കരുത്തോടെ മുംബൈ
ആദ്യ മത്സരങ്ങളില് താളം കണ്ടെത്താന് സാധിക്കാതിരുന്ന മുംബൈയുടെ ബാറ്റിങ് നിര ഫോമിലേക്കുയര്ന്നിട്ടുണ്ട്. ഓപ്പണിങ്ങില് രോഹിത് ശര്മയ്ക്കൊപ്പം ക്വിന്റന് ഡീ കോക്കും തിളങ്ങുന്നു. ആദ്യ മത്സരങ്ങളില് മികവിനൊത്ത് ഉയരാന് സാധിക്കാതിരുന്ന സൂര്യകുമാര് യാദവും ബാറ്റിങില് താളം കണ്ടെത്തിക്കഴിഞ്ഞു. ചെന്നൈയ്ക്കെതിരായ മത്സരത്തില് നിര്ണ്ണായക അര്ദ്ധ സെഞ്ച്വറിയുമായി സൂര്യകുമാര് തിളങ്ങി. എന്നാല് യുവരാജ് സിങ് തുടര്ച്ചയായി പരാജയപ്പെടുന്നത് ടീമിനെ ബാധിക്കുന്നു. യുവരാജിന് പകരം ഇഷാന് കിഷന് പരീക്ഷിക്കാമെങ്കിലും മുംബൈ യുവരാജിന് ഇന്നും അവസരം നല്കുമെന്നാണ് വിവരം. മധ്യനിരയില് ക്രുണാല് പാണ്ഡ്യയും ഫോം കണ്ടെത്തിക്കഴിഞ്ഞു. അവസാന രണ്ട് മത്സരങ്ങളിലും അവസാന ഓവറുകളില് മികച്ച പ്രകടനം പുറത്തെടുക്കുന്ന ഹര്ദിക്ക് പാണ്ഡ്യയും കീറോണ് പൊള്ളാര്ഡും മുംബൈയ്ക്ക് കരുത്ത് പകരുന്നു.
ലസിത് മലിംഗയുടെ അഭാവം
ബൗളിങ് നിരയില് ലസിത് മലിംഗയുടെ അഭാവം ടീമിലുണ്ട്. ഡെത്ത് ഓവറുകളില് ബൂംറയ്ക്ക് പിന്തുണയേകാന് മലിംഗയുടെ മികവിനൊത്ത് ബെഫറന്ഡോര്ഫിന് സാധിക്കുമോയെന്ന് കാത്തിരുന്ന് കാണണം. ന്യൂബോളില് മികച്ച സ്വിങ് കണ്ടെത്താന് ബെഫറന്ഡോര്ഫിന് കഴിയുന്നുണ്ട്. മലിംഗയുടെ അഭാവത്തില് മിച്ചല് മഗ്ലെങ്ങന് മുംബൈ നിരയില് തിരിച്ചെത്തിയേക്കും. സ്പിന് ബൗളറായി മായങ്ക് മാര്ക്കണ്ഡെയ്ക്ക്് അവസരം ലഭിച്ചേക്കും.
വെടിക്കെട്ട് ഓപ്പണര്മാരെ മുംബൈ ഭയക്കണം
ഹൈദരാബാദിന്റെ ഓപ്പണര്മാരായ ഡേവിഡ് വാര്ണറുടെയും ജോണി ബെയര്സ്റ്റോയുടെയും പ്രകടനം ഹൈദരാബാദിന്റെ ജയത്തില് നിര്ണ്ണായകമാവും.നാല് മത്സരത്തില് നിന്ന് 88 ശരാശരിയില് 264 റണ്സുമായി വാര്ണറാണ് നിലവിലെ ടോപ് സ്കോറര്മാരില് മുന്നില്. നാല് മത്സരത്തില് നിന്ന് 61.50 ശരാശരിയില് 246 റണ്സ് നേടിയ ജോണി ബെയര്സ്റ്റോ രണ്ടാം സ്ഥാനത്തുമുണ്ട്. ഇന്ത്യന് ഓള്റൗണ്ടര് വിജയ് ശങ്കര് മികച്ച ബാറ്റിങ് പ്രകടനമാണ് പുറത്തെടുക്കുന്നത്. കെയ്ന് വില്യംസണിന്റെ അഭാവത്തില് മൂന്നാം നമ്പറില് വിജയ് ആണ് ബാറ്റിങ്ങിനിറങ്ങുന്നത്. മനീഷ് പാണ്ഡെ,ദീപക് ഹൂഡ,യൂസഫ് പഠാന് എന്നിവരടങ്ങുന്ന ബാറ്റിങ് നിര നിലവാരത്തിനൊത്ത് ഉയരുന്നില്ല. അവസാന ഓവറുകളില് മുഹമ്മദ് നബി നടത്തുന്ന ബാറ്റിങ് വെടിക്കെട്ടും ആതിഥേയര്ക്ക് പ്രതീക്ഷ നല്കുന്നു.
ബൗളിങിലും ഹൈദരാബാദ് ശക്തരാണ്
ബൗളിങിലും ഹൈദരാബാദ് ശക്തരാണ്. ഭുവനേശ്വര് കുമാറിന്റെയും സിദ്ധാര്ത്ഥ് കൗളിന്റെയും സന്ദീപ് ശര്മയുടെയും ഫാസ്റ്റ് ബൗളിങ്ങിനൊപ്പം നബിയുടെയും റാഷിദ് ഖാന്റെയും സ്പിന് ബൗളിങും എതിരാളികളെ വെള്ളം കുടിപ്പിക്കുന്നു. എന്തായാലും സന്ദര്ശകരായെത്തി ഹൈദരാബാദിനെ കീഴ്പ്പെടുത്താന് മികച്ച പോരാട്ടം തന്നെ മുംബൈക്ക് പുറത്തെടുക്കേണ്ടി വരും.
കണക്കില് ഹൈദരാബാദ്
ഇതുവരെ 12 തവണ ഇരു ടീമും നേര്ക്കുനേര് എത്തിയപ്പോള് ഏഴ് തവണയും ജയം ഹൈദരാബാദിനായിരുന്നു. അഞ്ച് തവണ മുംബൈയും ജയിച്ചു. ഹൈദരാബാദില് ആറ് തവണയാണ് ഇരു ടീമും ഏറ്റുമുട്ടിയത്. ഇതില് നാല് തവണയും ജയം സണ്റൈസേഴ്സിനായിരുന്നു. രണ്ട് തവണ മാത്രമാണ് മുംബൈക്ക് ജയിക്കാനായത്.