ഭാജിയെ തല്ലാന്‍ അന്നു താന്‍ മുറിയില്‍ പോയി!! പിന്നെ സംഭവിച്ചത്... വെളിപ്പെടുത്തി ഷുഐബ് അക്തര്‍

ഹര്‍ഭജനോടു അന്നത്തെ മല്‍സരത്തിനുശേഷം കടുത്ത രോഷം തോന്നിയതായി അക്തര്‍ വെളിപ്പെടുത്തി. ഭാജിയോട് വല്ലാത്ത ദേഷ്യം തോന്നിയിരുന്നു. തല്ലാന്‍ മുറിയിലേക്കു പോവുകയും ചെയ്തു. ലാഹോറില്‍ തങ്ങള്‍ക്കൊപ്പം ഭക്ഷണം കഴിക്കുകയും ഒരുമിച്ച് കറങ്ങാന്‍ വരികയും ചെയ്തിരുന്നയാളാണ് ഹര്‍ഭജന്‍. തങ്ങളുടെ സംസ്‌കാരവും ഒരുപോലെയാണ്. തന്നെപ്പോലെ അദ്ദേഹവും പഞ്ചാബി സഹോദരനാണ്. എന്നിട്ടും ഭാജി തന്നോട് മോശമായി പെരുമാറി. ഹോട്ടല്‍ മുറിയില്‍ പോയി ഭാജിയോടു തല്ലുണ്ടാക്കാന്‍ അന്നു ആലോചിച്ചിരുന്നു. താന്‍ വരുമെന്ന് ഭാജിക്കു തോന്നുകയും ചെയ്തിരുന്നു. താന്‍ മുറിയിലെത്തിയപ്പോള്‍ ഭാജി അവിടെ ഇല്ലായിരുന്നു. തൊട്ടടുത്ത ദിവസമായപ്പോഴേക്കും തന്റെ കോപം കുറച്ചു അടങ്ങി. ഭാജി തന്നോടു മാപ്പു ചോദിക്കുകയും ചെയ്തതായി അക്തര്‍ പറയുന്നു.

ഇന്ത്യ- പാക് മല്‍സരത്തില്‍ ഹര്‍ഭജനും അക്തറും തമ്മിലുള്ള തമ്മിലുള്ള ഏറ്റുമുട്ടലിന്റെ തുടക്കം കളിയുടെ 47ാം ഓവറിലായിരുന്നു. ഈ ഓവറില്‍ അക്തറിനെതിരേ ഭാജി ലോങ് ഓണിലൂടെ തകര്‍പ്പനൊരു സിക്‌സര്‍ പായിച്ചിരുന്നു. ഈ സിക്‌സറിനു ശേഷം അസ്വസ്ഥനായ അക്തര്‍ ഭാജിയുടെ ശരീരം ലക്ഷ്യമിട്ട് ചില ബൗണ്‍സറുകള്‍ എറിയുകയും ചെയ്തു. ഇതു ഇരുവരും തമ്മിലുള്ള വാക്‌പോരിനും വഴിയൊരുക്കി. കളിയുടെ അവസാന ഓവര്‍ വരെ അക്തറും ഹര്‍ഭജനും തമ്മിലുള്ള ഈ വാക്‌പോര് തുടരുകയും ചെയ്തു. മൂന്നു വിക്കറ്റിനായിരുന്നു പാകിസ്താനെ ഇന്ത്യ അന്നു കീഴടക്കിയിരുന്നു.

ഹോട്ടല്‍ റൂമിലെത്തി തല്ലുമെന്ന് അക്തര്‍ അന്നു ഭീഷണിപ്പെടുത്തിയിരുന്നതായി ഹര്‍ഭജന്‍ തന്നെ മുമ്പ് വെളിപ്പെടുത്തിയിരുന്നു. ഹോട്ടല്‍ മുറിയിലേക്കു വരുമെന്നും തന്നെ തല്ലുമെന്നുമായിരുന്നു അക്തര്‍ ഭീഷണി മുഴക്കിയത്. ആര് ആരെയാണ് തല്ലുകയെന്നു നമുക്ക് കാണാമെന്ന് ഒരിക്കല്‍ താന്‍ അക്തറിനു മറുപടി നല്‍കുകയും ചെയ്തു. അങ്ങനെ തിരിച്ചു പറഞ്ഞെങ്കിലും വല്ലാതെ ഭയം തോന്നിയിരുന്നു.
കാരണം അക്തര്‍ ഹള്‍ക്കിനെപ്പോലെ അസാധാരണമായ ശാരീരിക ശേഷിയുള്ള വ്യക്തിയാണ്. അതിനു മുമ്പ് മുറിക്കകത്ത് വച്ച് തന്നെയും യുവരാജിനെയും അക്തര്‍ തല്ലിയിരുന്നു. അദ്ദേഹം ഭാരമുള്ള, കരുത്തേറിയ ആളായതിനാല്‍ തന്നെ തടഞ്ഞുനിര്‍ത്തുക ബുദ്ധിമുട്ടായിരുന്നുവെന്നും ഹര്‍ഭജന്‍ നേരത്തേ വെളിപ്പെടുത്തിയിരുന്നു.