ചിരിയാണ് ആ മരുന്ന്
ജീവിതത്തില് ഏതു മോശം അവസ്ഥകളെയും മറികടക്കാനുള്ള ഏറ്റവും നല്ല മരുന്ന് ചിരി തന്നെയാണെന്ന് കോലി ട്വിറ്ററില് കുറിച്ചു. ആര്സിബിയുടെ ഒരു പ്രോമോഷണല് വീഡിയോ ഷൂട്ടിങിന്റെ ഭാഗമായുള്ള വീഡിയോക്കൊപ്പമാണ് അദ്ദേഹം ഇങ്ങനെ ട്വീറ്റ് ചെയ്തത്.
കോലിക്കൊപ്പം ടീമംഗങ്ങളായ എബി ഡിവില്ലിയേഴ്സും യുസ്വേന്ദ്ര ചഹലും നൃത്തം ചെയ്യുന്നതാണ് വീഡിയോയിലുള്ളത്. മുന്നില് നില്ക്കുന്ന ചഹല് മതിമറന്ന് ചുവട് വയ്ക്കുമ്പോള് ചിരിച്ചു കൊണ്ട് കോലിയും എബിഡിയും തൊട്ടു പിറകില് ചുവട് വയ്ക്കുന്നതും കാണാം. പോസ്റ്റ് ചെയ്ത് രണ്ടു മണിക്കൂറുകള്ക്കു ശേഷം കോലി ഈ വീഡിയോ നീക്കം ചെയ്തിട്ടുമുണ്ട്.
കോലിയുടെ നിയന്ത്രണം വിട്ടു
മുംബൈക്കെതിരായ തൊട്ടുമുമ്പത്തെ കളിയില് അംപയര് തങ്ങള്ക്കു നോ ബോള് നിഷേധിച്ചത് കോലിയെ പ്രകോപിതനാക്കിയിരുന്നു. അവസാന പന്തില് ആര്സിബിക്കു ജയിക്കാന് ഏഴു റണ്സ് വേണമെന്നിരിക്കെയാണ് മുംബൈ പേസര് ലസിത് മലിങ്ക നോ ബോള് എറിഞ്ഞത്. എന്നാല് ഇത് അംപയറുടെ കണ്ണില് പെടാതിരുന്നതിനാല് ആര്സിബിക്കു നോ ബോള് റണ്സും ഫ്രീഹിറ്റും അനുവദിക്കപ്പെട്ടില്ല. ആറു റണ്സിനാണ് ആര്സിബി മല്സരം കൈവിട്ടത്.
മല്സരശേഷം മാച്ച് റഫറിയുടെ റൂമിലെത്തിയ കോലി അദ്ദേഹത്തെ വിമര്ശിക്കുകയും ചെയ്തിരുന്നു. താരത്തിനെതിരേ ശിക്ഷ നടപടിയുണ്ടായേക്കുമോയെന്ന ആശങ്കയിലാണ് ഇപ്പോള് ആര്സിബി ആരാധകര്.
ക്ലബ്ബ് ക്രിക്കറ്റല്ലെന്നു കോലി
മല്സരശേഷം മാധ്യമങ്ങളോട് സംസാരിക്കവെ അംപയറുടെ പിഴവിനെ കടുത്ത ഭാഷയിലാണ് കോലി വിമര്ശിച്ചത്. ഐപിഎല്ലിന് ഒരു നിലവാരമുണ്ട്, അതിന് അനുസരിച്ചാണ് കളിക്കുന്നത്. ഇതു ക്ലബ്ബ് ക്രിക്കറ്റല്ല. അവസാന പന്ത് നോ ബോള് വിളിക്കാതിരുന്നത് വളരെ വലിയ അബദ്ധം തന്നെയാണ്. അംപയര്മാര് കണ്ണ് തുറന്നു വയ്ക്കേണ്ടിയിരുന്നു. അത് നോബോള് വിളിച്ച് ഒരു പന്ത് തങ്ങള്ക്ക് അധികമായി ലഭിച്ചിരുന്നെങ്കില് ഒരുപക്ഷെ മല്സരഫലം തന്നെ മാറിയേനെയെന്നും കോലി ചൂണ്ടിക്കാട്ടിയിരുന്നു.