ബാങ്കോക്ക്: തായ്ലന്ഡ് ഓപ്പണ് ബാഡ്മിന്റണില് ഇന്ത്യയ്ക്ക് നിരാശ. ഇന്ത്യന് പ്രതീക്ഷകളായ സൈന നേവാള്, കെ ശ്രീകാന്ത്, പി കശ്യപ് എന്നിവര് രണ്ടാം റൗണ്ടില് പരാജയപ്പെട്ടു. റാങ്കിങ്ങില് തന്നേക്കാള് ഏറെ താഴെയുള്ള ജാപ്പനീസ് താരം സായക തകാഹാഷിയോടാണ് സൈന പരാജയപ്പെട്ടത്. സ്കോര് 21-16, 11-21, 14-21. ടൂര്ണമെന്റിലെ ഏഴാം സീഡായ സൈന ആദ്യ സെറ്റില് ജയിച്ചെങ്കിലും തുടര്ന്നുള്ള രണ്ട് സെറ്റിലും ക്ഷീണിതയായതോടെയാണ് എതിരാളി അട്ടിമറി ജയം സ്വന്തമാക്കിയത്.
തായ്ലന്ഡ് താരം ഖോസിത് ഫെപ്രതാബിനോട് 21-11, 16-21, 12-21 എന്ന സ്കോറിനായിരുന്നു ശ്രീകാന്തിന്റെ തോല്വി. തുടര്ച്ചയായ ടൂര്ണമെന്റുകളില് മികച്ച പ്രകടനം കാഴ്ചവെക്കുന്നതില് പരാജയപ്പെട്ട ശ്രീകാന്ത് തായ്ലന്ഡ് ഓപ്പണിലും കാര്യമായ നേട്ടമുണ്ടാക്കാനായില്ല. പി കശ്യപ് ചൈനീസ് തായ്പേയിയുടെ ടിയെന് ചെന്നിനോടാണ് തോല്വി വഴങ്ങിയത്. സ്കോര് 21-9, 21-14. പരിക്കിനെ തുടര്ന്ന് തിരിച്ചെത്തിയ കശ്യപിന് പിന്നീട് നടന്ന ടൂര്ണമെന്റുകളിലൊന്നും വിജയിക്കാനായിട്ടില്ല.
'ഞാന് കളിക്കാനിറങ്ങിയത് ടീമിനുവേണ്ടി മാത്രമല്ല, രാജ്യത്തിനുവേണ്ടിയാണ്'; വിവാദങ്ങള്ക്കിടെ രോഹിത്
സിംഗിള്സ് താരങ്ങള് പരാജയപ്പെട്ടപ്പോള് ഇന്ത്യയ്ക്ക് ആശ്വാസമായത് ഡബിള്സിലെ വിജയമാണ്. സാത്വിക് സായ് രാജ് റങ്കിറെഡ്ഡി, ചിരാഗ് ഷെട്ടി സഖ്യം ആറാം സീഡ് ഇന്തോനേഷ്യയുടെ ഫജര് അല്ഫിയാന്, മുഹമ്മദ് റിയാന് സഖ്യത്തെ 21-17, 21-19 എന്ന സ്കോറിന് പരാജയപ്പെടുത്തി ക്വാര്ട്ടറിലെത്തി. ജപ്പാന് ഓപ്പണില് മികച്ച പ്രകടനം നടത്തിയ ഇന്ത്യന് ജോഡി സമാന പ്രകടനമാണ് ആവര്ത്തിച്ചത്.