പുതിയ ക്ലബ്ബിലേക്കുള്ള യാത്രയ്ക്കിടെ ദുരന്തം
റെക്കോര്ഡ് തുകയ്ക്ക് ഇംഗ്ലീഷ് ക്ലബ്ബ് കാര്ഡിഫ് സിറ്റിയിലേക്ക് ചേക്കേറിയ എമിലിയാനോ സല പുതിയ ക്ലബ്ബിലേക്ക് പോകവെ സഞ്ചരിച്ച ചെറു വിമാനം കാണാതാവുകയായിരുന്നു. ബ്രിട്ടീഷ് ദ്വീപ് ഗ്വര്ണസെയ്ക്ക് മുകളില്വെച്ചാണ് വിമാനം കാണാതായത്. താരത്തിനായി നീണ്ട തിരിച്ചിലിനൊടുവില് മറൈന് ശാസ്ത്രജ്ഞന് ഡേവിഡ് മേണ്സിന്റെ നേതൃത്വത്തിലുള്ള സംഘമാണ് വിമാനം കണ്ടെത്തിയത്.
കാര്ഡിഫ് ചരിത്രത്തിലെ റെക്കോര്ഡ് തുക
കാര്ഡിഫിന്റെ ചരിത്രത്തിലെ ഏറ്റവും വലിയ തുകയ്ക്കായിരുന്നു സലയെ വാങ്ങിയത്. ഏകദേശം 137 കോടി രൂപയ്ക്ക് നടന്ന കൈമാറ്റത്തില് താരം ഏറെ ആഹ്ലാദവാനായിരുന്നു. 2015 മുതല് നാന്റെസിന് കളിക്കുന്ന സല 117 മത്സരങ്ങളില് നിന്ന് 42 ഗോളുകള് നേടിയിട്ടുണ്ട്. നാന്റെസിലെ സഹകളിക്കാരുടെ വികാരനിര്ഭരമായ യാത്രയയപ്പിനുശേഷമായിരുന്നു സല കാര്ഡിഫിലേക്ക് തിരിച്ചത്. എന്നാല്, യാത്ര പൂര്ണാക്കാന് സലയ്ക്ക് കഴിഞ്ഞില്ല.
സലയ്ക്കായി ലോകം കൈകോര്ത്തു
നേരത്തെ സലയ്ക്കായുള്ള തിരച്ചില് മൂന്നു ദിവസത്തിനുശേഷം നിര്ത്തിവെച്ചിരുന്നു. എന്നാല്, ഫുട്ബോള് താരങ്ങളുടെ നേതൃത്വത്തില് ഫണ്ട് ശേഖരിച്ച് തിരച്ചില് വീണ്ടും ആരംഭിക്കുകയായിരുന്നു. ലയണല് മെസ്സി, സെര്ജിയോ അഗ്യൂറോ, അര്ജന്റീന പ്രസിഡന്റ് തുടങ്ങിയവര് സലയ്ക്കായുള്ള അന്വേഷണം തുടരാന് അപേക്ഷിച്ചു. കിലിയന് എംപാപ്പെയെ പോലുള്ള കളിക്കാര് വലിയ തുക സംഭാവനയായും നല്കി.