വൈഭവ് എന്തുകൊണ്ട് കളിക്കുന്നില്ല? വില്ലനായത് ടീം കോമ്പിനേഷൻ, വ്യക്തമാക്കി നായകൻ ശ്രേയസ്!

ഇന്ത്യൻ ക്രിക്കറ്റിലെ അടുത്ത വലിയ വാഗ്ദാനമെന്ന് വിശേഷിപ്പിക്കപ്പെടുന്ന യുവ വണ്ടർകിഡ് വൈഭവ് സൂര്യവംശിയുടെ അന്താരാഷ്ട്ര അരങ്ങേറ്റത്തിനായി കാത്തിരുന്ന ആരാധകർക്ക് ഒന്നാം ടി20യിൽ നിരാശ. അയർലൻഡിനെതിരായ പരമ്പരയിലെ ആദ്യ മത്സരത്തിന്റെ പ്ലെയിങ് ഇലവനിൽ വൈഭവിന് സ്ഥാനം ലഭിച്ചില്ല. ടോസ് നേടി ഇന്ത്യ ബൗളിങ് തിരഞ്ഞെടുത്ത ഈ മത്സരത്തിൽ വൈഭവിനെ പുറത്തിരുത്താനുണ്ടായ കൃത്യമായ തന്ത്രപരമായ കാരണം ക്യാപ്റ്റൻ ശ്രേയസ് അയ്യർ വ്യക്തമാക്കി.

എന്താണ് ദുബെ ഇത്! ഐപിഎല്ലിന് പിന്നാലെ അയർലന്റിനെതിരെയും ദുബെയുടെ കൈവിട്ട കളി!
ടീം കോമ്പിനേഷൻ വില്ലനായി; വൈഭവിന് കാത്തിരിക്കേണ്ടി വരും

ആഭ്യന്തര ക്രിക്കറ്റിലും ഐപിഎല്ലിലും തകർപ്പൻ പ്രകടനം പുറത്തെടുത്ത വൈഭവ് സൂര്യവംശിയെ ആദ്യ ടി20യിൽ തന്നെ ഇന്ത്യ കളിപ്പിക്കുമെന്നായിരുന്നു വിലയിരുത്തപ്പെട്ടിരുന്നത്. എന്നാൽ അയർലൻഡിലെ സാഹചര്യങ്ങൾ കണക്കിലെടുത്ത് കൃത്യമായ ഒരു ടീം ബാലൻസിലേക്ക് പോകാനാണ് പുതിയ കോച്ച് ഗൗതം ഗംഭീറും ക്യാപ്റ്റൻ ശ്രേയസ് അയ്യരും തീരുമാനിച്ചത്. വൈഭവിന്റെ അഭാവത്തെക്കുറിച്ച് ശ്രേയസ് അയ്യർ പറഞ്ഞത് ഇങ്ങനെ:

"നിർഭാഗ്യവശാൽ വൈഭവ് ഇന്ന് കളിക്കുന്നില്ല. അവൻ ഒരു തകർപ്പൻ പ്ലെയറാണ് എന്നതിൽ യാതൊരു സംശയവുമില്ല, വരും മത്സരങ്ങളിൽ അവന് തീർച്ചയായും അവസരം ലഭിക്കും. എന്നാൽ നിലവിൽ മികച്ച ഫോമിലുള്ള കളിക്കാർക്ക് തുടർച്ചയായ പിന്തുണ നൽകാനാണ് ഞങ്ങൾ തീരുമാനിച്ചത്. മൂന്ന് സ്പെഷ്യലിസ്റ്റ് പേസർമാരും, രണ്ട് സ്പിന്നർമാരും, ഒരു ഓൾറൗണ്ടറും അടങ്ങുന്ന കൃത്യമായ ബോളിങ് ലൈനപ്പുമായി കളിക്കാൻ തീരുമാനിച്ചതുകൊണ്ടാണ് ടോപ് ഓർഡറിൽ വൈഭവിനെ നിലവിൽ ഉൾപ്പെടുത്താൻ സാധിക്കാതെ പോയത്."

ഈ പരമ്പരയ്ക്ക് മുന്നോടിയായി ഗൗതം ഗംഭീർ നൽകിയ സന്ദേശം എന്തായിരുന്നു എന്ന ചോദ്യത്തിനും ശ്രേയസ് രസകരമായ മറുപടി നൽകി. തുറന്നു പറഞ്ഞാൽ, എല്ലാ കളിക്കാരോടും അവരുടെ സ്വാഭാവിക ശൈലിയിൽ തന്നെ കളിക്കാൻ അദ്ദേഹം ആവശ്യപ്പെട്ടിട്ടുണ്ട്. ഒപ്പം കളിയിൽ ഒട്ടും വിട്ടുവീഴ്ചയില്ലാത്ത മനോഭാവം പുലർത്താനും അദ്ദേഹം പറഞ്ഞു. വലിയ അനുഭവസമ്പത്തിൽ നിന്നാണ് അദ്ദേഹം സംസാരിക്കുന്നത്. അതുകൊണ്ടുതന്നെ ഇവിടുത്തെ സാഹചര്യങ്ങളുമായി നാം പൊരുത്തപ്പെടേണ്ടതുണ്ട്. ഇന്നലെ ഞങ്ങൾക്ക് മികച്ചൊരു പരിശീലന സെഷൻ ലഭിച്ചിരുന്നു." ശ്രേയസ് പറഞ്ഞു.

IND vs ENG: റിഷഭിന്റെ കാര്യം പോട്ടെ!! എവിടെ സഞ്ജു? ഇതു ശരിയല്ല, എബിഡി കലിപ്പില്‍
മത്സരത്തിൽ ഇന്ത്യക്ക് തകർപ്പൻ തുടക്കം

വൈഭവ് പ്ലെയിങ് ഇലവനിൽ ഇല്ലെങ്കിലും ബെൽഫാസ്റ്റിൽ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ അയർലൻഡിനെ ഇന്ത്യൻ ബൗളർമാർ തുടക്കം മുതലേ വരിഞ്ഞുമുറുക്കുകയാണ്. ഒടുവിൽ വിവരം ലഭിക്കുമ്പോൾ ആതിഥേയർ 9.5 ഓവറിൽ 4 വിക്കറ്റ് നഷ്ടത്തിൽ 68 റൺസ് എന്ന നിലയിൽ കടുത്ത തകർച്ചയിലാണ്.

യുവ പേസർ ഹർഷിത് റാണയാണ് അയർലൻഡ് ബാറ്റിങ് നിരയുടെ നട്ടെല്ലൊടിച്ചത്. 3 ഓവറിൽ വെറും 18 റൺസ് മാത്രം വഴങ്ങി റാണ രണ്ട് വിക്കറ്റുകൾ വീഴ്ത്തി. മത്സരത്തിന്റെ മൂന്നാം ഓവറിൽ ശിവം ദുബെ ഒരു ക്യാച്ച് കൈവിട്ടെങ്കിലും തൊട്ടടുത്ത പന്തിൽ ഹാരി ടെക്ടറുടെ ബാറ്റിന്റെ എഡ്ജിൽ തട്ടിയ പന്ത് വിക്കറ്റിന് പിന്നിൽ മലയാളി താരം സഞ്ജു സാംസൺ അതിമനോഹരമായി കൈപ്പിടിയിലൊതുക്കി ഇന്ത്യക്ക് ആദ്യ ബ്രേക്ക് ത്രൂ നൽകി. പിന്നീട് ക്യാച്ച് വിട്ടതിന് വലിയ രീതിയിൽ കുറ്റപ്പെടുത്തലുകൾ കേട്ട ശിവം ദുബെ, തന്റെ ആദ്യ പന്തിൽ തന്നെ ബെൻ ക്യാലിറ്റ്സിനെ പുറത്താക്കി ബോളിങ്ങിൽ ഇന്ത്യക്കായി വിക്കറ്റ് നേടുകയും ചെയ്തു.