Click it and Unblock the Notifications
കൊച്ചിയില് തുടര്ച്ചയായി ആറു വിജയങ്ങളാണു ബ്ലാസ്റ്റേഴ്സിന്റെ ഗ്രാഫ്. ഏഴാമത്തെ മത്സരം ഫൈനലാണ്. വിജയം ആവര്ത്തിയ്ക്കുക എന്നതില് കുറഞ്ഞൊരു ലക്ഷ്യമില്ല. ഗോള് വഴങ്ങുന്നതില് പിശുക്കു കാണിക്കാത്ത കൊമ്പന്മാര് പക്ഷേ കൊച്ചിയില് നാലു ഗോള് മാത്രമേ വഴങ്ങിയിട്ടുള്ളൂ എന്നതും ആശ്വാസമാണ്.
ബ്ലാസ്റ്റേഴ്സിന്റെ പ്രതീക്ഷയും കരുത്തുമെല്ലാം ടീമിലെ പന്ത്രണ്ടാമനിലാണ്. ആര്ത്തിരമ്പുന്ന ആരാധകര് തന്നെയാണ് ഈ പന്ത്രണ്ടാമന്. 60000ത്തോളം പേര് We are, We are Blasters..... എന്ന് ആര്ത്തിരമ്പുമ്പോള് ബ്ലാസ്റ്റേഴ്സിനു ജയിക്കാതിരിക്കാനാകില്ല.
ആരാധകരുടെ പിന്തുണ ടീമിനു ഗുണം ചെയ്യുമെങ്കിലും, ആരാധകര് കളിക്കാനിറങ്ങരുതെന്നു ബ്ലാസ്റ്റേഴസ് കോച്ച് സ്റ്റീവ് കോപ്പല് ആവശ്യപ്പെട്ടു. നന്നായി കളിക്കുന്ന ടീം ജയിക്കും. കാണികളുടെ പിന്തുണ കൊണ്ടു ഗോള് നേടാനോ തടയാനോ കഴിയില്ലെന്നും അദ്ദേഹം. കഴിഞ്ഞ സീസണില് ഗോവയിലെ ഗ്യാലറി കാണിച്ച അച്ചടക്കമില്ലായ്മ ബ്ലാസ്റ്റേഴ്സ് ആരാധകരുടെ ഭാഗത്തുനിന്നുണ്ടാകരുതെന്നും അദ്ദേഹം ആവശ്യപ്പെട്ടു.
കൊല്ക്കത്തയോട് പഴയൊരു കണക്കു ബാക്കിയുണ്ട് ബ്ലാസ്റ്റേഴ്സിന്. ആദ്യ സീസണിലെ ഫൈനലിലെ തോല്വിയുടെ കണക്ക്. സ്വന്തം തട്ടകത്തില് കോല്ക്കത്തയെ മുന്നില് കിട്ടുമ്പോള് കണക്കു തീര്ക്കാന്ഇതിലും നല്ലൊരു അവസരം ഇനിയുണ്ടാകണമെന്നില്ല.
ആദ്യ സീസണിലെ ഫൈനലില് കേരളത്തിന്റെ നെഞ്ചു പിളര്ന്ന ഗോള്നേടിയ കൊല്ക്കത്ത താരം മുഹമ്മദ് റഫീഖ് ഇന്ന് ബ്ലാസ്റ്റേഴ്സിന്റെ നിരയിലുണ്ട്. ഡല്ഹിക്കെതിരായ രണ്ടാം പാദ സെമിയില് നിര്ണായ പെനാല്റ്റി വലയിലെത്തിച്ച റഫീഖാണ് കേരളത്തിന്റെ ഫൈനല് ബര്ത്ത് ഉറപ്പിച്ചത്. കാലത്തിന്റെ കാവ്യനീതി പോലെ റഫീഖിന്റെ കാലില് നിന്നുതന്നെ ഫൈനലിലെ കേരളത്തിന്റെ വിജയഗോള്, അതുണ്ടാകുമോ ?
ആദ്യ സീസണിലെ ഫൈനലില് കേരളത്തിനെ അട്ടിമറിച്ചതിന്റെ ചരിത്രമാണ് കൊല്ക്കത്തയുടെ ഏറ്റവും വലിയ മുതല്ക്കൂട്ട്. ഈ സീസണിലെ ലീഗ് റൗണ്ടില് കൊച്ചിയിലും കൊല്ക്കത്ത കേരളത്തെ പിടിച്ചു കെട്ടിയിരുന്നു. ഹാവി ലാറുടെ ഗോളില് കേരളം പരാജയപ്പെട്ടു.
കണക്കിലെ കളിയിലും കൊല്ക്കത്തയ്ക്കാണു മുന്തൂക്കം. ഇരു ടീമുകളും അഞ്ചു തവണ മുന്പ് നേര്ക്കു നേര്വന്നപ്പോള് ഒരിക്കല് പോലും ബ്ലാസ്റ്റേവ്സിനു ജയിക്കാനായിട്ടില്ല. നാലു മത്സരങ്ങള് കോല്ക്കത്ത നേടിയപ്പോള് ഒരു മത്സരം സമനിലിലായി.
ബ്ലാസ്റ്റേഴ്സും ബ്ലാസ്റ്റേഴ്സ് ആരാധകരും ഏറ്റവും ഭയപ്പെടുന്നത് സ്വന്തം ഹ്യൂമേട്ടനെത്തന്നെയാണ്. ഗ്രൗണ്ടിലെ ഇയാന് ഹ്യൂം എന്താണെന്ന് ബ്ലാസ്റ്റേഴ്സിനെപ്പോലെ അറിയുന്ന ടീം വേറെയില്ല. സ്വന്തം നിരയിലും എതിര് നിരയിലും അവര് അത് അനുഭവിച്ചിട്ടുണ്ട്. ഐഎസ്എല്ലിലെ ഏറ്റവും വലിയ ഗോള് വേട്ടക്കാരന് ഈ സീസണിലും മികച്ച ഫോമിലാണ്.
പ്രവചനങ്ങളും വിലയിരുത്തലുകളും അധികവും ബ്ലാസ്റ്റേഴ്സിനൊപ്പമാണ്. എന്നാല് ആരും കൊല്ക്കത്തയെ തള്ളിക്കളയുന്നില്ല. ഇരു ടീമുകള്ക്കും കാര്യങ്ങള് എളുപ്പമാകില്ല. നിശ്ചിത സമയത്തു ഗോള് രഹിതമായി അധികസമയത്തേക്കും ടൈ ബ്രേക്കറിലേക്കും നീളുന്ന മത്സമാണ് കൂടുതല് പേരും പ്രവചിക്കുന്നത്. ഗോള് വര്ഷമില്ലാതെ ഒരു ഗോളിന്റെ മാര്ജിനില് വിജയം തീരുമാനിക്കപ്പെട്ട് നിശ്ചിത സമയത്തില് മത്സരം അവസാനിക്കുമെന്നും ചിലര് പ്രവചിക്കുന്നു.
വിലയിരുത്തലുകള്ക്കും പ്രവചനങ്ങള്ക്കുമപ്പുറം ഇതു ഫുട്ബോളാണ്. അധികസമയത്തിന്റെ അവസാന മിനിറ്റിന്റെ അവസാന സെക്കന്ഡിലായിരിക്കും ചിലപ്പോള് പ്രവചനങ്ങളും പ്രതീക്ഷകളും സ്വപ്നങ്ങളുമെല്ലാം പൊട്ടിത്തകരുന്നത്. അതാണു ഫുട്ബോളിന്റെ സവിശേഷത്. അതുകൊണ്ടുതന്നെയാണ് ലോകത്ത് വലിയൊരു ഭൂരിപക്ഷം ഹൃദയത്തിന്റെ സ്ഥാനത്തു ഫുട്ബോളിനെ കൊണ്ടു നടക്കുന്നത്. ഇനി ഏതാനും മണിക്കൂറുകള് മാത്രം, ആരു വീഴും ആരു നേടുമെന്നു കാത്തിരുന്നു കാണാം.
Continue with Google