രാഹുലിനെ ഇന്ത്യക്കു ഇനിയും വേണോ? സംശയം വേണ്ട, തീര്‍ച്ചയായും ടീമിലുണ്ടാവണം... ഇതാണ് കാരണങ്ങള്‍

മോശം കാലം എല്ലാവര്‍ക്കുമുണ്ട്

രാഹുല്‍ മാത്രമല്ല ഇതിഹാസ താരം സച്ചിന്‍ ടെണ്ടുല്‍ക്കര്‍, നിലവിലെ ക്യാപ്റ്റന്‍ വിരാട് കോലി എന്നിവരെല്ലാം ഇത്തരത്തില്‍ മോശം സമയത്തിലൂടെ കടന്നുപോയിട്ടുണ്ട്. എന്നാല്‍ പിന്നീട് അവര്‍ ഫോ വീണ്ടെടുക്കുന്നത് നാം കണ്ടു കഴിഞ്ഞു. രാഹുലിനും ഇതുപോലെ അവസരങ്ങള്‍ നല്‍കി നഷ്ടപ്പെട്ട ആത്മവിശ്വാസം തിരികെ നല്‍കാന്‍ അവസരമൊരുക്കുകയാണ് ഇന്ത്യ ചെയ്യേണ്ടത്.
കോലിക്കു ശേഷം ഇന്ത്യന്‍ ക്രിക്കറ്റിലെ അടുത്ത സെന്‍സേഷനെന്നാണ് മുമ്പ് പലരും രാഹുലിനെ വിശേഷിപ്പിച്ചിരുന്നത്. അത്രയേറെ ബാറ്റിങ് പാടവമുള്ള താരമാണ് അദ്ദേഹം. അതുകൊണ്ടു തന്നെ തന്റെ യഥാര്‍ഥ മിടുക്ക് ലോകത്തിനു കാണിച്ചു കൊടുക്കാന്‍ രാഹുലിന് അവസരം നല്‍കുകയാണ് ഇന്ത്യ ചെയ്യേണ്ടത്.

മാച്ച് വിന്നര്‍

മികച്ച മാച്ച് വിന്നറാണ് താനെന്ന് പല തവണ തെളിയിച്ച താരമാണ് രാഹുല്‍. ദേശീയ ടീമിനൊപ്പം മാത്രമല്ല ഐപിഎല്ലിലും താരം ചില മികച്ച ഇന്നിങ്‌സുകള്‍ കളിച്ചിട്ടുണ്ട്. ഫോമിലേക്കുയര്‍ന്നാല്‍ രാഹുലിനേക്കാള്‍ മികച്ച ബാറ്റ്‌സ്മാന്‍മാര്‍ ഇന്ത്യന്‍ ടീമില്‍ അധികമില്ല. അതിവേഗം റണ്‍സ് അടിച്ചുകൂട്ടാനും എത്ര മികച്ച പന്തിലും ഷോട്ട് കളിക്കാനും രാഹുല്‍ കേമനാണ്.
തന്റെ യഥാര്‍ഥ ഫോമിലേക്കുയരാന്‍ താരത്തിന് കുറച്ചു കൂടി അവസരം നല്‍കുകയാണ് ഇന്ത്യ ചെയ്യേണ്ടത്. തുടര്‍ച്ചയായ മോശം പ്രകടനങ്ങള്‍ രാഹുലിന്റെ ആത്മവിശ്വാസം കുറച്ചിട്ടുണ്ട്. ഇതു തന്നെയാണ് താരം വീണ്ടും വീണ്ടും ചെറിയ സ്‌കോറില്‍ പുറത്താവാന്‍ കാരണം.

ഭാവി ക്യാപ്റ്റന്‍ ?

ഭാവിയില്‍ ഒരുപക്ഷെ ഇന്ത്യന്‍ ടീമിന്റെ ക്യാപ്റ്റന്‍ സ്ഥാനത്തേക്കു വരെ ഇന്ത്യ പരീക്ഷിക്കാന്‍ സാധ്യതയുള്ള താരമാണ് രാഹുല്‍. കോലി കഴിഞ്ഞാല്‍ രോഹിത് ശര്‍മയും അജിങ്ക്യ രഹാനെയുമാണ് ടീമിലെ മറ്റു സീനിയര്‍ താരങ്ങള്‍. എന്നാല്‍ മൂന്നു പേരും തങ്ങളുടെ 30കളിലാണ്. അതിനാല്‍ കോലിക്കു ശേഷം അടുത്ത ക്യാപ്റ്റനാര് എന്നതു ചോദ്യചിഹ്നമാണ്.
നായകസ്ഥാനത്തേക്കു വരാന്‍ സാധ്യത കല്‍പ്പിക്കപ്പെടുന്നവരുടെ കൂട്ടത്തില്‍ രാഹുലുമുണ്ട്. പൃഥ്വി ഷാ, റിഷഭ് പന്ത് എന്നിവരാണ് മറ്റു കളിക്കാര്‍. പന്ത്, പൃഥ്വി എന്നിവരേക്കാള്‍ മുതിര്‍ന്നതാണെന്നതും കൂടുതല്‍ അന്താരാഷ്ട്ര മല്‍സരങ്ങള്‍ കൡച്ചിട്ടുണ്ട് എന്നതും രാഹുലിന് മുന്‍തൂക്കം നല്‍കുന്നുണ്ട്. കഴിഞ്ഞ ഐപിഎല്ലില്‍ കിങ്‌സ് ഇലവന്‍ പഞ്ചാബിന്റെ വൈസ് ക്യാപ്റ്റനായിരുന്നു അദ്ദേഹം.