ആ ബാറ്റിങ് കൂട്ടുകെട്ട് ഇന്ത്യയുടെ റണ്‍ കുറച്ചു, സച്ചിന് നിരാശ; ഇങ്ങനെയായാല്‍ പോരാ

വിരാട് കോലിയും വിജയ് ശങ്കറും

വിരാട് കോലിയും വിജയ് ശങ്കറും ചേര്‍ന്ന കൂട്ടുകെട്ട് മോശമല്ലാത്ത രീതിയിലാണ് പുരോഗമിച്ചത്. ആദ്യം വിജയിയും പിന്നീട് കോലിയും പുറത്തായതോടെ ഇന്ത്യയുടെ റണ്‍നിരക്ക് കുത്തനെ താണു. അവസാന ഓവറുകളില്‍ വെടിക്കെട്ടിന് ശേഷിയുള്ള ഹാര്‍ദിക് പാണ്ഡ്യ പരാജയപ്പെട്ടതും ഇന്ത്യയ്ക്ക് കനത്ത തിരിച്ചടിയായി. 280 കടക്കുമെന്ന് കരുതിയിരുന്ന സ്‌കോര്‍ ആണ് ഒടുവില്‍ 224ല്‍ ഒതുങ്ങിയത്.

ധോണിയും ജാദവും നിരാശപ്പെടുത്തി

എംഎസ് ധോണിയും കേദാര്‍ ജാദവും ചേര്‍ന്ന സഖ്യമാണ് ഇന്ത്യയുടെ സ്‌കോര്‍ പിന്നോട്ട് വലിച്ചതെന്നാണ് സച്ചിന്‍ ടെണ്ടുല്‍ക്കറുടെ അഭിപ്രായം. നിരാശാജനകമായിരുന്നു ഇവരുടെ കൂട്ടുകെട്ടെന്ന് സച്ചിന്‍ പറയുന്നു. മത്സരത്തില്‍ 34 ഓവറുകള്‍ നമ്മള്‍ സ്പിന്നിനെയാണ് നേരിട്ടത്. ലഭിച്ചതാവട്ടെ 119 റണ്‍സും. ഈ മേഖലയില്‍ ഇന്ത്യ കാര്യമായി മെച്ചപ്പെടാനുണ്ടെന്നാണ് ഇത് ചൂണ്ടിക്കാണിക്കുന്നതെന്നും സച്ചിന്‍ വിലയിരുത്തി.

സ്‌ട്രൈക്ക് റേറ്റ് കുറഞ്ഞു.

ഓരോ ഓവറിലും രണ്ടും മൂന്നും ഡോട്ട് ബോളുകളാണ് വന്നത്. വിരാട് കോലി പുറത്തായശേഷം നമുക്ക് കാര്യമായി സ്‌കോര്‍ ചെയ്യാനേ സാധിച്ചില്ല. ഇത് പിന്നീട് വരുന്നവര്‍ക്ക് കടുത്ത സമ്മര്‍ദ്ദമുണ്ടാക്കി. മധ്യനിര ബാറ്റ്‌സ്മാന്മാര്‍ കൂടുതല്‍ വേഗത്തില്‍ റണ്‍സ് കണ്ടെത്താന്‍ ശ്രമിക്കണം. ജാദവ് കടുത്ത സമ്മര്‍ദ്ദത്തിലായിരുന്നു. സ്‌ട്രൈക്ക് കൈമാറി റണ്‍സ് കണ്ടെത്തുവാന്‍ കഴിയണമായിരുന്നെന്നും സച്ചിന്‍ പറഞ്ഞു.