ഒരു റേഡിയോ ചാനലിനോടു സംസാരിക്കവെയായിരുന്നു കോലിയുടെ പെരുമാറ്റത്തെക്കുറിച്ച് സോത്തി പ്രതികരിച്ചത്. കോലിയെ വിമര്ശിക്കുകയല്ല മറിച്ച് പിന്തുണയ്ക്കുകയാണ് അദ്ദേഹം ചെയ്തത്.
വളരെ ആവേശത്തോടെ കളിക്കളത്തില് പ്രതികരിക്കുന്ന വ്യക്തിയാണ് കോലി. മാത്രമല്ല എല്ലായ്പ്പോഴും വളരെ ഊര്ജസ്വലനായാണ് അദ്ദേഹം കാണപ്പെടാറുള്ളത്. എല്ലായ്പ്പോഴും കഴിവിന്റെ പരമാവധി കളിക്കളത്തില് പുറത്തെടുക്കാനും കോലി ശ്രമിക്കാറുണ്ടെന്നു സോത്തി പറഞ്ഞു.
രണ്ടാം ടെസ്റ്റിന്റെ മൂന്നാം ദിനത്തില് കോലിയെ ഇത്രയുമധികം വിമര്ശിക്കാന് മാത്രം എന്താണ് യഥാര്ഥത്തില് സംഭവിച്ചതെന്ന കാര്യത്തില് തനിക്കുറപ്പില്ലെന്നും സോത്തി വ്യക്തമാക്കി. കോലി കാണികളോടോ, വില്ല്യംസണോടോ എന്താണ് പറഞ്ഞതെന്നു അറിയില്ല. ഇരുടീമുകളും വളരെയധികം മല്സരബുദ്ധിയോടെയാണ് ഈ പരമ്പരയില് കളിച്ചതെന്നും സോത്തി ചൂണ്ടിക്കാട്ടി.
മല്സരശേഷം വിളിച്ചുചേര്ത്ത വാര്ത്താ സമ്മേളനത്തില് തന്റെ പെരുമാറ്റത്തെക്കുറിച്ചുള്ള ചോദ്യത്തിനു കോലി പൊട്ടിത്തെറിച്ചിരുന്നു. എന്താണ് യഥാര്ഥത്തില് സംഭവിച്ചതെന്നു മനസ്സിലാക്കിയ ശേഷം കൂടുതല് നല്ല ചോദ്യവുമായി ഇനി വരണം. പകുതി ചോദ്യവും, പകുതി വിവരങ്ങളും മാത്രം മനസ്സിലാക്കി ഇവിടേക്കു വരരുത്. ഇനി വിവാദമുണ്ടാക്കാനാണ് നിങ്ങളുടെ ശ്രമമെങ്കില് ഇതല്ല അതിനു പറ്റിയ സ്ഥലം. മാച്ച് റഫറിയുമായി താന് സംസാരിച്ചിരുന്നതായും എന്താണോ സംഭവിച്ചത് അതില് പ്രശ്നമൊന്നുമില്ലെന്നും കോലി മറുപടി നല്കിയിരുന്നു.