റൊണാൾഡോ 19-ാമത്, മെസി ഏത് സ്ഥാനത്ത്? എക്കാലത്തെയും മികച്ച ഫ്രീ-കിക്ക് ടേക്കർമാർ ഇവർ

ലോക ഫുട്ബോൾ ചരിത്രത്തിലെ എക്കാലത്തെയും മികച്ച ഫ്രീ-കിക്ക് വിദഗ്ധരുടെ പുതിയ റാങ്കിങ് പട്ടിക പുറത്തുവിട്ട് പ്രമുഖ ഫുട്ബോൾ മാഗസിനായ 'ഫോർ ഫോർ ടു'. കരിയറിലെ ഫ്രീ-കിക്ക് ഗോളുകളുടെ എണ്ണവും അത് ലക്ഷ്യത്തിലെത്തിക്കാനുള്ള കൃത്യതയും മുൻനിർത്തി തയ്യാറാക്കിയ 25 കളിക്കാരുടെ പട്ടികയിൽ ബ്രസീലിയൻ ഇതിഹാസം ജൂനിഞ്ഞോ പെർനാംബുകാനോയാണ് ഒന്നാമത്. എന്നാൽ ആരാധകർക്കിടയിൽ ചർച്ചയാകുന്നത് ആധുനിക ഫുട്ബോളിലെ റദ്ദാക്കാനാകാത്ത രണ്ട് വിസ്മയങ്ങളായ ലയണൽ മെസ്സിയുടെയും ക്രിസ്റ്റ്യാനോ റൊണാൾഡോയുടെയും സ്ഥാനങ്ങളാണ്.

റയൽ മാഡ്രിഡ് താരങ്ങൾ ലോകകപ്പിൽ തോൽക്കണം! ഫുട്ബോൾ ലോകത്തെ ഞെട്ടിച്ചുകൊണ്ട് ജോസ് മൗറീന്യോയുടെ ക്രൂരമായ തമാശ
19-ാം സ്ഥാനത്ത് ക്രിസ്റ്റ്യാനോ റൊണാൾഡോ

കരിയറിൽ ഒട്ടനവധി അവിസ്മരണീയമായ ഫ്രീ-കിക്ക് ഗോളുകൾ സമ്മാനിച്ച പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയ്ക്ക് പട്ടികയിൽ 19-ാം സ്ഥാനമാണ് നൽകിയിരിക്കുന്നത്. കരിയറിൽ ഇതുവരെ 65 ഫ്രീ-കിക്ക് ഗോളുകളാണ് റൊണാൾഡോയുടെ അക്കൗണ്ടിലുള്ളത്. ഇതിൽ റയൽ മാഡ്രിഡിനായി 30 ഗോളുകളും, മാഞ്ചസ്റ്റർ യുണൈറ്റഡിനായി 14 ഗോളുകളും, യുവന്റസിനായി ഒന്നും, നിലവിലെ ക്ലബ്ബായ അൽ-നസറിനായി അഞ്ച് ഗോളുകളും ഉൾപ്പെടുന്നു. അന്താരാഷ്ട്ര തലത്തിൽ പോർച്ചുഗലിനായി 15 ഫ്രീ-കിക്ക് ഗോളുകൾ താരം നേടിയിട്ടുണ്ട്; 2018 ലോകകപ്പിൽ സ്പെയിനെതിരെ നേടിയ ആ വിഖ്യാത ഫ്രീ-കിക്ക് ഗോൾ അതിലൊന്നാണ്. 2026 മേയിൽ അൽ-നസറിനായി ഡമാക്കിനെതിരെ നേടിയ ഗോളോടെ റൊണാൾഡോ ഫ്രീ-കിക്ക് എണ്ണത്തിൽ ഡേവിഡ് ബെക്കാമിനൊപ്പമെത്തി.

മെസ്സി അഞ്ചാം സ്ഥാനത്ത്; മുന്നിൽ സീക്കോയും കൂമാനും

ക്രിസ്റ്റ്യാനോ റൊണാൾഡോയേക്കാൾ ഫ്രീ-കിക്ക് മികവിൽ ഏറെ മുന്നിലാണ് അർജന്റൈൻ ഇതിഹാസം ലയണൽ മെസ്സിയുടെ സ്ഥാനം. കരിയറിൽ 71 ഫ്രീ-കിക്ക് ഗോളുകളുമായി മെസ്സി പട്ടികയിൽ അഞ്ചാം സ്ഥാനത്തുണ്ട്. ഡച്ചുകാരൻ റൊണാൾഡ് കൂമാൻ രണ്ടാം സ്ഥാനത്തും, സിനിസ മിഹായ്ലോവിച്ച് മൂന്നാമതും, ബ്രസീലിയൻ ഇതിഹാസം സീക്കോ നാലാമതുമാണ് മെസ്സിക്ക് മുന്നിലുള്ളത്. കരിയറിൽ ഏറ്റവും കൂടുതൽ ഫ്രീ-കിക്ക് ഗോളുകൾ (101 എണ്ണം) നേടിയ റെക്കോർഡ് സീക്കോയുടെ പേരിലാണെങ്കിലും കളിശൈലിയുടെ മികവിലാണ് ജൂനിഞ്ഞോ ഒന്നാമനായത്. മെസ്സിക്ക് തൊട്ടുപിന്നിൽ ആറാം സ്ഥാനത്ത് അർജന്റീനയുടെ തന്നെ ഡീഗോ മറഡോണയുമുണ്ട്. റൊണാൾഡീഞ്ഞോ പത്താമതും പെലെ പന്ത്രണ്ടാമതുമാണ്.

FIFA WC 2026: ഇന്നല്ലെങ്കില്‍ പിന്നെ ഇക്വഡോര്‍ എന്ന് ആഘോഷിക്കും? പൊതു അവധി!; ഈ കാരണം
2026 ലോകകപ്പിൽ ഫ്രീ-കിക്ക് വറുതി

നിലവിൽ അമേരിക്കയിലും കാനഡയിലുമായി പുരോഗമിക്കുന്ന 2026 ഫിഫ ലോകകപ്പിൽ മെസ്സിയും റൊണാൾഡോയും തകർപ്പൻ ഫോമിലാണ്. മെസ്സി 5 ഗോളുകളോടെ ടോപ്പ് സ്കോറർ പട്ടികയിൽ മുന്നിൽ നിൽക്കുമ്പോൾ റൊണാൾഡോ രണ്ട് ഗോളുകൾ നേടിക്കഴിഞ്ഞു. എന്നാൽ ഇരുവരും ഇത്തവണ ഇതുവരെ ഫ്രീ-കിക്കിലൂടെ ലക്ഷ്യം കണ്ടിട്ടില്ല.

വാസ്തവത്തിൽ, ഈ ലോകകപ്പിൽ ഇതുവരെ വെറും മൂന്ന് നേരിട്ടുള്ള ഫ്രീ-കിക്ക് ഗോളുകൾ മാത്രമാണ് പിറന്നിട്ടുള്ളത് (കാനഡയുടെ നാഥാൻ സലിബ, കേപ് വെർഡെയുടെ കെവിൻ പിന, പോർച്ചുഗലിന്റെ നൂനോ മെൻഡസ് എന്നിവരാണ് അവ നേടിയത്). ലോകകപ്പ് ചരിത്രത്തിൽ മെസ്സിക്കും റൊണാൾഡോയ്ക്കും ഓരോ ഫ്രീ-കിക്ക് ഗോൾ മാത്രമാണുള്ളതെന്നത് മറ്റൊരു കൗതുകം. ഗ്രൂപ്പ് ഘട്ട മത്സരങ്ങൾ അവസാന ഘട്ടത്തിലേക്ക് കടക്കുമ്പോൾ ഒരു ഫ്രീ-കിക്ക് ഗോളിലൂടെ തങ്ങളുടെ റാങ്കിങ് ഉയർത്താൻ ഈ രണ്ട് ഇതിഹാസങ്ങൾക്കും സാധിക്കുമോ എന്നാണ് ആരാധകർ കാത്തിരിക്കുന്നത്.