Click it and Unblock the Notifications
വിക്കറ്റ് കീപ്പറുടെ ഉയര്‍ന്ന വ്യക്തിഗത സ്‌കോര്‍
ഏകദിനത്തില്‍ ഒരു വിക്കറ്റ് കീപ്പറുടെ ഉയര്‍ന്ന വ്യക്തിഗത സ്‌കോറെന്ന റെക്കോഡ് ധോണിയുടെ പേരിലാണ്. 2005ല്‍ ശ്രീലങ്കയ്‌ക്കെതിരേ പുറത്താവാതെ നേടിയ 183 റണ്‍സാണ് അദ്ദേഹത്തെ ഈ റെക്കോഡിനുടമയാക്കിയത്. അന്ന് മൂന്നാം നമ്പറില്‍ ബാറ്റ് ചെയ്യാനെത്തിയാണ് ധോണി ലങ്കന്‍ ബൗളര്‍മാരെ തല്ലിത്തകര്‍ത്തത്. 299 റണ്‍സ് പിന്തുടര്‍ന്നിറങ്ങിയപ്പോഴായിരുന്നു ധോണിയുടെ ഈ മാസ്മരിക പ്രകടനം. വിജയ ലക്ഷ്യം കുറച്ചുകൂടി ഉയര്‍ന്നതായിരുന്നെങ്കില്‍ ചിലപ്പോള്‍ ഏകദിനത്തിലെ ആദ്യ ഇരട്ട സെഞ്ച്വറിയെന്ന റെക്കോഡ് ധോണി സ്വന്തമാക്കിയേനെ. 145 പന്തില്‍ 15 ഫോറും 10 സിക്‌സും ഉള്‍പ്പെടെയായിരുന്നു ധോണിയുടെ അത്യുഗ്രന്‍ പ്രകടനം.
കൂടുതല്‍ സ്റ്റംപിങ്
വിക്കറ്റിന് പിന്നില്‍ ധോണിയുടെ മികവ് ഒന്നുവേറെ തന്നെയാണ്. ധോണി കീപ്പറായുള്ളപ്പോള്‍ ക്രീസില്‍ നിന്ന് ബാറ്റ്‌സ്മാന്‍ കയറിക്കളിക്കാന്‍ ഒന്ന് ഭയപ്പെടും. സ്റ്റംപിങ്ങില്‍ അസാമാന്യം വേഗതയുള്ള ധോണിയുടെ പേരിലാണ് ഏകദിനത്തിലെ കൂടുതല്‍ സ്റ്റംപിങ്ങെന്ന റെക്കോഡ്. 345 ഇന്നിങ്‌സില്‍ നിന്നായി 123 സ്റ്റംപിങ്ങും 321 ക്യാച്ചുമാണ് ധോണിയുടെ പേരിലുള്ളത്. ശ്രീലങ്കയുടെ കുമാര്‍ സംഗക്കാരെയാണ് ഈ റെക്കോഡില്‍ ധോണിക്ക് താഴെ. കൂടുതല്‍ പുറത്താക്കല്‍ നടത്തിയ വിക്കറ്റ് കീപ്പര്‍മാരില്‍ സംഗക്കാരക്കും ആദം ഗില്‍ക്രിസ്റ്റിനും താഴെ മൂന്നാം സ്ഥാനത്താണ് ധോണി.
കൂടുതല്‍ നോട്ട് ഔട്ട്
ധോണിയെ പുറത്താക്കുകയെന്നത് ബൗളറെ സംബന്ധിച്ച് വലിയ വെല്ലുവിളിയാണ്. ക്രിക്കറ്റിലെ ബുദ്ധിജീവിയെന്ന് വിശേഷമുള്ള ധോണിയെ കൗശലത്തിലൂടെ പുറത്താക്കുക ബൗളര്‍ക്ക് അസാധ്യമാണ്. 350 ഏകദിനം കളിച്ച ധോണി 84 മത്സരങ്ങളിലാണ് പുറത്താവാതെ നിന്നത്. ഇതില്‍ പല മത്സരങ്ങളിലും ഇന്ത്യയെ വിജയ തീരത്തെത്തിക്കാനും അദ്ദേഹത്തിനായി. ഈ റെക്കോഡില്‍ ധോണിക്ക് താഴെയുള്ളതെല്ലാം ബൗളര്‍മാരാണ്. ഷോണ്‍ പൊള്ളോക്ക്, ചാമിന്ദ വാസ്, മുത്തയ്യ മുരളീധരന്‍ എന്നിവരാണ് ഈ റെക്കോഡില്‍ ധോണിക്ക് താഴെയുള്ളത്.
50 ശരാശരിയില്‍ 10,000 പൂര്‍ത്തിയാക്കുന്ന ആദ്യ താരം
ഏകദിനത്തില്‍ 10000 റണ്‍സെന്ന നാഴികക്കല്ല് 50 ശരാശരിയില്‍ പൂര്‍ത്തിയാക്കുന്ന ആദ്യ താരമാണ് ധോണി. മധ്യനിരയില്‍ ബാറ്റിങ്ങിനിറങ്ങി സ്ഥിരത പുലര്‍ത്തുന്നതാണ് ധോണിയെ വ്യത്യസ്തനാക്കുന്നത്. 2018 ജൂലൈയില്‍ 10,000 റണ്‍സ് പൂര്‍ത്തിയാക്കുമ്പോള്‍ 50ന് മുകളിലായിരുന്നു ധോണിയുടെ ശരാശരി. ഈ ശരാശരിയില്‍ 10,000 റണ്‍സ് നേടിയത് ധോണിയെക്കൂടാതെ കോലി മാത്രമാണ്. സംഗക്കാരക്കുശേഷം ഏകദിനത്തില്‍ 10,000 റണ്‍സ് നേടുന്ന വിക്കറ്റ് കീപ്പറാണ് ധോണി. 7,500 റണ്‍സ് നേടിയ വിക്കറ്റ് കീപ്പര്‍മാരുടെ ശരാശരിയില്‍ എബി ഡിവില്ലിയേഴ്‌സാണ് മുന്നില്‍.
കൂടുതല്‍ വിജയം നേടിയ ഇന്ത്യന്‍ നായകന്‍
ഏകദിനത്തില്‍ കൂടുതല്‍ വിജയം സ്വന്തമാക്കിയ ഇന്ത്യന്‍ നായകനാണ് ധോണി. 2007ല്‍ ദ്രാവിഡില്‍ നിന്ന് ഇന്ത്യയുടെ നായകസ്ഥാനം ഏറ്റെടുത്ത ധോണി 200 ഏകദിനത്തില്‍ ഇന്ത്യയെ നയിച്ചു. ഇതില്‍ 110 മത്സരത്തിലും അദ്ദേഹത്തിന് ടീമിനെ വിജയിപ്പിക്കാനായി. 165 മത്സരങ്ങളില്‍ ടീമിനെ വിജയിപ്പിച്ച ഓസ്‌ട്രേലിയയുടെ റിക്കി പോണ്ടിങ്ങാണ് ഈ റെക്കോഡില്‍ മുന്നിലുള്ളത്. അസ്ഹറുദ്ദീന്‍ 90 ഏകദിനത്തിലും ഗാംഗുലി 70 ഏകദിന മത്സരത്തിലുമാണ് ഇന്ത്യയെ വിജയിപ്പിച്ചത്.
