കാത്തിരിപ്പിന് വിരാമമായി. അനിശ്ചിതത്വങ്ങൾക്ക് ഒടുവിൽ ടോക്കിയോ ഒളിമ്പിക്സിന് തിരിതെളിയുന്നു. 2021 ജൂലായ് 23 -ന് ടോക്കിയോ ഒളിമ്പിക്സിന് തുടക്കമാവും. കഴിഞ്ഞ വർഷം കോവിഡ് മഹാമാരിയെത്തുടർന്നാണ് ഒളിമ്പിക്സ് മാമാങ്കം മാറ്റിവെച്ചത്. എന്തായാലും കോവിഡ് ഭീതി പതിയെ വിട്ടൊഴിയുമ്പോൾ ജപ്പാന്റെ മണ്ണിലേക്ക് 32 -മത് ഒളിമ്പിക്സ് പതിപ്പ് തിരിച്ചെത്തുകയാണ്. ഇക്കുറി 205 രാജ്യങ്ങളിൽ നിന്നായി 11,000 -ത്തിൽപ്പരം കായിക താരങ്ങൾ ഒളിമ്പിക്സിൽ പങ്കെടുക്കും. 17 ദിവസങ്ങളിലായി 339 മത്സര ഇനങ്ങൾക്കാണ് ടോക്കിയോ വേദിയാവുക. ഓഗസ്റ്റ് 8 -ന് ഒളിമ്പിക്സിന് തിരശ്ശീല വീഴും. ചരിത്രത്തിൽ രണ്ടാം തവണയാണ് ജപ്പാൻ ഒളിമ്പിക്സിന് ആതിഥേയത്വം വഹിക്കുന്നത്. ഈ അവസരത്തിൽ നടക്കാനിരിക്കുന്ന ഒളിമ്പിക്സ് മത്സരങ്ങളുടെ സമ്പൂർണ വിവരം ചുവടെ കാണാം.