10 ദിവസം കൊണ്ട് 4 കളികള്
ലോകകപ്പിലെ തിരക്കേറിയ മല്സക്രമമാണ് ഇന്ത്യക്ക് കനത്ത തിരിച്ചടിയായ മാറിയിരിക്കുന്നത്. 10 ദിവസം കൊണ്ട് നാലു മല്സരങ്ങളാണ് ഇന്ത്യക്കു ഷെഡ്യൂള് ചെയ്തിരിക്കുന്നത്. ഇതില് രണ്ടെണ്ണം കഴിഞ്ഞു. ഇനി ഇന്നു ബംഗ്ലാദേശുമായും ആറിന് ശ്രീലങ്കയുമായും ഇന്ത്യക്കു ഏറ്റുമുട്ടേണ്ടതുണ്ട്.
ടൂര്ണമെന്റില് ഇന്ത്യക്കാണ് ഇത്രയും തിരക്കേറിയ മല്സരക്രമമുള്ളത്. കാരണം, ലോകകപ്പില് ഏറ്റവും വൈകി കളിച്ച ടീമും ഇന്ത്യയാണ്. ഒരാഴ്ചയോളം വൈകിയാണ് വിരാട് കോലിയും സംഘവും ആദ്യ മല്സരത്തിനിറങ്ങിയത്. ഇന്ത്യ ഏഴു മല്സരങ്ങളാണ് പൂര്ത്തിയാക്കിയത്. ബംഗ്ലാദേശൊഴികെ മറ്റുള്ളവരെല്ലാം എട്ടു മല്സരങ്ങള് കളിച്ചുകഴിഞ്ഞു.
ഫിറ്റ്നസ് വെല്ലുവിളി
ലോകകപ്പ് പോലൊരു വലിയൊരു ടൂര്ണമെന്റില് തുടര്ച്ചയായ മല്സരങ്ങള് കളിക്കേണ്ടി വരുന്നത് ഇന്ത്യക്കു മാത്രമല്ല ഏതു ടീമിനും വലിയ തിരിച്ചടിയാണ് സമ്മാനിക്കുക. ഫിറ്റനസ് നിലനിര്ത്തുകയെന്ന വലിയ വെല്ലുവിളിയാണ് ഇന്ത്യന് താരങ്ങള്ക്കു മുന്നിലുളളത്. ഐപിഎല്ലിനു ശേഷം വലിയൊരു ഇടവേള ലഭിച്ചെങ്കിലും ഇപ്പോഴത്തെ തിരക്കേറിയ ഷെഡ്യൂള് ഇന്ത്യന് താരങ്ങളെ ബാധിച്ചിട്ടുണ്ടെന്നു വ്യക്തമാണ്.
ജൂണ് 27ന് വെസ്റ്റ് ഇന്ഡീസുമായി ഏറ്റുമുട്ടിയ ഇന്ത്യക്ക് 30ന് ഇംഗ്ലണ്ടിനെ നേരിടേണ്ടിവന്നു. ഇന്നു ബംഗ്ലാദേശുമായി ഏറ്റുമുട്ടുന്ന ഇന്ത്യ ശനിയാഴ്ച വീണ്ടും കളത്തിലിറങ്ങുകയാണ്.
ഇനിയും പരിക്ക്?
രണ്ടു താരങ്ങള് പരിക്കേറ്റു പിന്മാറുകയും രണ്ടു പേര് പരിക്കിന്റെ പിടിയിലുമുള്ള സാഹചര്യത്തില് വീണ്ടുമൊരു പരിക്ക് ഇന്ത്യന് ടീമിനു ഇനി താങ്ങാന് കഴിയില്ല. അതുകൊണ്ടു തന്നെ ഇനിയുള്ള മല്സരങ്ങളില് പരിക്കിന് കീഴടങ്ങാതിരിക്കാന് താരങ്ങള് ശ്രദ്ധ പുലര്ത്തിയേ തീരൂ.
ലോകകപ്പിന്റെ സെമി ഫൈനലിന് തൊട്ടരികിലാണ് ഇന്ത്യ. ശേഷിക്കുന്ന രണ്ടു മല്സരങ്ങളില് ഒന്നില് മാത്രം ജയിക്കാനായാല് വിരാട് കോലിക്കും സംഘത്തിനും അവസാന നാലു ടീമുകളിലൊന്നാവാം.