എടിപി ടൂര്‍ ഫൈനല്‍സ്; സെമിയില്‍ ഫെഡറര്‍ സ്വെരേവ് പോരാട്ടം, ദ്യോക്കോവിച്ച് ആന്‍ഡേഴ്‌സണെ നേരിടും

ലണ്ടന്‍: എടിപി ടൂര്‍ ഫൈനല്‍സ് ടെന്നീസ് ടൂര്‍ണമെന്റിന്റെ സെമിഫൈനല്‍ ലൈനപ്പായി. ജര്‍മനിയുടെ അലക്‌സാണ്ടര്‍ സ്വെരേവ് സ്വിസ് താരം റോജര്‍ ഫെഡററെ നേരിടുമ്പോള്‍ സെര്‍ബിയന്‍താരം നൊവാക്ക് ദ്യോക്കോവിച്ചും ദക്ഷിണാഫ്രിക്കന്‍ താരം കെവിന്‍ ആന്‍ഡേഴ്‌സണും തമ്മിലാണ് മറ്റൊരു സെമി. കഴിഞ്ഞദിവസം നടന്ന മത്സരത്തില്‍ സ്വെരേവ് ജോണ്‍ ഇസ്‌നറെ പരാജയപ്പെടുത്തി. സ്‌കോര്‍ 7-6(7-5), 6-3.

ഫെഡററും, ആന്‍ഡേഴ്‌സണും, ദ്യോക്കോവിച്ചും നേരത്തെ തന്നെ സെമിയില്‍ ഇടം നേടിയിരുന്നു. ശേഷിക്കുന്ന സ്ഥാനക്കാരനെ കണ്ടെത്താനുള്ള മത്സരത്തില്‍ സ്വെരേവ് ജയിച്ചതോടെ ഇസ്‌നര്‍ പുറത്താവുകയും ചെയ്തു. മറ്റൊരു മത്സരത്തില്‍ ദ്യോക്കോവിച്ച് മരിന്‍ സിലിച്ചിനെ തോല്‍പ്പിച്ചു. 7-6(9-7), 6-2 എന്ന സ്‌കോറിനായിരുന്നു ദ്യോക്കോവിച്ചിന്റെ ജയം. ഇതോടെ ചാമ്പ്യന്‍ഷിപ്പിലെ എല്ലാ മത്സരങ്ങളും ദ്യോക്കോവിച്ച് ജയിച്ചു.

പതിനാലു തവണ ഗ്രാന്‍ഡ്സ്ലാം നേടിയ ദ്യോക്കോവിച്ചിന് തന്നെയാണ് കിരീട സാധ്യതയും. സിലിച്ചിനെതിരെ ആദ്യ സെറ്റില്‍ താരം പൊരുതിയെങ്കിലും രണ്ടാം സെറ്റ് ആധികാരികമായാണ് നേടിയത്. മുന്‍ ലോക ഒന്നാം നമ്പര്‍ റോജര്‍ ഫെഡറര്‍ ആദ്യ മത്സരത്തില്‍ ജപ്പാന്‍ താരം കെയ് നിഷികോരിയോട് തോറ്റിരുന്നു. ഫെഡറര്‍ ദ്യോക്കോവിച്ച് പോരാട്ടത്തിനായാണ് ടെന്നീസ് ആരാധകര്‍ കാത്തിരിക്കുന്നത്.