ലോകകപ്പിന്റെ ആവേശമുയര്‍ത്തി വക്കാ വക്കാ...

പ്രിട്ടോറിയ: ലോകം ഒരു പന്തിനുള്ളിലേക്ക് ചുരുങ്ങാന്‍ മണിക്കൂറുകള്‍ മാത്രം ബാക്കി നില്‍ക്കെ ഫുട്‌ബോള്‍ ആരാധകരെ ആവേശത്തിലാഴ്ത്തുകയാണ് 'വക്കാ വക്കാ' എന്നു തുടങ്ങുന്ന ഗാനം. ലോകകപ്പ് ഫുട്‌ബോളിന്റെ സംഘാടകരായ ഫിഫ പുറത്തിറക്കിയ ഈ തീം സോങ് പോപ് താരം ഷക്കീറയാണ് ഒരുക്കിയിരിക്കുന്നത്.

കൊളംബിയന്‍ ഗായികയുടെ ചടുലമായ നൃത്തചുവടുകളുള്ള ഈ ഗാനം ഫുട്‌ബോള്‍ ആരാധകര്‍ ഏറ്റെടുത്തു കഴിഞ്ഞു. വക്കാ വക്കാ അഥവാ 'ദിസ് ടൈം ഫോര്‍ ആഫ്രിക്ക' എന്ന വീഡിയോ ആല്‍ബത്തിന് ലോകവ്യാപകമായി വന്‍വരവേല്‍പ്പാണ് ലഭിയ്ക്കുന്നത്.

അര്‍ജന്റീനയുടെ തുരുപ്പുചീട്ടായ സ്‌ട്രൈക്കര്‍ ലയണല്‍ മെസ്സിയും സ്പാനിഷ് താരം ജെറാര്‍ഡ് പിക്കെയുമൊക്കെ തീംസോങില്‍ പ്രത്യക്ഷപ്പെടുന്നുണ്ട്. മുന്‍ ലോകകപ്പുകളിലെ സുവര്‍ണ മുഹൂര്‍ത്തങ്ങളും ഗാനത്തില്‍ ഉള്‍പ്പെടുത്താന്‍ ഷക്കീര മറന്നിട്ടില്ല.