ജീവന്മരണപ്പോരില് റോയലാവാന് രാജസ്ഥാനും ബാംഗ്ലൂരും
ഡൂ ഓര് ഡൈ പോരാട്ടത്തില് ആര് റോയലാവുമെന്ന് അറിയാന് ഇനി ഏതാനും മണിക്കൂറുകള് മാത്രം ബാക്കി. ഇന്ത്യന് ക്യാപ്റ്റന് കോഹ്ലി നയിക്കുന്ന ബാംഗ്ലൂരാണോ പുതുമുഖ നായകന് രഹാനെ പടനയിക്കുന്ന രാജസ്ഥാനാണോ വിജയത്തോടെ റോയലാവുക എന്ന് ഉറ്റുനോക്കുകയാണ് ഐപിഎല് ആരാധകര്. ഹോംഗ്രൗണ്ടിലാണെങ്കിലും ഹാട്രിക്ക് വിജയവുമായെത്തുന്ന ബാംഗ്ലൂരിനെ പിടിച്ചുകെട്ടുകായെന്നത് രാജസ്ഥാന് വെല്ലുവിളിയാവും. നേരത്തെ, സീസണില് ഇരു ടീമും ആദ്യം നേര്ക്കുനേര് വന്നപ്പോള് ബാംഗ്ലൂരിനെ അവരുടെ തട്ടകത്തില് വച്ച് തോല്പ്പിക്കാന് രാജസ്ഥാന് സാധിച്ചിരുന്നു. മലയാളി താരം സഞ്ജു സാംസണ് മിന്നിയ മല്സരത്തില് 19 റണ്സിനായിരുന്നു രാജസ്ഥാന്റെ വിജയം. ബൗളര്മാര് റണ്സ് വഴങ്ങുന്നതാണ് കോഹ്ലിപ്പടയുടെ പ്രധാന തലവേദന. എന്നാല്, തുടര്ച്ചയായ മൂന്നു വിജയങ്ങള്ക്കു ശേഷം കൊല്ക്കത്ത നൈറ്റ്റൈഡേഴ്സിനോട് തോല്വിയേറ്റുവാങ്ങിയതാണ് രാജസ്ഥാന് ഇന്നത്തെ മല്സരം ജീവന്മരണ പോരാട്ടമാക്കി മാറ്റിയത്.
സൂപ്പര് താരങ്ങളില്ലാതെ രാജസ്ഥാന്
രണ്ട് സൂപ്പര് താരങ്ങളില്ലാതെയാണ് രാജസ്ഥാന് ഇന്ന് ബാംഗ്ലൂരിനെതിരേ കളത്തിലിറങ്ങുന്നത്. സീസണില് രാജസ്ഥാന്റെ കുതിപ്പില് നിര്ണായക ഘടകമായി മാറിയ സ്റ്റാര് ബാറ്റ്സ്മാന് ജോസ് ബട്ലറിന്റേയും ഓള്റൗണ്ടര് ബെന് സ്റ്റോക്സിന്റേയും സേവനം രാജസ്ഥാന് ഇന്ന് ലഭിക്കില്ല. പാകിസ്താനെതിരായ ഇംഗ്ലണ്ട് ടെസ്റ്റ് ടീമില് ഇടം നേടിയ ഇരുവരും കഴിഞ്ഞ ദിവസം നാട്ടിലേക്ക് മടങ്ങിയിരുന്നു. ഇത് രാജസ്ഥാന് വന് ആഘാതമായി മാറിയിരിക്കുകയാണ്. 13 മല്സരങ്ങളില് നിന്ന് രാജസ്ഥാനു വേണ്ടി 548 റണ്സാണ് ബട്ലര് അടിച്ചുകൂട്ടിയത്. ബാറ്റിങിലും ബൗളിങിലും ഒരു പോലെ ഉപയോഗിക്കാന് കഴിയുന്ന സ്റ്റോക്സിന്റെ അഭാവവും രാജസ്ഥാന് നികത്താനാവില്ല.
അതേസമയം, ഇംഗ്ലണ്ട് ടെസ്റ്റ് ടീമില് ഇടംലഭിക്കാതെ പോയതോടെ സ്റ്റാര് ഓള്റൗണ്ടര് മോയിന് അലിയുടെ സാന്നിധ്യം ഇന്ന് ബാംഗ്ലൂരിന് ലഭിക്കും. കഴിഞ്ഞ മല്സരത്തില് വെടിക്കെട്ട് ഇന്നിങ്സുമായി ബാംഗ്ലൂരിന്റെ വിജയത്തിന് ചുക്കാന് പിടിക്കുന്നതില് നിര്ണായക പങ്കുവഹിക്കാന് അലിക്കായിരുന്നു.
ടീം
രാജസ്ഥാന് റോയല്സ്: രാഹുല് ത്രിപാതി, ഡാരി ഷോര്ട്ട്, അജിന്ക്യ രഹാനെ (ക്യാപ്റ്റന്), സഞ്ജു സാംസണ്, ഹെയ്ന്റിക് ക്ലാസ്സെന്, സ്റ്റുവര്ട്ട് ബിന്നി, കെ ഗൗതം, ജയ്ദേവ് ഉനാട്കട്ട്, ഇഷ് സോധി, ജൊഫ്ര ആര്ച്ചര്, അനുരീത് സിങ്.
റോയല് ചലഞ്ചേഴ്സ് ബാംഗ്ലൂര്: പാര്ഥീവ് പട്ടേല്, വിരാട് കോഹ്ലി (ക്യാപ്റ്റന്), എബി ഡിവില്ലിയേഴ്സ്, മോയിന് അലി, കോളിന് ഡി ഗ്രാന്ഡ്ഹോം, മന്ദീപ് സിങ്, സര്ഫ്രാസ് ഖാന്, ടിം സോത്തി, ഉമേഷ് യാദവ്, മുഹമ്മദ് സിറാജ്, യുസ്വേന്ദ്ര ചഹാല്.