ധോണിയാവും ഇന്ത്യന് തുറുപ്പുചീട്ട്
രണ്ടു തവണ ഇന്ത്യക്കു ലോകകിരീടം സമ്മാനിച്ച മുന് ക്യാപ്റ്റനും ഇതിഹാസ താരവുമായ എംഎസ് ധോണിയാവും ലോകകപ്പില് ഇന്ത്യയുടെ തുറുപ്പുചീട്ടാവുകയെന്ന് അസ്ഹര് അഭിപ്രായപ്പെട്ടു.
ധോണിയെ ഏറെ ഇഷ്ടമാണ്. ലോകകപ്പില് ഇന്ത്യയുടെ നമ്പര് വണ് താരം അദ്ദേഹം തന്നെയാവും. കാരണം ഏകദിനത്തില് ഏറെ അനുഭവസമ്പത്തുള്ള താരമാണ് ധോണി. നിരവധി തവണ വിക്കറ്റിനു പിന്നില് നിന്ന് ഇന്ത്യക്കു അവിസ്മരണീയ ജയങ്ങള് സമ്മാനിക്കാന് അദ്ദേഹത്തിനായിട്ടുണ്ടെന്നും അസ്ഹര് ചൂണ്ടിക്കാട്ടി.
കോലിക്കും മുതല്ക്കൂട്ടാവും
ലോകകപ്പ് ടീമില് ധോണിയുണ്ടെങ്കില് അതു ക്യാപ്റ്റന് കോലിക്കും മുതല്ക്കൂട്ടാവുമെന്ന് അസ്ഹര് പറഞ്ഞു. ബൗളിങ് ചേഞ്ച് വരുത്തുന്നതിലും ഫീല്ഡിങ് ക്രമീകരണത്തിലുമെല്ലാം ധോണിക്കു അസാധാരണ മികവാണുള്ളത്. ഈ അനുഭവസമ്പത്ത് ഉപയോഗിച്ച് അദ്ദേഹത്തിന് കോലിയെ സഹായിക്കാന് കഴിയുമെന്നും അസ്ഹര് വിശദമാക്കി.
നേരത്തേ ഇന്ത്യയുടെ നിലവിലെ വൈസ് ക്യാപ്റ്റനായ രോഹിത് ശര്മയും ഇതേ അഭിപ്രായം തന്നെയാണ് പ്രകടിപ്പിച്ചത്. ടീമിന്റെ വഴികാട്ടിയാണ് ധോണിയെന്ന് ഹിറ്റ്മാന് പറഞ്ഞിരുന്നു.
ധോണിയുടെ ഫോം
ധോണിയുടെ അനുഭവസമ്പത്ത് ഇന്ത്യക്കു മുതല്ക്കൂട്ടാണെങ്കിലും സമീപകാലത്തെ ഫോം ആശങ്കയുണ്ടാക്കുന്നതാണ്. ബാറ്റിങില് അദ്ദേഹത്തിന് പഴയ ഫോം ആവര്ത്തിക്കാന് കഴിയുന്നില്ല. 2018ല് 20 ഏകദിനങ്ങളിലാണ് ധോണി കളിച്ചത്. ഇവയില് നിന്നും നേടാനായതാവട്ടെ വെറും 275 റണ്സാണ്.
ഓസ്ട്രേലിയക്കെതിരേ അടുത്തിടെ നടന്ന രണ്ടു ടി20 പരമ്പരകള്ക്കുമുള്ള ടീമുകളില് നിന്നും അദ്ദേഹം ഒഴിവാക്കപ്പെടുകയും ചെയ്തു. വിന്ഡീസ്, ഓസീസ് എന്നിവര്ക്കെതിരേയാണ് ധോണിക്കു പുറത്തിരിക്കേണ്ടിവന്നത്. ലോകകപ്പിന് മുമ്പ് 13 ഏകദിനങ്ങള് മാത്രമാണ് ഇന്ത്യ കളിക്കുന്നത്. അവയില് മികച്ച പ്രകടനം നടത്തിയില്ലെങ്കില് ഒരുപക്ഷെ ധോണിയെ തഴയാനും സെലക്ടര്മാര് നിര്ബന്ധിതരായേക്കും.