് ചഹാറും മികച്ച പ്രകടനം കാഴ്ചവെക്കുന്നു. ബാറ്റിങ്ങില്‍ ധോണിയുടെ ഫോമും പ്രതീക്ഷയ്ക്ക് വകയുണ്ട്. ഫാഫ് ഡു പ്ലസിസ്, ഷെയ്ന്‍ വാട്‌സണ്‍, സുരേഷ് റെയ്‌ന എന്നിവരും തിളങ്ങിയാല്‍ ചെന്നൈ ജയിച്ചുകയറും.
മുംബൈ ടീം
കാര്യമായ മാറ്റങ്ങള്‍ക്ക് മുംബൈയും തയ്യാറായേക്കില്ലെന്നാണ് സൂചന. ജയന്ത് യാദവിന് പകരം മിച്ചല്‍ മക്ലനാഘനെ മുംബൈ ടീമില്‍ ഉള്‍പ്പെടുത്തിയേക്കും. ഫോമിലല്ലെങ്കിലും കീറോണ്‍ പൊള്ളാര്‍ഡിനും ടീമില്‍ ഇടംകിട്ടും. ഹാര്‍ദിക് പാണ്ഡ്യയുടെ ഓള്‍റൗണ്ട് പ്രകടനവും ബുംറയും മലിംഗയും നയിക്കുന്ന ബൗളിങ്ങും രോഹിത് ശര്‍മയുടെ നേതൃത്വത്തിലുള്ള ബാറ്റിങ്ങും മുംബൈയ്ക്ക് ഒരിക്കല്‍ക്കൂടി തുണയാകുമെന്നാണ് പ്രതീക്ഷ.
ഇരു ടീമുകളും ഏറ്റുമുട്ടിയപ്പോള്‍
ഇരു ടീമുകളും ഇതുവരെ 27 തവണ നേര്‍ക്കുനേര്‍ ഏറ്റുമുട്ടിയപ്പോള്‍ മുംബൈക്ക് 16 ഉം ചെന്നൈക്ക് 11 ഉം ജയം വീതമാണുള്ളത്. 3 വട്ടം ഫൈനലില്‍ ഏറ്റുമുട്ടിയപ്പോള്‍ 2 തവണയും മുംബൈയ്ക്കായിരുന്നു വിജയം. ഇക്കുറിയും മുംബൈ ജയിക്കുമെന്നാണ് പ്രവചനം. ആരു ജയിച്ചാലും നാലുവട്ടം ചാമ്പ്യന്മാരാകുന്ന ആദ്യ ടീമെന്ന നേട്ടവും 20 കോടി രൂപ സമ്മാനത്തുകയും വിജയിയെ തേടിയെത്തും.
