ക്യാപ്റ്റനാകാൻ പോകുന്നവനെ മാറ്റിവെച്ച് സഞ്ജുവിനെ ഇറക്കൂ! ഇന്ത്യയെ രക്ഷിക്കാൻ പാർത്ഥിവിന്റെ തന്ത്രം

ഇംഗ്ലണ്ടിനെതിരായ നാലാം ടി20-യിലെ 9 വിക്കറ്റിന്റെ ദയനീയ പരാജയത്തോടെ ഇന്ത്യ അഞ്ച് മത്സരങ്ങളുടെ പരമ്പര 3-0 ന് കൈവിട്ടു കഴിഞ്ഞു. പരമ്പര നഷ്ടമായ സാഹചര്യത്തിൽ, ജൂലൈ 11-ന് സതാംപ്ടണിൽ നടക്കുന്ന അവസാന മത്സരത്തിൽ ഇന്ത്യൻ ടീം പരീക്ഷണങ്ങൾക്ക് മുതിരണമെന്ന ആവശ്യവുമായി മുൻ വിക്കറ്റ് കീപ്പർ പാർത്ഥിവ് പട്ടേൽ രംഗത്ത്. കഴിഞ്ഞ മത്സരങ്ങളിലെ നാണംകെട്ട പ്രകടനങ്ങൾക്ക് ശേഷം അതേ ടീം കോമ്പിനേഷനുമായി ഇന്ത്യ മുന്നോട്ട് പോകരുതെന്നും, വൈസ് ക്യാപ്റ്റൻ തിലക് വർമ്മയെ പുറത്തിരുത്തി സഞ്ജു സാംസണെ തിരികെ കൊണ്ടുവരണമെന്നും പാർത്ഥിവ് ജിയോ ഹോട്ട്സ്റ്റാറിൽ പറഞ്ഞു.

ഗംഭീര്‍ പുറത്തേക്കോ? ടീമിലെ പലരുടേയും തല ഉരുളും!! കര്‍ശന നടപടികളിലേക്ക് ബിസിസിഐ
"തിലക് വർമ്മയ്ക്ക് പകരം സഞ്ജു സാംസൺ വരണം"

അയർലൻഡ് പരമ്പരയിലും ഇംഗ്ലണ്ടിനെതിരായ ആദ്യ ടി20-യിലും പരാജയപ്പെട്ടതിനെ തുടർന്നാണ് സഞ്ജുവിനെ പ്ലെയിങ് ഇലവനിൽ നിന്ന് മാറ്റിയത്. എന്നാൽ സിംബാബ്‌വെ പരമ്പരയ്ക്ക് മുൻപ് ഇന്ത്യ വ്യത്യസ്ത കോമ്പിനേഷനുകൾ പരീക്ഷിക്കേണ്ടതുണ്ടെന്നും അതിനായി സഞ്ജുവിന് മറ്റൊരു അവസരം കൂടി നൽകണമെന്നും പാർത്ഥിവ് ആവശ്യപ്പെട്ടു.

പാർത്ഥിവ് പട്ടേൽ പറഞ്ഞത്: "സഞ്ജു സാംസണെ ടീമിലേക്ക് കൊണ്ടുവരണമെങ്കിൽ ആർക്ക് പകരം കളിപ്പിക്കും എന്ന ചോദ്യം സ്വാഭാവികമായും ഉയരും. ഈ സാഹചര്യത്തിൽ നിർഭാഗ്യവശാൽ ടീമിന്റെ വൈസ് ക്യാപ്റ്റനെ തന്നെ പുറത്തിരുത്തേണ്ടി വരും. ഇന്ത്യക്ക് ശരിയായ കോമ്പിനേഷൻ കണ്ടെത്തണമെങ്കിൽ തിലക് വർമ്മയ്ക്ക് പകരം സഞ്ജു സാംസൺ പ്ലെയിങ് ഇലവനിലേക്ക് വരണം. തിലക് ഈ പരമ്പരയിലുടനീളം ഫോം കണ്ടെത്താൻ ബുദ്ധിമുട്ടുകയാണ് (നാലാം ടി20-യിൽ 8 പന്തിൽ 11 റൺസ്)."

വാഷിംഗ്ടൺ സുന്ദറിന് പകരം സൂര്യൻഷ് ഷെഡ്ഗെ

ടീമിൽ വരുത്തേണ്ട രണ്ടാമത്തെ പ്രധാന മാറ്റമായി പാർത്ഥിവ് നിർദ്ദേശിക്കുന്നത് യുവ ഓൾറൗണ്ടർ സൂര്യൻഷ് ഷെഡ്ഗെയെ ഉൾപ്പെടുത്തുക എന്നതാണ്. വാഷിംഗ്ടൺ സുന്ദറിന് പകരം ഷെഡ്ഗെയെ കളിപ്പിക്കുന്നത് ടീമിന്റെ ബോളിങ് ബാലൻസ് മെച്ചപ്പെടുത്താൻ സഹായിക്കുമെന്ന് അദ്ദേഹം വിലയിരുത്തി:

"ഞാൻ ടീമിൽ രണ്ട് മാറ്റങ്ങൾ വരുത്തും. രണ്ടാമത്തേത് വാഷിംഗ്ടൺ സുന്ദറിന് പകരം സൂര്യൻഷ് ഷെഡ്ഗെയ്ക്ക് അവസരം നൽകുക എന്നതാണ്. ഇത് ടീമിൽ നാല് സ്പെഷ്യലിസ്റ്റ് ബോളർമാരെ നിലനിർത്താൻ സഹായിക്കും. ഒപ്പം ശിവം ദുബെയ്ക്കും ഷെഡ്ഗെയ്ക്കും രണ്ട് ഓവർ വീതം പങ്കിട്ടെറിയാനും സാധിക്കും."

മത്സരത്തിനിടെ സ്റ്റേഡിയത്തിൽ സഞ്ജു.. സഞ്ജു മുറവിളി, നേരിട്ട് ഇടപെട്ട സാംസൺ ചെയ്തത് കണ്ടോ!
"ഇത് തിലകിന്റെ കരിയർ അവസാനിപ്പിക്കലല്ല"

തിലക് വർമ്മയെ ഒരു മത്സരത്തിൽ നിന്ന് മാറ്റുന്നത് അദ്ദേഹത്തെ പദ്ധതികളിൽ നിന്ന് പൂർണ്ണമായി ഒഴിവാക്കുന്നതായി കാണരുതെന്നും പാർത്ഥിവ് വ്യക്തമാക്കി. തിലക് ഇന്ത്യയുടെ ഭാവി വാഗ്ദാനമാണെന്നും ശക്തമായി തിരിച്ചുവരാൻ താരത്തിന് കഴിയുമെന്നും അദ്ദേഹം കൂട്ടിച്ചേർത്തു.

"ലോകകപ്പിൽ അക്സർ പട്ടേൽ വൈസ് ക്യാപ്റ്റനായിരുന്നു, എന്നിട്ടും ദക്ഷിണാഫ്രിക്കയ്ക്കെതിരായ മത്സരത്തിൽ അദ്ദേഹത്തിന് പുറത്തിരിക്കേണ്ടി വന്നു. ടീം കോമ്പിനേഷൻ ശരിയാകുന്നില്ലെങ്കിൽ ഇത്തരം തീരുമാനങ്ങൾ എടുത്തേ മതിയാകൂ. അതിനർത്ഥം തിലക് വർമ്മ നമ്മുടെ പ്ലാനുകളിൽ ഇല്ല എന്നല്ല. എന്നാൽ താല്കാലികമായി, ഈയൊരു മത്സരത്തിനായി സഞ്ജു സാംസണെ തിരികെ കൊണ്ടുവരണം," പാർത്ഥിവ് തന്റെ നിലപാട് വ്യക്തമാക്കി.