വെളിച്ചക്കുറവ് ഇന്ത്യയ്ക്ക് വില്ലനായി.. ലങ്ക 7 വിക്കറ്റ് നഷ്ടത്തിൽ തടിതപ്പി.. ഒന്നാം ടെസ്റ്റ് സമനില

കോലിയുടെ മാസ്റ്റർ ക്ലാസ്

ക്യാപ്റ്റൻറെ ഇന്നിംഗ്സ് - വിരാട് കോലിയുടെ ഈ സെഞ്ചുറിയെ അക്ഷരം തെറ്റാതെ തന്നെ ഇങ്ങനെ വിളിക്കാം. ഒരു വശത്ത് ബാറ്റിംഗ് നിര ചീട്ടുകൊട്ടാരം പോലെ തകർന്ന് തരിപ്പണമാകുമ്പോഴാണ് വിരാട് കോലി സെഞ്ചുറിയുമായി ടീമിനെ രക്ഷിച്ചത്. 119 പന്തുകളിൽ 12 ഫോറും 2 സിക്സും സഹിതമാണ് കോലി 104 റൺസെടുത്തത്.

വിരാട് കോലി @50 സെഞ്ചുറി

അന്താരാഷ്ട്ര ക്രിക്കറ്റിൽ ഇന്ത്യൻ ക്യാപ്റ്റൻ വിരാട് കോലിയുടെ അമ്പതാം സെഞ്ചുറിയാണിത്. ടെസ്റ്റിൽ പതിനെട്ടാമത്തെയും. 32 സെഞ്ചുറികളുമായി ഏകദിനത്തിൽ സച്ചിൻ തെണ്ടുൽക്കറിൻറെ മാത്രം പിന്നിലാണ് ഇന്ത്യയുടെ സ്റ്റാർ ബാറ്റ്സ്മാൻ കം ക്യാപ്റ്റൻ. ട്വന്റി 20യിൽ വിരാടിന് സെഞ്ചുറികളില്ല.

ബാറ്റിംഗ് നിര ദയനീയം

ഇന്നലെ ശിഖർ ധവാനും കെ എൽ രാഹുലും അടിച്ചത് ഒഴിവാക്കി നിർത്തിയാൽ ശുഷ്കമായിരുന്നു കോലി അല്ലാതെയുള്ള ഇന്ത്യൻ ബാറ്റ്സ്മാൻമാരുടെ സംഭാവന. വൺഡൗണായി കളിച്ച പൂജാര (22)യ്ക്ക് ശേഷം രണ്ടക്കം കടന്നത് കോലി അല്ലാതെ പതിനൊന്നാമനായ ഷമി മാത്രം. രഹാനെ 0, ജഡേജ 9, അശ്വിൻ 7, സാഹ 5, ഭുവി 8 ഇതാണ് ഇന്ത്യക്കാരുടെ സ്കോറുകൾ.

ലങ്കൻ ബൗളർമാർ ഇന്നും

ഒന്നാം ഇന്നിംഗ്സിൽ ഇന്ത്യയെ വരച്ച വരയിൽ നിർത്തിയ ശ്രീലങ്കൻ ഫാസ്റ്റ് ബൗളർമാർ രണ്ടാം ഇന്നിംഗ്സിലും ആതിഥേയരെ നിലം തൊടീച്ചില്ല. ഒന്നാം ഇന്നിംഗ്സിൽ നാല് വിക്കറ്റെടുത്ത ലക്മൽ രണ്ടാം ഇന്നിംഗ്സിലും ഈ നേട്ടം ആവർത്തിച്ചു. ശനക മൂന്ന് വിക്കറ്റ് വീഴ്ത്തി.