റോം/മ്യൂണിക്ക്/പാരിസ്: ഇറ്റാലിയന് ലീഗില് വിജയക്കുതിപ്പ് തുടരുകയായിരുന്ന യുവന്റസിന് സീസണിലെ ആദ്യ സമനില. ജെനോവയാണ് ഹോംഗ്രൗണ്ടില് യുവന്റസിനെ 1-1ന് സമനിലയില് പൂട്ടിയത്. ജര്മന് ലീഗില് നിലവിലെ ജേതാക്കളായ ബയേണ് മ്യൂണിക്ക് വിജയവഴിയില് തിരിച്ചെത്തിയപ്പോള് ബദ്ധവൈരികളായ ബൊറൂസ്യ ഡോട്മുണ്ട് ജയം തുടര്ന്നു. ഫ്രഞ്ച് ലീഗില് പിഎസ്ജി 5-0ന് അമിയെന്സിനെ തകര്ത്തു.
ആദ്യം ഡികോക്ക്, ഇനി ശിഖര് ധവാന്? അടുത്ത ഐപിഎല് കിരീടം മുംബൈക്കു തന്നെ...
സൂപ്പര്താരം ക്രിസ്റ്റിയാനോ റൊണാള്ഡോ ഗോളില് മുന്നിലെത്തിയ യുവന്റസിനെ ഡാനിയേല് ബെസ്സയുടെ ഗോളിലൂടെ ജെനോവ സമനില പിടിക്കുകയായിരുന്നു. ലീഗിലെ മറ്റു മല്സരങ്ങളില് നാപ്പോളി 3-0ന് ഉഡിനെസിനെയും സ്പാല് 2-0ന് റോമയെയും പരാജയപ്പെടുത്തി.
അതേസമയം, നാല് മല്സരങ്ങളിലെ തോല്വിക്കു ശേഷം കളത്തിലിറങ്ങിയ ബയേണ് 3-1ന് വോള്ഫ്സ്ബര്ഗിനെ പരാജയപ്പെടുത്തുകയായിരുന്നു. ഇരട്ട ഗോള് നേടിയ റോബര്ട്ട് ലെവന്ഡോവ്സ്കിയും ഒരു തവണ നിറയൊഴിച്ച ജെയിംസ് റോഡ്രിഗസുമാണ് ബയേണിന്റെ സ്കോറര്മാര്. ബൊറൂസ്യ ഡോട്മുണ്ട് 4-0ന് സ്റ്റുട്ട്ഗര്ട്ടിനെയാണ് തകര്ത്തത്. ഗോളടി തുടരുന്ന പാകോ അല്കാസര്, ജാഡോന് സാഞ്ചോ, മാര്കോ റ്യൂസ്, മാക്സിമിലാന് ഫിലിപ്പ് എന്നിവരാണ് ഡോട്മുണ്ടിന്റെ സ്കോറര്മാര്. ഡോട്മുണ്ട് തന്നെയാണ് പോയിന്റ് പട്ടികയില് തലപ്പത്ത്.
ഫ്രഞ്ച് ലീഗില് പിഎസ്ജി 5-0ന് അമിയെന്സിനെ നിഷ്പ്രഭമാക്കുകയായിരുന്നു. മാര്ക്വീഞ്ഞോ, അഡ്രിയാന് റാബിയോറ്റ്, ജുലിയന് ഡ്രാക്സലര്, കിലിയന് എംബാപ്പ, മൗസ്സ ഡിയാബി എന്നിവരാണ് പിഎസ്ജിയുടെ സ്കോറര്മാര്. മല്സരത്തില് ബ്രസീല് സൂപ്പര്താരം നെയ്മറിന് പിഎസ്ജി വിശ്രമം അനുവദിച്ചിരുന്നു. ലീഗ് സീസണില് പിഎസ്ജിയുടെ തുടര്ച്ചയായ 10ാം ജയം കൂടിയാണിത്.