സച്ചിന്‍ അരങ്ങേറുമ്പോള്‍ കോലി എവിടെയായിരുന്നു?

വിരാട് കോലി

സച്ചിന്റെ പിന്‍ഗാമിയാകാന്‍ ഏറ്റവും സാധ്യത കല്‍പ്പിക്കുന്ന പ്രതിഭാ ശാലി. സച്ചിന്‍ ആദ്യ മത്സരം കളിക്കാനിറങ്ങിയ നവംബര്‍ പതിനഞ്ചിന് വെറും പത്ത് ദിവസം മുന്‍പ് ഒന്നാം പിറന്നാള്‍ ആഘോഷിച്ചിട്ടേയുള്ളൂ വിരാട്. 1988 നവംബര്‍ 5 നാണ് കോലി ജനിച്ചത്.

സര്‍ ജഡേജ

ഒരു വയസ്സുപോലും തികയാത്ത ജഡ്ഡു തൊട്ടിലില്‍ കിടക്കുകയായിരുന്നു അക്കാലത്ത്. 1988 ഡിസംബര്‍ ആറിനാണ് ജഡേജ ജനിച്ചത്.

യുവരാജ്

എട്ട് വയസ്സുള്ള യുവരാജ് അച്ഛന്‍ യോഗ് രാജിനൊപ്പം ക്രിക്കറ്റ് പരിശീലനം തുടങ്ങിക്കാണണം. യുവി ജനിച്ചത് 1981 ഡിസംബര്‍ 12 നാണ്.

എം എസ് ധോണി

സച്ചിന്‍ പാകിസ്ഥാനെതിരെ അരങ്ങേറുമ്പോള്‍ നാലാം ക്ലാസില്‍ പഠിക്കുകയായിരുന്നു ധോണി. 1981 ജൂലൈ 7 നാണ് മഹി ജനിച്ചത്.

മുരളി വിജയ്

അഞ്ച് വയസ്സുള്ള മുരളി വിജയ് ഒന്നാം ക്ലാസില്‍ തറ പറ എഴുതിപ്പഠിക്കുകയായിരുന്നു 1989 ല്‍

ശിഖര്‍ ധവാന്‍

നാലുവയസ്സുള്ള ശിഖര്‍ ധവാനെ ഒന്നാം ക്ലാസില്‍ ചേര്‍ക്കുന്നതിനെക്കുറിച്ച് വീട്ടുകാര്‍ ആലോചിക്കുന്നതേ ഉണ്ടാകാനിടയുള്ളൂ. 1985 ഡിസംബര്‍ അഞ്ചിനായിരുന്നു ധവാന്റെ ജനനം.

സേവാഗ്

കളിയൊക്കെ പഠിച്ചെങ്കിലും വീരു ക്രിക്കറ്റ് അത്ര കാര്യമായി എടുത്തിട്ടുണ്ടായിരുന്നില്ല അന്ന്. സച്ചിന്റെ കളി കണ്ടാണ് താന്‍ ക്രിക്കറ്റ് സീരിയസായി എടുക്കുന്നതെന്ന് സേവാഗ് തന്നെ പറഞ്ഞിട്ടുണ്ട്. 1978 ഒക്ടോബര്‍ 20 നായിരുന്നു വീരുവിന്റെ ജനനം.

ശ്രീശാന്ത്

ആറ് വയസ്സുകാരനായ ശ്രീശാന്ത് സ്‌കൂള്‍മുറ്റത്ത് ലെഗ് സ്പിന്‍ എറിഞ്ഞുനടക്കുകയായിരുന്നു 1989ല്‍. ഇന്ത്യ ലോകകപ്പ് നേടിയ 83 ലെ ഫെബ്രുവരിയിലാണ് ശ്രീ ജനിച്ചത്.

ദ്രാവിഡ്

കര്‍ണാടകയ്ക്ക് വേണ്ടി ജൂനിയര്‍ ലെവലില്‍ നേട്ടങ്ങള്‍ കൊയ്ത് തുടങ്ങിയിരുന്നു ദ്രാവിഡ്. സച്ചിനെക്കാള്‍ മൂന്ന് മാസത്തിന് മൂത്ത ദ്രാവിഡ് ജനിച്ചത് 1973 ജനുവരി 11 നാണ്.

ചേതേശ്വര്‍ പൂജാര

ജൂനിയര്‍ ദ്രാവിഡ് എന്ന് വിളിപ്പേരുള്ള ചേതേശ്വര്‍ പൂജാരയ്ക്ക് 22 മാസം പ്രായമാണ് സച്ചിന്‍ ആദ്യകളിക്ക് ഗാര്‍ഡെഡുക്കുമ്പോള്‍. 1988 ജനുവരി 25 നാണ് പൂജാര ജനിച്ചത്.