Click it and Unblock the Notifications
ഒരിക്കലും അംഗീകരിക്കാനാവില്ല
എവിടെയാണ് ആര്‍സിബി മല്‍സരം കൈവിട്ടത് എന്ന കാര്യത്തില്‍ അധികം ചിന്തിക്കേണ്ടതില്ല. അവസാന നാലോവറിലെ ബൗളിങ് ഒരിക്കലും അംഗീകരിക്കാന്‍ കഴിയില്ല. കൂടുതല്‍ തന്ത്രപരമായി ബൗളര്‍മാര്‍ പന്തെറിയേണ്ടിയിരുന്നു. എന്നാല്‍ അതുണ്ടായില്ല. സമ്മര്‍ദ്ദത്തിനു വഴങ്ങി മല്‍സരം കൈവിടേണ്ടി വരികയായിരുന്നുവെന്നും മല്‍സരശേഷം കോലി ചൂണ്ടിക്കാട്ടി.
അവസാനത്തെ നാലോവറില്‍ മാത്രം 71 റണ്‍സാണ് കെകെആര്‍ വാരിക്കൂട്ടിയത്. ഇതില്‍ ടിം സോത്തിയുടെ 19ാം ഓവറില്‍ മാത്രം കെകെആറിന് 29 റണ്‍സ് ലഭിച്ചു. നാലു സിക്‌സറുകളും ഒരു ബൗണ്ടറിയും ഈ ഓവറിലുണ്ടായിരുന്നു.
ധൈര്യം കാണിക്കേണ്ടിയിരുന്നു
നിര്‍ണായക ഓവറുകളില്‍ ബൗളര്‍മാര്‍ ധൈര്യത്തോടെ പന്തെറിയണമായിരുന്നുവെന്ന് കോലി പറഞ്ഞു. പ്രതിസന്ധി ഘട്ടങ്ങളില്‍ ധൈര്യപൂര്‍വ്വം ബൗള്‍ ചെയ്തില്ലെങ്കില്‍ റസ്സലിനെപ്പോലുള്ള വമ്പനടിക്കാരെ പിടിച്ചുനിര്‍ത്തുക ദുഷ്‌കരമാണെന്നും അദ്ദേഹം ചൂണ്ടിക്കാട്ടി.
84 റണ്‍സിനാണ് മല്‍സരത്തില്‍ കോലി പുറത്തായത്. കളിയുടെ ആ ഘട്ടത്തില്‍ പുറത്തായപ്പോള്‍ നിരാശനായിരുന്നു. 20-25 റണ്‍സ് കൂടി തങ്ങള്‍ക്കു നേടാമായിരുന്നു. അവസാനത്തേക്ക് എബിഡിക്ക് കൂടുതല്‍ പന്തുകള്‍ നേരിടാന്‍ കഴിഞ്ഞതുമില്ല. എങ്കിലും ജയിക്കാവുന്ന സ്‌കോറായിരുന്നു 205 എന്നാണ് കരുതിയതെന്നും കോലി വിശദമാക്കി.
നാലോവറില്‍ 75 റണ്‍സ് പ്രതിരോധിക്കാനായില്ല
നാലോവറില്‍ 75 റണ്‍സ് പോലും പ്രതിരോധിക്കാന്‍ കഴിഞ്ഞില്ലെങ്കില്‍ 100 റണ്‍സ് പ്രതിരോധിക്കുന്നതു പോലും അസാധ്യമാണ്. എവിടെയാണ് പിഴച്ചതെന്നതിനെക്കുറിച്ച് മല്‍സരശേഷം ടീമുമായി സംസാരിച്ചിരുന്നു. അതല്ലാതെ വേറെയൊന്നും സംസാരിക്കാന്‍ ഉണ്ടായിരുന്നില്ല. എല്ലായ്‌പ്പോഴും ഇങ്ങനെ സംസാരിച്ചതു കൊണ്ടു മാത്രം എന്തെങ്കിലും പ്രയോജനമുണ്ടാവുമെന്നും കരുതുന്നില്ല.
അടുത്ത മല്‍സരത്തില്‍ കൂടുതല്‍ കരുത്തോടെ തിരിച്ചുവരാനുള്ള അവസരം ടീമിന് നല്‍കൂ. ഈ സീസണ്‍ ഇതുവരെ വളരെ നിരാശാജനകമാണ്. എങ്കിലും തിരിച്ചുവരാമെന്ന പ്രതീക്ഷ ഇപ്പോഴും കൈവിട്ടിട്ടില്ലെന്നും കോലി കൂട്ടിച്ചേര്‍ത്തു.
