IPL 2026: 14-കാരൻ മുതൽ 14 കോടിയുടെ താരങ്ങൾ വരെ!; ഐപിഎല്ലിലെ ഭാവി സൂപ്പർ താരങ്ങൾ റെഡി

ഓരോ ഐപിഎൽ സീസണും ഇന്ത്യൻ ക്രിക്കറ്റിന് സമ്മാനിക്കുന്നത് പുതിയ താരോദയങ്ങളെയാണ്. ജസ്പ്രീത് ബുംറയും ഹാർദിക് പാണ്ഡ്യയും വളർന്നുവന്ന അതേ പാതയിലൂടെ, 2026 സീസണിൽ തങ്ങളുടെ പ്രതിഭ തെളിയിക്കാൻ ഒരുങ്ങുകയാണ് ഒരുപിടി യുവതാരങ്ങൾ. വമ്പൻ തുകയ്ക്ക് ടീമിലെത്തിയ അൺക്യാപ്പ്ഡ് താരങ്ങൾ മുതൽ റെക്കോർഡുകൾ തകർത്ത കൗമാരക്കാർ വരെ ഈ പട്ടികയിലുണ്ട്.

IPL 2026: ഇനി ഇഷാന്റെ ഓറഞ്ച് ആര്‍മി!! കപ്പുറപ്പ്, കമ്മിന്‍സ് വന്നാലും മാറ്റരുതെന്ന് ഫാന്‍സ്
1. വൈഭവ് സൂര്യവംശി (രാജസ്ഥാൻ റോയൽസ്)

ഐപിഎൽ ചരിത്രത്തിലെ ഏറ്റവും പ്രായം കുറഞ്ഞ താരമാണ് 14-കാരനായ വൈഭവ്. കഴിഞ്ഞ സീസണിൽ ഗുജറാത്ത് ടൈറ്റൻസിനെതിരെ വെറും 35 പന്തിൽ സെഞ്ച്വറി നേടി ഈ ഇടങ്കയ്യൻ ബാറ്റർ ലോകത്തെ ഞെട്ടിച്ചിരുന്നു. 206.55 എന്ന തകർപ്പൻ സ്ട്രൈക്ക് റേറ്റിൽ റൺസ് അടിച്ചുകൂട്ടുന്ന വൈഭവ്, ഇത്തവണ യശസ്വി ജയ്‌സ്വാളിനൊപ്പം രാജസ്ഥാന് വെടിക്കെട്ട് തുടക്കം നൽകുമെന്ന് ഉറപ്പാണ്.

2. ആയുഷ് മാത്രെ (ചെന്നൈ സൂപ്പർ കിംഗ്‌സ്)

ഇന്ത്യൻ അണ്ടർ-19 ടീമിനെ ലോകകപ്പ് കിരീടത്തിലേക്ക് നയിച്ച നായകനാണ് 18-കാരനായ ആയുഷ്. റുതുരാജ് ഗെയ്‌ക്‌വാദിന് പകരക്കാരനായി ചെന്നൈയിലെത്തിയ ആയുഷ്, അരങ്ങേറ്റത്തിൽ തന്നെ 15 പന്തിൽ 32 റൺസ് നേടി വരവറിയിച്ചു. ഇത്തവണ സഞ്ജു സാംസണോ റുതുരാജിനോ ഒപ്പം ചെന്നൈയുടെ ഇന്നിംഗ്‌സ് ഓപ്പൺ ചെയ്യാൻ ആയുഷ് എത്തും.

3. പ്രശാന്ത് വീർ (ചെന്നൈ സൂപ്പർ കിംഗ്‌സ്)

രവീന്ദ്ര ജഡേജയ്ക്ക് പകരക്കാരനായി 14.2 കോടി രൂപയ്ക്കാണ് ചെന്നൈ പ്രശാന്തിനെ ടീമിലെത്തിച്ചത്. പവർ ഹിറ്റിംഗിൽ മികവുള്ള ഈ ഇടങ്കയ്യൻ സ്പിൻ ഓൾറൗണ്ടറെ ആരാധകർ "മില്ലർ" എന്നാണ് വിളിക്കുന്നത്. എം.എസ്. ധോണിയുടെ പ്രത്യേക ഉപദേശങ്ങൾ പ്രശാന്തിന് വലിയ കരുത്താകും.

4. കാർത്തിക് ശർമ്മ (ചെന്നൈ സൂപ്പർ കിംഗ്‌സ്)

വിക്കറ്റ് കീപ്പർ ബാറ്ററായ കാർത്തിക്കിനെയും 14.2 കോടി രൂപയ്ക്കാണ് സിഎസ്കെ സ്വന്തമാക്കിയത്. സയ്യിദ് മുഷ്താഖ് അലി ട്രോഫിയിൽ 28 സിക്സറുകൾ പറത്തി വാർത്തകളിൽ നിറഞ്ഞ കാർത്തിക്കിന്, ധോണിയുടെയും സഞ്ജുവിന്റെയും കീഴിൽ ഫിനിഷിംഗ് പാഠങ്ങൾ പഠിക്കാൻ മികച്ച അവസരമാണിത്.

IPL 2026: ക്യാപ്റ്റന്‍സിയില്‍ ഗംഭീറിനും താഴെ കോലി!! ബെസ്റ്റ് 7 നായകര്‍, ചോപ്രയുടെ റാങ്കിങ് ഇങ്ങനെ
5. അശോക് ശർമ്മ (ഗുജറാത്ത് ടൈറ്റൻസ്)

മണിക്കൂറിൽ 140 കിലോമീറ്ററിലധികം വേഗത്തിൽ പന്തെറിയുന്ന അശോക് ശർമ്മ ഗുജറാത്തിന്റെ പുതിയ പേസ് സെൻസേഷനാണ്. ആശിഷ് നെഹ്‌റയുടെ കീഴിൽ പരിശീലനം നേടുന്ന ഈ 23-കാരൻ ആഭ്യന്തര ക്രിക്കറ്റിൽ വിക്കറ്റ് വേട്ടയിൽ മുന്നിലായിരുന്നു.

6. മങ്കേഷ് യാദവ് (റോയൽ ചലഞ്ചേഴ്സ് ബംഗളൂരു)

5.20 കോടി രൂപയ്ക്ക് ആർസിബി ടീമിലെത്തിച്ച മങ്കേഷ് യാദവ് ഒരു ഇടങ്കയ്യൻ പേസ് ഓൾറൗണ്ടറാണ്. മധ്യപ്രദേശ് പ്രീമിയർ ലീഗിലെ മിന്നും പ്രകടനമാണ് താരത്തെ ആർസിബിയിലെത്തിച്ചത്. യഷ് ദയാലിന് പകരക്കാരനായി പ്ലേയിംഗ് ഇലവനിൽ ഇടം പിടിക്കാൻ മങ്കേഷിന് സാധിക്കും.

7. സാഹിൽ പരഖ് (ഡൽഹി ക്യാപിറ്റൽസ്)

അണ്ടർ-19 ക്രിക്കറ്റിൽ ഓസ്‌ട്രേലിയക്കെതിരെ സെഞ്ച്വറി നേടിയ സാഹിൽ പരഖ് ഡൽഹി ക്യാപിറ്റൽസിന്റെ പുതിയ ഓപ്പണിംഗ് പ്രതീക്ഷയാണ്. ഏത് ബൗളറെയും ആദ്യ പന്ത് മുതൽ ആക്രമിച്ചു കളിക്കുന്ന ശൈലിയാണ് സാഹിലിന്റേത്.