സുരേഷ് റെയ്ന
നിശ്ചിത ഓവര് ക്രിക്കറ്റിലെ ഏറ്റവും അപകടകാരിയായ താരങ്ങളിലൊരാളാണ് ഇന്ത്യയുടെ സ്റ്റാര് ഓള്റൗണ്ടറായ സുരേഷ് റെയ്ന. 2005ല് അരങ്ങേറിയ റെയ്ന പിന്നീട് ഏകദിന ടീമിലെ സ്ഥിരസാന്നിധ്യമാവുന്നതാണ് കണ്ടത്. ബാറ്റിങില് മാത്രമല്ല പാര്ട് ടൈം ബൗളറായും തകര്പ്പന് ഫീല്ഡറായും തിളങ്ങിയ അദ്ദേഹം ടീമിന്റെ തുറുപ്പുചീട്ടായി മാറി. ഏകദിനത്തില് 35.31 ശരാശരിയില് 5615 റണ്സ് റെയ്ന നേടിയിട്ടുണ്ട്.
എന്നാല് ടെസ്റ്റില് പക്ഷെ റെയ്നയ്ക്കു തന്റെ കഴിവ് പുറത്തെടുക്കാനായില്ല. ദേശീയ ടീമിനായി ചില ടെസ്റ്റുകളില് കളിക്കാന് അവസരം ലഭിച്ചിരുന്നെങ്കിലും തുടര്ച്ചയായി പരാജയപ്പെട്ടതോടെ സ്ഥാനം നഷ്ടമാവുകയായിരുന്നു. ടെസ്റ്റില് വെറും 26.5 ആണ് താരത്തിന്റെ ബാറ്റിങ് ശരാശരി.
മൈക്കല് ബെവന്
ഏകദിനത്തിലെ എക്കാലത്തെയും മികച്ച ഓള്റൗണ്ടര്മാരുടെ നിരയിലാണ് ഓസ്ട്രേലിയയുടെ മുന് സൂപ്പര് താരം മൈക്കല് ബെവന്റെ സ്ഥാനം. നിരവധി മല്സരങ്ങള് ടീമിനെ ഒറ്റയ്ക്കു ജയിപ്പിക്കാന് അദ്ദേഹത്തിനായിട്ടുണ്ട്്. ഏകദിനത്തില് 53.40 എന്ന തകര്പ്പന് ശരാശരിയില് 6912 റണ്സണ് ബെവന് നേടിയത്.
ടെസ്റ്റില് പക്ഷെ ഈ മാജിക്ക് കാഴ്ചവയ്ക്കാന് ബെവനായില്ല. 18 ടെസ്റ്റുകളില് കളിച്ച അദ്ദേഹം 29.40 ശരാശരിയില് 785 റണ്സ് മാത്രമാണ് നേടിയത്. ഇതിഹാസതാരങ്ങളുടെ വലിയ നിര തന്നെ അക്കാലത്ത് ഓസീസിന് ഉണ്ടായിരുന്നതിനാല് ബെവനു ടെസ്റ്റില് കൂടുതല് അവസരങ്ങളും ലഭിച്ചില്ല.
യുവരാജ് സിങ്
ഇന്ത്യന് ക്രിക്കറ്റില് ഒരു കാലത്തെ പോസ്റ്റര് ബോയ് ആയിരുന്നു സൂപ്പര് ഓള്റൗണ്ടര് യുവരാജ് സിങ്. ബാറ്റിങ്, ബൗളിങ്, ഫീല്ഡിങ് എന്നീ മൂന്നിലും അസാധാരണ പ്രകടനങ്ങള് നടത്തിയിട്ടുള്ള താരമാണ് യുവി. ഇന്ത്യ ട്വന്റി20 ലോകപ്പിലും ഏകദിന ലോകകപ്പിലുമെല്ലാം ജേതാക്കളായപ്പോള് ടീമിന്റെ തുറുപ്പുചീട്ടായിരുന്നു അദ്ദേഹം. പ്രഥമ ട്വന്റി20 ലോകകപ്പില് ഒരോവറിലെ ആറു പന്തിലും സിക്സര് പായിച്ച് യുവി ലോക റെക്കോര്ഡിടുകയും ചെയ്തിരുന്നു.
ഏകദിനത്തില് 36.56 ശരാശരിയില് 8701 റണ്സാണ് യുവിയുടെ അക്കൗണ്ടിലുള്ളത്. 87 ആണ് അദ്ദേഹത്തിന്റെ സ്ട്രൈക്ക്റേറ്റ്. ഏകദിനത്തില് ടീമിന്റെ ഹീറോയായിരുന്ന യുവി പക്ഷെ ടെസ്റ്റില് ഫ്ളോപ്പായി മാറി. 40 ടെസ്റ്റുകളിലാണ് താരം കളിച്ചത്. 33.9 ശരാശരിയില് 1900 റണ്സും യുവി നേടി.