ബാബര് കോലിയെപ്പോലെ
ആധുനിക ക്രിക്കറ്റിലെ ഏറ്റവും മികച്ച ബാറ്റ്സ്മാനും ഇന്ത്യന് നായകനുമായ വിരാട് കോലിയോടെയാണ് ബാബറിനെ ഫ്ളവര് ഉപമിച്ചത്. കോലിയെപ്പോലെ വിജയങ്ങള്ക്കായി അതിയായ ദാഹമുള്ള താരമാണ് ബാബറെന്ന് അദ്ദേഹം അഭിപ്രായപ്പെട്ടു.
ബാബര് വളരെ സ്പെഷ്യല് കളിക്കാരനാണ്. പാകിസ്താന് കണ്ട എക്കാലത്തെയും മികച്ച ബാറ്റ്സ്മാന്മാരില് ഒരാളായി അദ്ദേഹം മാറുമെന്നുറപ്പുണ്ട്. അടങ്ങാത്ത വിജതൃഷ്ണയുള്ള ബാബറിന് മികച്ച ഫിറ്റ്നസുണ്ട്. മാത്രമല്ല വളരെ ചെറുപ്പവുമാണെന്നും ഫ്ളവര് വിശദമാക്കി.
കഠിന പരിശീലനം
238 റണ്സിന്റെ വിജയലക്ഷ്യം പിന്തുടര്ന്ന പാക് ടീം മൂന്നിന് 110 റണ്സെന്ന നിലയിലുള്ളപ്പോഴാണ് ബാബര് ക്രീസിലെത്തിയത്. സമചിത്തതയോടെ കോലിയുടെ ശൈലിയില് സ്ട്രൈക്ക് റൊട്ടേറ്റ് ചെയ്ത് താരം ടീമിനെ മുന്നോട്ടു നയിക്കുകയായിരുന്നു.
പ്രതിഭയോടൊപ്പം കഠിനാധ്വാനം നടത്തുകയും ചെയ്യുന്നതാണ് ബാബറിന്റെ മികച്ച പ്രകടനത്തിനു കാരണം. അത്തരമൊരാള്ക്ക് ഉയരങ്ങള് കീഴടക്കാന് എങ്ങനെ കഴിയാതിരിക്കുമെന്നും ഫ്ളവര് ചോദിക്കുന്നു. ന്യൂസിലാന്ഡിനെതിരേ സെഞ്ച്വറി നേടിയതോടെ ഏകദിനത്തില് അതിവേഗം 3000 റണ്സ് തികച്ച രണ്ടാമത്തെ താരമായി ബാബര് മാറിയിരുന്നു.
ഫ്ളു പിടിപെട്ടു
ന്യൂസിലാന്ഡിനെതിരായ നിര്ണായക മല്സരത്തിനു തൊട്ടുമുമ്പ് കുറച്ചു ദിവസം ബാബര് ഫ്ളു പിടിപെട്ടു കിടക്കുകയായിരുന്നുവെന്ന് ഫ്ളവര് വെളിപ്പെടുത്തി. കിവീസിനെതിരായ മല്സരത്തിനു തലേ ദിവസമാണ് അദ്ദേഹം പരിശീലനം നടത്തിയത്. വളരെയധികം ആത്മവിശ്വാസത്തോടെ കളിച്ചു ബാബര് നേടിയ സെഞ്ച്വറിയായിരുന്നു കഴിഞ്ഞ മല്സരത്തിലേത്. ഇതുപോലൊരു ഇന്നിങ്സ് താരം മുമ്പ് കളിച്ചിട്ടുണ്ടാവില്ലെന്നും ഫ്ളവര് ചൂണ്ടിക്കാട്ടി.
നേരത്തേ ചില ഫ്ളാറ്റ് വിക്കറ്റുകളില് ബാബര് സെഞ്ച്വറി നേടുന്നത് കണ്ടിട്ടുണ്ട്. എന്നാല് വളരെ ദുഷ്കരമായ പിച്ചിലാണ് ന്യൂസിലാന്ഡിനെതിരേ അദ്ദേഹം സെഞ്ച്വറിയടിച്ചതെന്നും ഫ്ളവര് കൂട്ടിച്ചേര്ത്തു.