Click it and Unblock the Notifications
ഐപിഎല്ലില്‍ ഒരേ ഫ്രാഞ്ചൈസിക്കു വേണ്ടി മൂന്നോ, നാലോ വര്‍ഷം തുടര്‍ച്ചയായി കളിക്കാന്‍ അവസരം ലഭിക്കാതിരുന്നതാണ് തനിക്കു തിരിച്ചടിയായതെന്നു യുവരാജ് വ്യക്തമാക്കി.
വിരാട് കോലി, എംഎസ് ധോണി, രോഹിത് ശര്‍മ എന്നിവരെല്ലാം ഏറെക്കാലമായി ഒരേ ഫ്രാഞ്ചൈസിക്കു വേണ്ടിയാണ് കളിച്ചു കൊണ്ടിരിക്കുന്നത്. ഇങ്ങനെ കളിച്ചാല്‍ മാത്രമേ ഒരു അടിത്തറയിടാന്‍ താരത്തിനാവുകയുള്ളൂ. നിര്‍ഭാഗ്യവശാല്‍ ഒരു ടീമിലും തനിക്ക് കൂടുതല്‍ കാലം ഇടം ലഭിച്ചില്ലെന്നു യുവി ഒരു ദേശീയ മാധ്യമത്തോടു പറഞ്ഞു.
പ്രഥമ സീസണ്‍ മുതല്‍ റോയല്‍ ചാലഞ്ചേഴ്‌സ് ബാംഗ്ലൂരിനു വേണ്ടി കളിച്ചു കൊണ്ടിരിക്കുകയാണ് കോലി. ധോണിയും ആദ്യ സീസണ്‍ മുതല്‍ ചെന്നൈ സൂപ്പര്‍ കിങ്‌സിനൊപ്പമുണ്ട്. സസ്‌പെന്‍ഷനെ തുടര്‍ന്ന് സിഎസ്‌കെ രണ്ടു വര്‍ഷം ഐപിഎല്ലില്‍ നിന്നും പുറത്തായതോടെ മാത്രമാണ് അദ്ദേഹത്തിന് മറ്റു ഫ്രാഞ്ചൈസിക്കായി കളിക്കേണ്ടി വന്നത്. രോഹിത്താവട്ടെ 2011 മുതല്‍ മുംബൈയ്‌ക്കൊപ്പമുണ്ട്.
കരിയറില്‍ നിരവധി ഫ്രാഞ്ചൈസികള്‍ക്കു വേണ്ടി ഐപിഎല്ലില്‍ യുവരാജ് കളിച്ചിട്ടുണ്ട്. കിങ്‌സ് ഇലവന്‍ പഞ്ചാബ്, പൂനെ വാരിയേഴ്‌സ് ഇന്ത്യ, റോയല്‍ ചാലഞ്ചേഴ്‌സ് ബാംഗ്ലൂര്‍, ഡല്‍ഹി ഡെയര്‍ഡെവിള്‍സ്, സണ്‍റൈസേഴ്‌സ് ഹൈദരാബാദ്, മുംബൈ ഇന്ത്യന്‍സ് ടീമുകള്‍ക്കു വേണ്ടിയാണ് യുവി കളിച്ചത്.
2008ല്‍ ഹോം ടീം കൂടിയായ പഞ്ചാബിലൂടെയാണ് താരത്തിന്റെ തുടക്കം. 2011ല്‍ യുവി രപൂനെ വാരിയേഴ്‌സിലെത്തി. 2014ല്‍ താരം ആര്‍സിബിയിലേക്കും 2015ല്‍ ഡല്‍ഹിയിലേക്കും ചേക്കേറി.
2016ല്‍ ഹൈദരാബാദിന്റെ ഭാഗമായ യുവരാജ് 18ല്‍ വീണ്ടും പഴയ തട്ടകമായ പഞ്ചാബിലെത്തി. 2019ല്‍ മുംബൈയ്ക്കു വേണ്ടിയാണ് ഓള്‍റൗണ്ടര്‍ അവസാനമായി കളിച്ചത്. കഴിഞ്ഞ സീസണിനു ശേഷം യുവിയെ മുംബൈ ഒഴിവാക്കുകയായിരുന്നു.
കിങ്‌സ് ഇലവന്റെ പഞ്ചാബിന്റെ ക്യാപ്റ്റന്‍സി തനിക്കു ലഭിച്ചിരുന്നെങ്കിലും ടീമില്‍ അസംതൃപ്തനായിരുന്നുവെന്നു യുവരാജ് വെളിപ്പെടുത്തി. ഐപിഎല്‍ കരിയറില്‍ ഏതെങ്കതിലുമൊരു ഫ്രാഞ്ചൈസിയില്‍ നിന്നും ഓഓടി രക്ഷപ്പെടാന്‍ ആഗ്രഹിച്ചിട്ടുണ്ടെങ്കില്‍ അതു പഞ്ചാബായിരുന്നു. താന്‍ ഏതു താരത്തെ വേണമെന്ന് ആവശ്യപ്പെട്ടാലും ഫ്രാഞ്ചൈസി ഇതു പരിഗണിക്കാന്‍ പോലും തയ്യാറായില്ല. അദ്ഭുതമെന്നു പറയട്ടെ, താന്‍ പഞ്ചാബ് വിട്ട ശേഷം നേരത്തേ ആവശ്യപ്പെട്ട കളിക്കാരെയെല്ലാം അവര്‍ ഫ്രാഞ്ചൈസിയിലേക്കു കൊണ്ടു വരികയും ചെയ്തു. ക്യാപ്റ്റനെന്ന വെറുമൊരു പേര് മാത്രമേ പഞ്ചാബില്‍ തനിക്കുണ്ടായിരുന്നുള്ളൂ. പഞ്ചാബിനായി കളിക്കാന്‍ തനിക്ക് ഇഷ്ടമായിരുന്നു. പക്ഷെ ആ ഫ്രാഞ്ചൈസിയില്‍ നിന്നും എങ്ങനെയെങ്കിലും രക്ഷപ്പെടാനാണ് ആഗ്രഹിച്ചതെന്നും യുവി വ്യക്തമാക്കി.
