Click it and Unblock the Notifications
പാകിസ്താന്റെ റെക്കോര്‍ഡ്
പാകിസ്താന് മികച്ച റെക്കോര്‍ഡാണ് ന്യൂസിലാന്‍ഡിനെതിരേയുള്ളത്. അതുകൊണ്ടു തന്നെ കിവികളുടെ ചിറകരിഞ്ഞ് ബാബര്‍ ആസവും സംഘവും ഫൈനലിലേക്കു മുന്നേറുമെന്നാണ് പ്രതീക്ഷിക്കപ്പെടുന്നത്.
ഐസിസി ടൂര്‍ണമെന്റുകളിലെ നോക്കൗട്ടുകളില്‍ ന്യൂസിലാന്‍ഡിനെതിരേ പാകിസ്താനാണ് മുന്‍തൂക്കം. ഇതു പാകിസ്താനെ ഫൈനലിലെത്തിക്കുമെന്നാണ് ആരാധകര്‍ ഉറച്ചുവിശ്വസിക്കുന്നത്. ഏറ്റവും അവസാനായി ന്യൂസിലാന്‍ഡിനെ അവരുടെ നാട്ടില്‍ വച്ച് തകര്‍ത്ത് പാകിസ്താന് ത്രിരാഷ്ട്ര പരമ്പരയില്‍ വിജയികളായിരുന്നു.
അഞ്ചില്‍ മൂന്നിലും പാകിസ്താന്
ഐസിസി ടൂര്‍ണമെന്റുകളിലെ ഇതുവരെയുള്ള റെക്കോര്‍ഡ് നോക്കിയാല്‍ ന്യൂസിലാന്‍ഡിനെതിരേ പാകിസ്താന് ആധിപത്യം പുലര്‍ത്തിയതായി കാണാം. നാലു സെമി ഫൈനലുകളിലടക്കം ഇതുവരെ അഞ്ചു തവണയാണ് ഐസിസി നോക്കൗട്ടുകളില്‍ ഇരുടീമുകളും മുഖാമുഖം വന്നത്. ഇതില്‍ മൂന്നിലും വിജയം പാകിസ്താനായിരുന്നു. ന്യൂസിലാന്‍ഡിനു ജയിക്കാനായത് രണ്ടു തവണയാണ്. 2009നു ശേഷം ആദ്യമായിട്ടാണ് ഇപ്പോള്‍ ഒരു നോക്കൗട്ട് മാച്ചില്‍ പാക്-ന്യൂസിലാന്‍ഡ് മല്‍സരം നടക്കുന്നത്.
92ല്‍ തുടക്കം
1992ലെ ഏകദിന ലോകകപ്പിന്റെ സെമി ഫൈനലിലാണ് പാകിസ്താനും ന്യൂസിലാന്‍ഡും ഒരു നോക്കൗട്ടില്‍ കൊമ്പുകോര്‍ത്തത്. അന്നു പാക് പട നാലു വിക്കറ്റിന്റെ വിജയം ആഘോഷിക്കുകയായിരുന്നു. അതിനു ശേഷം 1999ലെ ഏകദിന ലോകകപ്പിന്റെ സെമി ഫൈനലിലും ഇരുവരും കൊമ്പുകോര്‍ത്തു. അന്നും ജയം പാക് പടയ്‌ക്കൊപ്പമായിരുന്നു. ഒമ്പതു വിക്കറ്റിന്റെ ഏകപക്ഷീയ വിജയവുമായി പാകിസ്താന് ഫൈനലിലേക്കു കുതിക്കുകയായിരുന്നു.
തൊട്ടടുത്ത വര്‍ഷത്തെ ഐസിസി ചാംപ്യന്‍സ് ട്രോഫിയുടെ സെമി ഫൈനലിലും പാക്- കിവി പോര് നടന്നു. പക്ഷെ ഇത്തവണ ജയം ന്യൂസിലാന്‍ഡിനൊപ്പമായിരുന്നു. നാലു വിക്കറ്റിനാണ് അവര്‍ പാകിസ്താനെ കെട്ടുകെട്ടിച്ചത്.
പ്രഥമ ടി20 ലോകകപ്പ്
2007ല്‍ സൗത്താഫ്രിക്കയില്‍ നടന്ന പ്രഥമ ടി20 ലോകകപ്പിന്റെ സെമി ഫൈനലുകളിലൊന്ന് പാകിസ്താനും ന്യൂസിലാന്‍ഡും തമ്മിലായിരുന്നു. അന്നു വിജയം സ്വന്തമാക്കിയത് പാകിസ്താനാണ്. മിസ്ബാഹുല്‍ ഹഖ് നയിച്ച പാക് ടീം ആറു വിക്കറ്റ് ജയത്തോടെ ഫൈനലില്‍ കടന്നു. ടി20 ലോകകപ്പില്‍ അതിനു ശേഷം ഒരിക്കല്‍പ്പോലും നോക്കൗട്ടില്‍ പാകിസ്താനും ന്യൂസിലാന്‍ഡും മുഖാമുഖം വന്നിട്ടില്ല.
2009ലെ ഐസിസി ചാംപ്യന്‍സ് ട്രോഫിയിലാണ് അവസാനമായി പാക്- ന്യൂസിലാന്‍ഡ് മല്‍സരം നടന്നത്. അന്നു അഞ്ചു വിക്കറ്റിനു പാകിസ്താന്റെ കഥ കഴിച്ച് കിവികള്‍ ഫൈനലിലേക്കു പറന്നിറങ്ങുകയും ചെയ്തു.
ടി20യില്‍ പാകിസ്താന് മുന്‍തൂക്കം
ഐസിസി ടൂര്‍ണമെന്റുകളിലെ നോക്കൗട്ട് മല്‍സരങ്ങളില്‍ മാത്രമല്ല ടി20യുടെ ഇതുവരെയുള്ള ചരിത്രമെടുത്താലും ന്യൂസിലാന്‍ഡിനെതിരേ പാകിസ്താനാണ് ആധിപത്യം.
ഇതുവരെ 28 ടി20കളിലാണ് ഇരുടീമുകളും ഏറ്റുമുട്ടിയത്. ഇതില്‍ 17ലും വിജയക്കൊടി പാറിക്കാന്‍ പാകിസ്താനു സാധിച്ചു. ന്യൂസിലാന്‍ഡ് വിജയിച്ചത് 11 ടി20 മല്‍സരങ്ങളിലാണ്.
