ഗ്വാര്‍ഡിയോളയെ തകര്‍ത്തത് ക്ലോപ്പിന്‍റെ മാസ്റ്റര്‍പ്ലാന്‍, എന്തായിരുന്നു അത് ?

ആക്രമണാത്മക ഫുട്‌ബോളിന്‍റെ വക്താവെന്നാണ് ക്ലോപ്പ് അറിയപ്പെടുന്നത്. എന്നാല്‍ സിറ്റിക്കെതിരേ കണ്ടത് ക്ലോപ്പിന്‍റെ മറ്റൊരു മുഖമാണ്. പ്രതിരോധം മറയാക്കി എതിരാളികളെ വീഴ്ത്തുന്ന പുതിയ തന്ത്രം.

ലഭിക്കാവുന്നതില്‍ വച്ച് ഏറ്റവും മികച്ച ടീമിനെയാണ് ഗ്വാര്‍ഡിയോള സിറ്റി പ്ലെയിങ് ഇലവനില്‍ ഉള്‍പ്പെടുത്തിയത്. സെര്‍ജിയോ അഗ്വേറോ, റഹീം സ്റ്റര്‍ലിങ്, കെവിന്‍ ഡിബ്രൂയ്ന്‍, ഡേവിഡ് സില്‍വ എന്നിവരുണ്ടായിട്ടും സിറ്റിക്ക് കളിക്കളത്തില്‍ അതു പ്രകടിപ്പിക്കാനായില്ല.

ക്ലോപ്പിന്‍റെ വരവോടെ ലിവര്‍പൂള്‍ പഴയ ഫിയര്‍ ഫാക്ടര്‍ തിരിച്ചുകൊണ്ടു വന്നുകഴിഞ്ഞു. നിലവില്‍ ലോകത്തെ ഏതു വമ്പന്‍ ടീമിനെയും തകര്‍ത്തടുക്കാനുള്ള മികവ് ക്ലോപ്പിന്‍റെ കുട്ടികള്‍ക്കുണ്ട്. ഇത്തവണ പ്രീമിയര്‍ ലീഗ് കിരീടം ലിവര്‍പൂളിലെത്തിയാല്‍ അദ്ഭുതപ്പെടേണ്ടതില്ല.

തുടരെ 13ം ജയം കൊയ്ത് കുതിക്കുന്ന ലീഗിലെ ഒന്നാംസ്ഥാനക്കാരായ ചെല്‍സിയെ എളുപ്പത്തില്‍ കിരീടത്തിലേക്ക് മുന്നേറാന്‍ ലിവര്‍പൂള്‍ അനുവദിക്കില്ല. സിറ്റിക്കെതിരേ നേടിയ ജയത്തോടെ ചെല്‍സിയുമായുള്ള അകലം ലിവര്‍പൂള്‍ ആറാക്കി കുറച്ചു.

ഗ്ലാമര്‍ കോച്ച് ഗ്വാര്‍ഡിയോളയെ ഈ സീസണില്‍ സിറ്റി പരിശീലകസ്ഥാനത്തേക്കു കൊണ്ടുവന്നതു തന്നെ കിരീടം തിരിച്ചുപിടിക്കുകയെന്ന ലക്ഷ്യത്തോടെയാണ്. എന്നാല്‍ അദ്ദേഹത്തിന്‍റെ കന്നി സീസണില്‍ അതു കൂടുതല്‍ ദുഷ്‌കരമായി മാറുകയാണ്. തലപ്പത്തുള്ള ചെല്‍സിയേക്കാള്‍ 10 പോയിന്‍റ് പിന്നിലാണ് സിറ്റി.