ഞാന് സഞ്ജുവിനെ തിരഞ്ഞെടുക്കും
ലങ്കയില് ഇന്ത്യയെ ഓപ്പണര് ശിഖര് ധവാന് നയിക്കാനാണ് സാധ്യത. പൃഥ്വി ഷാ, സഞ്ജു സാംസണ് ഇവരൊന്നും ക്യാപ്റ്റനാവാന് സാധ്യതയില്ല. പക്ഷെ നിങ്ങള് എന്നോടു ചോദിക്കുകയാണെങ്കില് ക്യാപ്റ്റനായി സഞ്ജുവിനെയാണ് ഞാന് തിരഞ്ഞെടുക്കുക. ഭാവിയില് വിരാട് കോലി നായകസ്ഥാനമൊഴിയുകയാണെങ്കില് ഒരു പിന്ഗാമിയെ ഇന്ത്യ കണ്ടുവയ്ക്കേണ്ടതുണ്ട്. അപ്പോള് സഞ്ജുവായിരിക്കണം ആ സ്ഥാനത്തേക്കു വരേണ്ടതെന്നും കനേരിയ അഭിപ്രായപ്പെട്ടു.
ആരെയെങ്കിലും വളര്ത്തിയെടുക്കണം
ഇന്ത്യയുടെ ഭാവി ക്യാപ്റ്റന് സ്ഥാനത്തേക്കു ഏതെങ്കിലുമൊരു താരത്തെ ഇന്ത്യ വളര്ത്തിയെടുക്കേണ്ടത് വളരെ പ്രധാനമാണ്. കോലി ഒഴിഞ്ഞാല് അതു ഏറ്റെടുക്കാന് ശേഷിയുള്ള ഒരാള് വേണം. അതിനുള്ള തയ്യാറെടുപ്പുകള് ഇന്ത്യ ഇപ്പോള് തന്നെ തുടങ്ങേണ്ടതുണ്ട്.
സഞ്ജുവാണ് ഈ സ്ഥാനത്തേക്കു വരേണ്ട താരമെന്നാണ് എന്റെ അഭിപ്രായം. ലങ്കന് പര്യടനത്തില് അദ്ദേഹത്തെ നായകസ്ഥാനമേല്പ്പിച്ച് ബിസിസിഐയ്ക്കു ഇപ്പോള് തന്നെ ഇതിനുള്ള ശ്രമങ്ങള് ആരംഭിക്കാവുന്നതാണ്. പക്ഷെ ധവാനായിരിക്കും ക്യാപ്റ്റന് സ്ഥാനത്തേക്കു പ്രഥമ പരിഗണ ലഭിക്കാനിടയുള്ളതെന്നും കനേരിയ തന്റെ യൂട്യുബ് ചാനലില് പറഞ്ഞു.
ധവാനെ ദീര്ഘകാലം ആശ്രയിക്കാനാവില്ല
ശിഖര് ധവാന് ഏകദിനം, ടി20 എന്നിവയില് വളരെ സീനിയറായിട്ടുള്ള താരമാണ്. അതുകൊണ്ടു തന്നെ ഭാവിയില് ഇന്ത്യയെ ദീര്ഘകാലത്തേക്കു നയിക്കാന് അദ്ദേഹത്തിനാവില്ല. അതിനാല് യുവതാരങ്ങളെയാവണം ഭാവി ക്യാപ്റ്റന് സ്ഥാനത്തേക്കു ഉയര്ത്തിക്കൊണ്ടു വരേണ്ടത്. ഹാര്ദിക് പാണ്ഡ്യയുള്പ്പെടെയുള്ളവര് ഉണ്ടെങ്കിലും ഞാന് സഞ്ജുവിനെയാണ് തിരഞ്ഞെടുക്കുകയെന്ന് കനേരിയ വ്യക്തമാക്കി. ടി20യില് ഇന്ത്യന് കുപ്പായമണിഞ്ഞെങ്കിലും ഏകദിനത്തില് സഞ്ജു ഇനിയും അരങ്ങേറിയിട്ടില്ല.
ഐപിഎല്ലിന്റെ 14ാം സീസണില് രാജസ്ഥാന് റോയല്സ് ടീമിന്റെ ക്യാപ്റ്റനായിരുന്നു മലയാളി താരം. സഞ്ജുവിന് കീഴില് മോശമല്ലാത്ത പ്രകടനം ടീം കാഴ്ചവയ്ക്കുകയും ചെയ്തിരുന്നു. ചേതന് സക്കരിയയെപ്പോലെയുള്ള പുതുമുഖങ്ങള് തുടര്ച്ചയായി അവസരം നല്കിയ സഞ്ജുവിന്റെ തീരുമാനങ്ങള് പ്രശംസിക്കപ്പെട്ടിരുന്നു.