Click it and Unblock the Notifications
കോലിക്കൊപ്പം പരിശീലിച്ചില്ല
2016ല് ഇന്ത്യന് ടീമിന്റെ ഓസ്ട്രേലിയന് പര്യടനത്തിനിടെയുണ്ടായ സംഭവമാണ് ശ്രീധര് വെളിപ്പെടുത്തിയത്. അഞ്ച് ഏകദിനവും മൂന്ന് ടി20യും ഉള്പ്പെട്ട പരമ്പര കളിക്കാനാണ് ഇന്ത്യ ഓസ്ട്രേലിയയിലേക്ക് പോയത്. മത്സരത്തിന് മുമ്പ് നടത്തിയ ഫീല്ഡിങ് പരിശീലനത്തിനിടെയാണ് കോലിയോടൊപ്പം പരിശീലിക്കാന് യുവി തയ്യാറാവാതെയിരുന്നത്.
'2016ലെ ഓസീസ് പരമ്പരയില് അഡലെയ്ഡ് ഓവലില് ഞങ്ങള് പരിശീലനം നടത്തുകയായിരുന്നു. ഓസ്ട്രേലിയക്കെതിരായ മൂന്ന് മത്സര ടി20 പരമ്പരക്ക് മുമ്പായിരുന്നു അത്. വിരാട് കോലി ഫീല്ഡിങ് പരിശീലനം നടത്തുകയായിരുന്നു.
യുവരാജ് സിങ് ഞങ്ങള്ക്ക് മുന്നിലൂടെ കടന്ന് പോയി. അവന് ഞങ്ങള്ക്കൊപ്പം ചേരുമെന്ന് ഞാന് പ്രതീക്ഷിച്ചെങ്കിലും രൂക്ഷമായി ഒന്ന് നോക്കി ഡഗൗട്ടിലേക്ക് പോയി. കോലി ഫീല്ഡിങ് പൂര്ത്തിയാക്കി അല്പ്പ സമയം കഴിഞ്ഞതോടെ യുവി പരിശീലനത്തിനായെത്തി'-ശ്രീധര് പറഞ്ഞു.
യുവി ഇതിനെക്കുറിച്ച് വ്യക്തമാക്കിയത് ഇങ്ങനെ
എനിക്ക് വിരാടിന്റെ വേഗതയ്ക്കൊപ്പം നില്ക്കാനോ അവന്റെ തീവ്രമായ പരിശീലനത്തോട് പൊരുത്തപ്പെടാനോ കഴിയില്ല. ഞാന് നിങ്ങളെ ശല്യപ്പെടുത്താതെ ഇരിക്കുന്നതാണ് നല്ലതെന്ന് കരുതി. നിങ്ങള് ഇത് പൂര്ത്തിയാക്കിയ ശേഷം എനിക്ക് എന്റേതായ രീതിയില് ഫീല്ഡിങ് ചെയ്യാമെന്നാണ് കരുതിയതെന്നാണ് യുവി പറഞ്ഞത്.
അടുത്ത ദിവസം നടന്ന മത്സരത്തില് ഹര്ദിക് പാണ്ഡ്യക്ക് അടുത്തായി ഷോര്ട്ട് കവറിലാണ് യുവരാജ് ഫീല്ഡ് ചെയ്തത്. ക്രിസ് ലിന്നിന്റെ ക്യാച്ച് നേടുകയും ചെയ്തു. ഒരു താരത്തിന്റെ വേഗതയ്ക്കനുസരിച്ച് മറ്റൊരു താരത്തിന് പൊരുത്തപ്പെടുക പ്രയാസമാണെന്ന് അന്ന് മനസിലായി.
Also Read: ഞാന് കളിച്ചത് ധോണിക്കായി, പിന്നീടാണ് രാജ്യം-ഇങ്ങനെയും ആരാധനയോ? പ്രതികരണങ്ങള്
ഇന്ത്യയുടെ മിന്നല് ഫീല്ഡര്
ഇന്ത്യന് ക്രിക്കറ്റ് ചരിത്രത്തിലെ ഏറ്റവും മികച്ച ഫീല്ഡര്മാരിലൊരാളാണ് യുവരാജ് സിങ്. എല്ലാവരെയും വിസ്മയിപ്പിക്കുന്ന നിരവധി ക്യാച്ചുകള് അദ്ദേഹത്തിന്റെ കരിയറില് കാണാനാവും. എന്നാല് 2016ലേക്കെത്തുമ്പോള് അദ്ദേഹം കരിയറിന്റെ അവസാന സമയത്തേക്കെത്തിയിരുന്നു.
2011ലെ ലോകകപ്പ് സമയത്ത് യുവരാജിന് അര്ബുദത്തിന്റെ പ്രശ്നങ്ങള് നേരിട്ടിരുന്നു. അതിന് ശേഷം ഇടവേളയെടുത്ത യുവരാജ് പിന്നീട് ഇന്ത്യന് ടീമിലേക്ക് തിരിച്ചെത്തുകയായിരുന്നു. 2016ല് യുവിയുടെ ഫിറ്റ്നസ് അത്ര മികച്ചതായിരുന്നില്ല.
ഏകദിന പരമ്പരയില് ഇന്ത്യ 4-1ന് തോറ്റപ്പോള് മൂന്ന് മത്സര ടി20 പരമ്പര ഇന്ത്യ തൂത്തുവാരിയാണ് മറുപടി നല്കിയത്. 2017ലാണ് യുവരാജ് ഇന്ത്യക്കായി അവസാനമായി കളിച്ചത്. ഇന്ത്യയുടെ അഭിമാന താരമാണെങ്കിലും വിരമിക്കല് മത്സരം പോലും യുവിക്ക് ലഭിച്ചില്ലെന്ന് പറയാം. 2019തോടെ അദ്ദേഹം എല്ലാത്തരം ക്രിക്കറ്റില് നിന്നും വിടപറഞ്ഞു.
Continue with Google