ഔദ്യോഗിക അറിയിപ്പെത്തി
ബുംറയുടെ പരിക്ക് വിശദമായി പരിശോധിക്കുകയും സ്പെഷ്യലിസ്റ്റുകളുടെ നിര്ദേശം അനുസരിച്ച് ബുംറ ലോകകപ്പിനുണ്ടാവില്ലെന്നാണ് ബിസിസി ഐ വാര്ത്താ കുറിപ്പിലൂടെ അറിയിച്ചത്. ഇന്ത്യയുടെ പ്രധാന ബൗളറാണ് ബുംറ. അദ്ദേഹം ഇല്ലാതെ ലോകകപ്പിനിറങ്ങുന്നത് ഇന്ത്യയെ പ്രതികൂലമായി ബാധിക്കുമെന്നത് ഉറപ്പാണ്. ക്യാപ്റ്റന് രോഹിത് ശര്മക്കും വലിയ തലവേദനയായി ബുംറയുടെ അഭാവം മാറും.
ദക്ഷിണാഫ്രിക്കയ്ക്കെതിരായ ടി20 പരമ്പരയില് ബുംറയുമുണ്ടായിരുന്നു. ആദ്യ മത്സരത്തിന് ശേഷം പരിക്കേറ്റ ബുംറ പുറത്തായെങ്കിലും ലോകകപ്പ് കളിക്കുമെന്ന പ്രതീക്ഷയുണ്ടായിരുന്നു. എന്നാല് പരിക്ക് ഗുരുതരമാണെന്ന് വ്യക്തമായതോടെ ലോകകപ്പ് പ്രതീക്ഷകള് അസ്തമിക്കുകയായിരുന്നു. ഇന്ത്യയുടെ ബൗളിങ് നിര വലിയ പ്രതിസന്ധി നേരിടുന്ന സാഹചര്യത്തിലാണ് ബുംറയും ലോകകപ്പില് നിന്ന് പുറത്താകുന്നതെന്നത് ഇന്ത്യക്ക് ഇരട്ടി പ്രഹരമായിരിക്കുന്നു.
Also Read : രോഹിത് ശര്മയേക്കാള് ചെറുപ്പം, പക്ഷെ ഇതിനോടകം വിരമിച്ചു!, അഞ്ച് താരങ്ങളിതാ
2018ല് മുതല് പരിക്ക് വേട്ടയാടുന്നു
2018 മുതല് ബുംറയെ പരിക്ക് വേട്ടയാടുന്നുണ്ട്. പഴയ പരിക്ക് തന്നെയാണ് ഇപ്പോഴും അദ്ദേഹത്തെ പിന്തുടരുന്നത്. 2019ല് പരിക്കിനെത്തുടര്ന്ന് അഞ്ച് മാസത്തോളം അദ്ദേഹത്തിന് പുറത്തിരിക്കേണ്ടി വന്നു. ഇതിന് ശേഷവും ഇടക്കിടെ പരിക്കേറ്റു. അമിത ജോലിഭാരം ബുംറയുടെ പരിക്കിന്റെ കാരണമായി പറയാം. ഐപിഎല്ലില് എല്ലാ മത്സരങ്ങളും കളിക്കുന്ന ബുംറ ഇന്ത്യക്കായി കളിക്കാനെത്തുമ്പോള് പരിക്കേല്ക്കുന്നതിനെതിരേ നേരത്തെ തന്നെ വിമര്ശനം ഉയര്ന്നിരുന്നു.
ഇന്ത്യക്ക് നികത്താനാവാത്ത വിടവ്
രവീന്ദ്ര ജഡേജയും പരിക്കിനെത്തുടര്ന്ന് ലോകകപ്പില് നിന്ന് പുറത്തായിരുന്നു. രണ്ട് സൂപ്പര് താരങ്ങളുടെ അഭാവം ഇന്ത്യക്ക് വലിയ തിരിച്ചടിയാണെന്നതില് തര്ക്കമില്ല. പകരക്കാരനായി പരിഗണിക്കുന്ന മുഹമ്മദ് ഷമിയും ഫിറ്റ്നസ് പ്രശ്നങ്ങള് നേരിടുന്ന സാഹചര്യത്തില് ഇന്ത്യക്ക് കാര്യങ്ങള് എളുപ്പമാവില്ലെന്ന കാര്യം ഉറപ്പാണ്.