ലോകകപ്പ്: ഫേവറിറ്റുകള്‍ക്ക് നോക്കൗട്ട് പേടി..... ഈ പിച്ച് വന്നാല്‍ പാളും, കാരണം ഇതാണ്

ഇംഗ്ലണ്ട് പതറും

എഡ്ജ്ബാസ്റ്റണിലാണ് ഇംഗ്ലണ്ടിന്റെ സെമി ഫൈനല്‍ മത്സരം നടക്കുന്നത്. ഇവിടെ ടോസ് നിര്‍ണായകമാണ്. തുടക്കത്തില്‍ തന്നെ അടിച്ചുതകര്‍ക്കാനും ഇവിടെ സാധിക്കില്ല. പക്ഷേ ഇംഗ്ലണ്ട് ബാറ്റ്‌സ്മാന്‍മാര്‍ ഈ പിച്ച് അത്ര നല്ല അനുഭവമല്ല നല്‍കുക. വേഗം കുറഞ്ഞ പിച്ചുകളില്‍ ഇംഗ്ലണ്ടിന് വലിയ സ്‌കോര്‍ കണ്ടെത്തുക എക്കാലത്തും പ്രയാസമാണ്. ഇംഗ്ലണ്ട് ഓപ്പണര്‍മാരായ ജോണി ബെയര്‍സ്‌റ്റോയും ജേസന്‍ റോയിയും സ്പിന്‍ കളിക്കുന്നതില്‍ ദൗര്‍ബല്യമുള്ളവരാണ്. ആദം സാമ്പയെ പോലുള്ള ലെഗ് സ്പിന്നര്‍ വന്നാല്‍ ഇവര്‍ എളുപ്പത്തില്‍ പുറത്താകും. അത് ഇംഗ്ലണ്ടിന്റെ തകര്‍ച്ചയിലേക്ക് നയിക്കും.

കെട്ടുറപ്പില്ലാത്ത ബാറ്റിംഗ് നിര

ഓപ്പണിംഗാണ് ഇംഗ്ലണ്ടിനെ താങ്ങി നിര്‍ത്തുന്നത്. ജോ റൂട്ട് മികച്ച ബാറ്റ്‌സ്മാനാണ്. പക്ഷേ വേഗത്തില്‍ സ്‌കോര്‍ ചെയ്യാന്‍ അദ്ദേഹത്തിന് ബുദ്ധിമുട്ടുന്നുണ്ട്. ബെന്‍ സ്‌റ്റോക്‌സ് തുടര്‍ച്ചയായി പന്തുകള്‍ പാഴാക്കിയാല്‍ പ്രതിരോധത്തിലാവുന്ന താരമാണ്. ന്യൂസിലന്റിനെതിരെയുള്ള മത്സരത്തില്‍ സ്‌റ്റോക്‌സ് 27 പന്തുകള്‍ കളിച്ചെങ്കിലും പരാജയപ്പെട്ടു. പിച്ചിന് വേഗം കുറഞ്ഞതാണ് സ്റ്റോക്‌സിനെയും കുരുക്കിയത്. ഓയിന്‍ മോര്‍ഗന്‍, ക്രിസ് വോക്‌സ്, എന്നിവര്‍ക്കും കാര്യമായ ദൗര്‍ബല്യങ്ങള്‍ ഉണ്ട്.

പിന്തുടരുന്നത് ദൗര്‍ബല്യം

ഇംഗ്ലണ്ട് ടൂര്‍ണമെന്റില്‍ തോറ്റ മത്സരങ്ങളെല്ലാം ചേസ് ചെയ്യുന്നതിലാണ് പരാജയപ്പെട്ടത്. പാകിസ്താനെതിരെയായിരുന്നു തുടക്കം. പിന്നീട് ഓസ്‌ട്രേലിയയോടും ശ്രീലങ്കയോടും ചേസ് ചെയ്ത് പരാജയപ്പെട്ടു. ഈ പിച്ചുകളെല്ലാം ബൗളിംഗ് പിച്ചുകളാണ്. ഇത്തരം പിച്ചുകളില്‍ ചെറിയ സ്‌കോര്‍ പോലും പിന്തുടരാന്‍ ഇംഗ്ലണ്ടിന് സാധിക്കില്ല. അതേസമയം സെമി ഫൈനലില്‍ ഓസീസ് എന്ത് വിജയലക്ഷ്യം ഉയര്‍ത്തിയാലും അത് മറികടക്കുമെന്ന് ഇംഗ്ലണ്ട് കോച്ച് ട്രെവര്‍ ബെയ്‌ലിസ് പറയുന്നു. പക്ഷേ അത് കണ്ടറിയേണ്ടി വരും.

സമ്മര്‍ദങ്ങള്‍ അതിജീവിക്കണം

സമ്മര്‍ദങ്ങളെ അതിജീവിക്കാന്‍ ഇംഗ്ലണ്ട് കരുത്തില്ല എന്ന പ്രധാന പ്രശ്‌നം. ലോകകപ്പിലെ ഫേവറിറ്റുകളായത് കൊണ്ട് നഷ്ടപ്പെടാന്‍ ഇംഗ്ലണ്ടിനാണ് ഉള്ളതെന്ന് ഓസീസ് സ്പിന്നര്‍ നഥാന്‍ ലിയോണും പറഞ്ഞ് കഴിഞ്ഞു. ഷോര്‍ട്ട് പിച്ച് പന്തുകള്‍ കളിക്കുന്നതില്‍ ഇംഗ്ലീഷ് ക്യാപ്റ്റന്‍ ഓയിന്‍ മോര്‍ഗനുള്ള ദൗര്‍ബല്യവും ഓസീസ് ചൂഷണം ചെയ്യും. ഇന്ത്യ ഫൈനലില്‍ രവീന്ദ്ര ജഡേജയെ ഇംഗ്ലണ്ടിനെതിരെ കളിപ്പിച്ചാല്‍ അത് ടീമിന് വലിയ തലവേദനയാവും. ബൗളിംഗ് പിച്ചുകളില്‍ ഇംഗ്ലണ്ടിനുള്ള ദൗര്‍ബല്യം ഒരിക്കല്‍ കൂടി അവര്‍ക്ക് തിരിച്ചടിയാവാതിരിക്കാന്‍ ബൗളര്‍മാര്‍ നന്നായി എറിയേണ്ടി വരും.