ത്രില്ലടിപ്പിച്ച ഫൈനല്
അര്ജന്റീന- ഫ്രാന്സ് ഫൈനല് ഒരു ലോകകപ്പ് കലാശപ്പോരിന്റെ വീറും വാശിയുമെല്ലാം നിറഞ്ഞുനിന്നതായിരുന്നു. 80ാം മിനിറ്റ് വരെ അര്ജന്റീന മാത്രമേ കളിയിലുണ്ടായിരുന്നുള്ളൂ. 2-0ന്റെ ലീഡുമായി അവര് വിജയവും കിരീടവും ഉറപ്പിച്ചിരിക്കുകയായിരുന്നു. പക്ഷെ ക്ലൈമാക്സിലാണ് അപ്രതീക്ഷിത ട്വിസ്റ്റ് സംഭവിച്ചത്.
80, 81 മിനിറ്റുകളില് സൂപ്പര് താരം കിലിയന് എംബാപ്പെയുടെ ഇരട്ട ഗോളുകള് അര്ജന്റീനയ്ക്കു ഷോക്കായിരുന്നു. അതിനു ശേഷമാണ് കളി യഥാര്ഥ ഫൈനലായത്.
എക്സ്ട്രാ ടൈം ഗോള്
നിശ്ചിത സമയത്തു ഇരുടീമുകളും 2-2നു തുല്യത പാലിച്ചതോടെ കലാശപ്പോര് എക്സ്ട്രാ ടൈമിലെത്തുകയായിരുന്നു. എക്സ്ട്രാ ടൈമിന്റെ ആദ്യ പകുതിയില് ലയണല് മെസ്സിയുടെ ഗോളില് അര്ജന്റീന 3-2നു ലീഡ് തിരിച്ചുപിടിച്ചു. 108ാം മിനിറ്റിലായിരുന്നു ഈ ഗോള്.
വലതു വിങിലൂടെയുള്ള അതിവേഗ മുന്നേറ്റത്തില് നിന്നായിരുന്നു ഇത്. ബോക്സിലേക്കു വന്ന മനോഹരമായ ത്രൂബോള് ഓഫ് സൈഡ് കെണി പൊട്ടിച്ച് ലൊറ്റാറോ മാര്ട്ടിനസിന്റെ കാലിലേക്ക്. മുന്നില് ഗോളി ഹ്യൂ ഗോ ലോറിസ് മാത്രം. മാര്ട്ടിനസിന്റെ ഷോട്ട് ലോറിസ് ബ്ലോക്ക് ചെയ്തെങ്കിലും റീബൗണ്ട് ചെയ്ത ബോള് മെസ്സി വലയിലേക്കു തട്ടിയിടുകയായിരുന്നു.
ഫ്രഞ്ച് താരം വലയ്ക്കുള്ളില് നിന്നും ഇതു ക്ലിയര് ചെയ്തെങ്കിലും ബോള് അപ്പോഴേക്കും ഗോള്വര കടന്നിരുന്നു. അര്ജന്റീന 3-2ന് മുന്നില് കടക്കുകയും ചെയ്തു.
Also Read: IND vs SL: ലങ്കയ്ക്കെതിരേ ഇവര്ക്ക് ഇന്ത്യന് അരങ്ങേറ്റം, ആരൊക്കെയെന്നറിയാം
വറാന്റെ സഹായം
ലയണല് മെസ്സിയുടെ എക്സ്ട്രാ ടൈമിലെ ഈ ഗോളിനാണ് റാഫേല് വറാനിന്റെ സഹായം അര്ജന്റീനയ്ക്കു ലഭിച്ചത്. ബോക്സിലേക്കു വന്ന ത്രൂബോള് ലൊറ്റാറോ മാര്ട്ടിനസ് സ്വീകരിക്കുമ്പോള് അതേ ലൈനില് തന്നെ വറാനുമുണ്ടായിരുന്നു. വറാന് ഒന്നു കുനിഞ്ഞു നിന്നതു കൊണ്ടു മാത്രം അദ്ദേഹത്തിന്റെ പിന്ഭാഗവും മാര്ട്ടിനസിന്റെ കൈയും ഒരേ ലൈനില് ആവുകയായിരുന്നു.
വറാന് അപ്പോള് നേരെയാണ് നിന്നിരുന്നതെങ്കില് മാര്ട്ടിനസിന്റെ വലതു കൈ ഓഫ്സൈഡ് പൊസിഷനിലുണ്ടായിരുന്നു. പക്ഷെ വറാന്റെ പിന്ഭാഗം കാരണം അര്ജന്റീന ഓഫ് സൈഡില് നിന്നും അദ്ഭുതകരമായി രക്ഷപ്പെടുകയും ഗോള് അനുവദിക്കപ്പെടുകയുമായിരുന്നു.
Also Read: IPL 2023: സിഎസ്കെ ആരെയൊക്കെ റാഞ്ചും? സാധ്യത ഈ അഞ്ചു പേര്ക്ക്
ഈ ഗോള് കൊണ്ടും അര്ജന്റീന രക്ഷപ്പെട്ടില്ല
റാഫേല് വറാനിന്റെ സഹായം കൊണ്ട് ലഭിച്ച എക്സ്ട്രാ ടൈമിലെ ഗോള് കൊണ്ടും അര്ജന്റീനയ്ക്കു കിരീടമുറപ്പിക്കാനായില്ല. എക്സ്ട്രാ ടൈമിന്റെ രണ്ടാം പകുതിയില് കളി തീരാന് രണ്ടു മിനിറ്റ് ബാക്കിയുള്ളപ്പോള് കിലിയന് എംബാപ്പെയുടെ പെനല്റ്റി ഗോളില് ഫ്രാന്സ് വീണ്ടും സമനില പിടിച്ചുവാങ്ങി.
പക്ഷെ പെനല്റ്റി ഷൂട്ടൗട്ടില് ഭാഗ്യം അര്ജന്റീനയ്ക്കൊപ്പം നിന്നു. ലഭിച്ച നാലു കിക്കുകളും അവര് ഗോളാക്കി മാറ്റി. ഫ്രാന്സിനായി രണ്ടു പേര് ലക്ഷ്യം കണ്ടപ്പോള് രണ്ടെണ്ണം പാഴാവുകയായിരുന്നു.